Framhald átaks til að stytta bið eftir völdum aðgerðum

Óttarr Proppé heilbrigðisráðherra hefur ákveðið að fela Sjúkratryggingum Íslands að semja við Landspítalann, Sjúkrahúsið á Akureyri og Heilbrigðisstofnun Vesturlands um að framkvæma valdar aðgerðir á grundvelli átaks stjórnvalda til að stytta biðlista.

Þetta er annað árið af þremur sem átakið nær til og eru 840 milljónir króna af fjárlögum þessa árs til ráðstöfunar. Átakið á þessu ári verður tvískipt og nær til hálfs árs í senn. Greiðslur til stofnanana vegna þátttöku þeirra í átakinu munu fara fram mánaðarlega í samræmi við fjölda aðgerða.

Við val á tegundum aðgerða fyrir átakið var byggt á ráðgjöf Embættis landlæknis. Þetta eru liðskiptaaðgerðir, hjartaþræðingar og augasteinsaðgerðir líkt og í fyrra, en að auki er bætt við völdum kvensjúkdómaaðgerðum.

Gert er ráð fyrir að ráðist verði í sambærilegan fjölda aðgerða og í átakinu á síðastliðnu ári en endanlegar upplýsingar um fjölda aðgerða á hverri stofnun liggja fyrir á næstu dögum. Í fyrra leiddi átakið til þess að gerðar voru 48% fleiri liðskiptaaðgerðir en ella og 137% fleiri augasteinsaðgerðir. Hjartaþræðingum fjölgaði lítið sem ekkert, eða um 1%.

Landspítalinn mun annast allar tegundir þeirra aðgerða sem falla undir átakið og Sjúkrahúsið á Akureyri framkvæmir allar aðgerðir aðrar en hjartaþræðingar. Heilbrigðisstofnun Vesturlands mun annast liðskiptaaðgerðir.

Stofnanirnar þrjár munu eiga þess kost að framkvæma aðgerðir sem falla undir átakið á öðrum opinberum heilbrigðisstofnunum þyki það henta. Þetta er liður í þeirri viðleitni að nýta betur mannafla og aðstöðu á heilbrigðisstofnunum utan höfuðborgarsvæðisins og gera fleiri íbúum utan höfuðborgarsvæðisins kleift að fá sérhæfða heilbrigðisþjónustu í eða nær sinni heimabyggð.

Sjúkratryggingar semja um augasteinsaðgerðir

Leitað hefur verið til fyrirtækjanna Sjónlags og Lasersjónar um þátttöku í átakinu vegna fjölgunar augasteinsaðgerða og gangi það eftir mun heilbrigðisráðherra fela Sjúkratryggingum Íslands að annast samningagerð við fyrirtækin.