Katrín Jakobsdóttir, forsætisráðherra, afhenti Páli Melsted, prófessor við iðnaðarverkfræði, vélaverkfræði og tölvunarfræðideild Háskóla Íslands, Hvatningarverðlaun Vísinda- og tækniráðs fyrir árið 2018 í dag á Rannsóknarþingi. Umfjöllunarefnið á Rannsóknarþinginu var markáætlun um öndvegissetur og klasa 2009-2015 og tók forsætisráðherra þátt í pallborðsumræðum um forgangsröðun í vísindum.
Hvatningarverðlaunin eru veitt þeim vísindamanni sem snemma á ferlinum þykir hafa skarað framúr og skapað væntingar um framlag í vísindastarfi er treysti stoðir mannlífs á Íslandi.
