19. febrúar 2021 Háskóla-٫ iðnaðar- og nýsköpunarráðuneytið

Björgunarsveitir fá nýjar færanlegar rafstöðvar til að efla fjarskiptaöryggi

Sigurður Ingi Jóhannsson, samgöngu- og sveitarstjórnarráðherra, fær leiðsögn um færanlegu rafstöðvarnar hjá Þórhalli Ólafssyni, framkvæmdastjóra Neyðarlínunnar, og Þór Þorsteinssyni, formanni Slysavarnafélagsins Landsbjargar. - mynd — Sigurður Ingi Jóhannsson, samgöngu- og sveitarstjórnarráðherra, fær leiðsögn um færanlegu rafstöðvarnar hjá Þórhalli Ólafssyni, framkvæmdastjóra Neyðarlínunnar, og Þór Þorsteinssyni, formanni Slysavarnafélagsins Landsbjargar.

Sigurður Ingi Jóhannsson, samgöngu- og sveitarstjórnarráðherra, færði í dag fulltrúum þrettán björgunarsveita Slysavarnafélagsins Landsbjargar nýjar færanlegar rafstöðvar við athöfn í húsakynnum Neyðarlínunnar á Hólmsheiði. Björgunarsveitir Landsbjargar fá allt í allt rúmlega 30 nýjar færanlegar rafstöðvar á þessu ári. Tilgangurinn er að efla rekstraröryggi í fjarskiptum þegar óveður geisa eða hamfarir verða og tryggja eins og kostur er að hægt verði að hringja eftir aðstoð í neyð og kalla út viðbragðsaðila. Með því að fjölga færanlegum rafstöðvum og staðsetja hjá björgunarsveitum verður hægara að koma rafmagni aftur á þar sem þörf krefur og bæta þannig lífsgæði fólks.

Afhending færanlegra rafstöðva markar upphaf á öðrum áfanga í átaki stjórnvalda um úrbætur á fjarskiptainnviðum eftir mikil óveður í desember 2019. Í fyrri áfanga var varaafl bætt á 68 fjarskiptastöðvum, einkum á Vestfjörðum, Norðurlandi og Austurlandi. Í þeim síðari verður huga að fjarskiptastöðvum á Suðurlandi, Vesturlandi og suðvesturhorninu. Færanlegar rafstöðvar bætast við net af föstum rafstöðvum um land allt. Þegar átakinu lýkur mun samanlagt afl allra varaaflstöðvanna nema um 2 MW. Meðalafl fastra rafstöðva er um 20 KW en í færanlegum rafstöðvum um 15 kW.

Sigurður Ingi Jóhannsson, samgöngu- og sveitarstjórnarráðherra, kynnti í fyrravor að verkefnið fengi 275,5 milljóna kr. fjárveitingu árið 2020 á vegum fjarskiptasjóðs. Fjárveitingin var veitt á grundvelli fjárfestingaátaks stjórnvalda til að sporna jafnframt gegn samdrætti í hagkerfinu í kjölfar heimsfaraldursins.

„Færanlegar rafstöðvar munu þétta öryggisnet fjarskipta um land allt. Afhending þeirra er liður í stærra átaki við að stórefla öryggi í fjarskiptum. Við viljum tryggja sem best að ef fárviðri geisar eða hamfarir verða sé til staðar varaafl og nægt rafmagn. Með sameiginlegu átaki Neyðarlínunnar, Mílu og fjarskiptafyrirtækja á síðasta ári hefur grettistaki verið lyft við að bæta varaafl á fjarskiptastöðvum. Núna færum við björgunarsveitunum mikilvægan tækjabúnað til að koma rafmagni aftur á við erfiðar aðstæður. Engum er betur treystandi til þess að taka þetta verkefni að sér en sjálfboðaliðum og starfsfólki hjá Slysavarnafélaginu Landsbjörg,“ segir Sigurður Ingi Jóhannsson, samgöngu- og sveitarstjórnarráðherra.

„Að bæta rekstraröryggi á fjarskiptainnviðum er mikilvægt samfélagslegt verkefni sem við tökum þátt í og öxlum þannig okkar ábyrgð sem hluti af almannavarnakerfinu. Færanlegar rafstöðvar eru einnig frábært verkfæri fyrir björgunarsveitir sem þurfa oft að glíma við krefjandi verkefni og munu þær nýtast vel í ýmsum aðstæðum í framtíðinni,“ segir Þór Þorsteinsson, formaður Slysavarnafélagsins Landsbjargar.

Tveir áfangar

Neyðarlínan hefur átt í nánu samstarfi við Mílu, fjarskiptafélögin Nova, Símann og Sýn (Vodafone) og Ríkisútvarpið um aðgerðir til að tryggja samfelld fjarskipti í langvarandi rafmagnsleysi. Neyðarlínan er í forsvari fyrir verkefninu.

Varaaflsverkefninu var skipt í tvo áfanga. Í fyrra áfanganum var unnið að verkefnum á Vesturlandi, Vestfjörðum, Norðurlandi og Austurlandi og gerðar voru margvíslegar úrbætur á 68 fjarskiptastöðum. Settar hafa verið upp 32 nýjar fastar vararafstöðvar, rafgeymum bætt við á tíu lykilskiptistöðvum fjarskipta, tenglar fyrir færanlegar rafstöðvar settir upp á 26 stöðum, ljósleiðaratengingum fjölgað og ýmsar endurbætur gerðar á öðrum stöðum.

Vinna við annan áfanga er að hefjast og þá er stefnt á sambærilegar úrbætur á Suðurlandi, Vesturlandi og suðvesturhorninu. Þó hefur þegar tekist gera ýmsar úrbætur á Vestur- og Suðurlandi í tengslum við fyrri áfangann en þeirri vinnu verður haldið áfram.

Færanlegum rafstöðvum verður komið fyrir hjá björgunarsveitum sem eru best til þess fallnar að nýta þær þegar neyðarástand skapast.