Mínar síður á Ísland.is aðgengilegar fyrirtækjum

Mínar síður á Ísland.is eru í sífelldri þróun og eru nú aðgengilegar fyrirtækjum fyrir þá sem hafa prókúru. Prókúruhafar fyrirtækja hafa sjálfkrafa aðgang með eigin rafrænum skilríkjum og geta skipt milli aðganga. Innskráning fyrirtækja byggist á nýju innskráningar- og umboðskerfi sem þýðir að prókúruhafi mun geta veitt öðrum aðgang að Mínum síðum fyrirtækisins, sé þess þörf.

Um 16 þúsund fyrirtæki voru í launagreiðendaferli Fjársýslunnar árð 2021 og þessi bætta þjónusta ætti því að koma að gagni hjá stórum hópi.

Á síðunum er m.a. hægt að nálgast:

• Pósthólf fyrirtækis
• Umsóknir (þegar fyrirtæki getur sótt um í gegnum umsóknarkerfi)
• Upplýsingar um fyrirtæki úr fyrirtækjaskrá
• Fasteignir úr fasteignaskrá Þjóðskrár
• Fjármál þ.e. stöðu fyrirtækis við ríkissjóð
• Ökutæki úr ökutækjaskrá Samgöngustofu

Bjarni Benediktsson, fjármála- og efnahagsráðherra

„Það er skýrt markmið okkar að opinber þjónusta verði sífellt einfaldari og aðgengilegri, bæði fyrir einstaklinga en ekki síður atvinnulífið í landinu. Þetta er góður og mikilvægur áfangi í þeirri vegferð.“