Skýrsla starfshóps um starfsumhverfi gagnavera

Ef Ísland á að koma til greina sem eftirsóknarverð staðsetning fyrir alþjóðlegan gagnaveraiðnað er lykilatriði að samkeppnishæfni gagnatenginga við útlönd verði aukin. Núverandi gagnaflutningskerfi Farice er fullnægjandi eins og staðan er í dag en miðað við áframhaldandi vöxt í internetumferð þá er ljóst að þörf er á endurnýjun á flutningskerfinu áður en langt um líður. Þetta er á meðal helstu atriða sem fram koma í skýrslu starfshóps um starfsumhverfi gagnavera sem skipaður var í lok ágúst á síðasta ári.

• Skýrsla starfshóps um starfsumhverfi gagnavera

Hlutverk starfshópsins var að fara yfir þróun og stöðu gagnaveraiðnaðarins og meta leiðir sem stjórnvöld geta farið til að efla stöðu hans og framtíðarvöxt, meðal annars í ljósi örra tækniframfara og þjóðfélagsbreytinga. Starfshópurinn var skipaður sérfræðingum úr fjármála- og efnahagsráðuneyti, samgöngu- og sveitarstjórnarráðuneyti og atvinnuvega- og nýsköpunarráðuneyti.

Meðal annarra atriða sem fram koma í skýrslunni má nefna:

• Samkeppnisstaða Íslands byggist fyrst og fremst á grænni endurnýjanlegri orku, sem fá má á nokkuð hagstæðu verði, og veðurfarslegum þáttum sem stuðla að lægri kælikostnaði tölvubúnaðar en ella. Þessi sérstaða fer þó minnkandi.
• Ef opna á fyrir samkeppni, og stuðla að innkomu nýrra aðila þarf ríkið að endurskoða aðkomu sína að útlandasamböndum. Um leið þarf að gæta að samkeppnisþáttum og öryggishagsmunum þjóðarinnar.
• Grundvallarforsenda uppgangs gagnaveraiðnaðar er að hér sé í boði áreiðanleg raforka á samkeppnishæfu verði.