Mál nr. 91/2021 Úrskurður 11. ágúst 2021
Mál nr. 91/2021 Millinafn: Foss
Eiginnafn: Foss (kk.)
Hinn 11. ágúst 2021 kveður mannanafnanefnd upp svohljóðandi úrskurð í máli 91/2021, en erindið barst nefndinni 28. júlí.
Til þess að heimilt sé að samþykkja nýtt millinafn þurfa öll skilyrði 6. gr. laga, nr. 45/1996, um mannanöfn að vera uppfyllt. Skilyrðin eru:
- Millinafn skal dregið af íslenskum orðstofnum eða hafa áunnið sér hefð í íslensku máli en má þó ekki hafa nefnifallsendingu.
- Nöfn, sem aðeins hafa unnið sér hefð sem annaðhvort eiginnöfn karla eða eiginnöfn kvenna, eru ekki heimil sem millinöfn.
- Millinafn skal ritað í samræmi við almennar ritreglur íslensks máls nema hefð sé fyrir öðrum rithætti þess.
- Millinafn má ekki vera þannig að það geti orðið nafnbera til ama.
Auk þess má nafnið ekki vera ættarnafn í skilningi 7. gr. mannanafnalaga.
Nafnið Foss telst vera ættarnafn í skilningi mannanafnalaga og þess vegna er ekki hægt að samþykkja það á mannanafnaskrá sem millinafn.
Til þess að heimilt sé að samþykkja nýtt eiginnafn þurfa öll skilyrði 5. gr. laga, nr. 45/1996, um mannanöfn að vera uppfyllt. Skilyrðin eru:
- Eiginnafn skal geta tekið íslenska eignarfallsendingu eða hafa unnið sér hefð í íslensku máli.
- Nafnið má ekki brjóta í bág við íslenskt málkerfi.
- Það skal ritað í samræmi við almennar ritreglur íslensks máls nema hefð sé fyrir öðrum rithætti þess.
- Eiginnafn má ekki vera þannig að það geti orðið nafnbera til ama.
Eiginnafnið Foss (kk.) er í eignarfalli Foss og telst uppfylla ákvæði 5. gr. laga um mannanöfn.
Úrskurðarorð:
Beiðni um millinafnið Foss er hafnað.
Beiðni um eiginnafnið Foss (kk.) er samþykkt og skal nafnið fært á mannanafnaskrá.