Menntamálaráðherrar Íslands og Bretlands funda í Lundúnum
Íslensk stjórnvöld leggja áherslu á að jafnræði ríki meðal landa á evrópska efnahagssvæðinu þegar kemur að skólagjöldum í breska háskóla eftir Brexit. Þetta myndi þýða mögulega lækkun á skólagjöldum fyrir íslenska námsmenn við breska háskóla en sem stendur greiða íslenskir nemendur hærri skólagjöld við breska háskóla en námsmenn frá ríkjum Evrópusambandsins. Þetta mikla hagsmunamál var eitt af þeim atriðum sem ráðherra setti á dagskrá fundarins.
„Við leggjum áherslu á efla samstarf við Bretland á sviði mennta- og vísindamála óháð Brexit. Bretland er einn mikilvægasti útflutningsmarkaður Íslands og eitt helsta samstarfsland okkar á sviði mennta- og vísindamála. Það er hægt að gera enn betur í að bæta kjör námsmanna og því lagði ég áherslu á að ræða sérstaklega lækkun skólagjalda fyrir íslenska námsmenn í breskum háskólum. Það gæti fjölgað íslenskum nemendum sem velja að læra í Bretlandi og eflt samband ríkjanna enn frekar,“ sagði Lilja Alfreðsdóttir mennta- og menningarmálaráðherra.
Ísland og Bretland eiga náið samstarf á sviði mennta- og vísindamála en frá árinu 2014 hafa rúmlega 2000 einstaklingar í ríkjunum farið í nemenda- og starfsmannaskipti í gegnum Erasmus+ áætlunina. Þá er Bretland eitt helsta samstarfsland Íslands á vísindasviðinu í Sjóndeildarhring 2020 (e. Horizon 2020), áttundu rannsókna- og nýsköpunaráætlun ESB.
Ráðherrarnir ræddu einnig tækifæri sem felast í fjórðu iðnbyltingunni og sameiginlegar áherslur í þeim efnum. Líkt og Íslendingar hafa Bretar einnig lagt meiri áherslu á skapandi greinar, tækni- og verkmenntun í sinni stefnumótun, meðal annars til að búa samfélagið betur undir breytingar vegna örrar tækniþróunar.