Urriðakotshraun friðlýst sem fólkvangur

Guðlaugur Þór Þórðarson, umhverfis-, orku- og loftslagsráðherra, undirritaði í dag friðlýsingu Urriðakotshrauns sem fólkvangs. Friðlýsingin er staðfest að beiðni Garðabæjar og landeigendanna, Styrktar- og líknarsjóðs Oddfellowa, og unnin í samstarfi ráðuneytisins og Umhverfisstofnunar.

Friðlýsingu svæðisins sem fólkvangs er ætlað að tryggja aðgengi almennings að náttúru Urriðakotshrauns, sem býr yfir fjölbreyttum náttúru- og menningarminjum og miklum möguleikum til útivistar, náttúruskoðunar og umhverfisfræðslu, m.a. um göngu- og reiðstíga sem liggja um svæðið. 

Urriðakotshraun er hluti af Búrfellshrauni sem rann fyrir um 8100 árum og er þar nokkuð um hraunhella. Markmið friðlýsingarinnar er einnig að vernda jarð- og hraunmyndanir sem og menningarminjar Urriðakotshrauns, sem eru fágætar á heimsvísu, sem og náttúrulegt gróðurfar svæðisins. 

Hið friðlýsta svæði er 1,05 km2 að stærð, en samhliða vinnu við friðlýsingu var unnið deiliskipulag fyrir svæðið sem nú hefur verið staðfest og auglýst af Skipulagsstofnun. Deiliskipulagið gerir ráð fyrir að í náinni framtíð verði lögð golfbraut sem er hluti af golfvellinum Urriðavelli innan fólkvangsins.

Fólkvangurinn í Urriðakotshrauni er mikilvægur hlekkur í röð friðlýstra svæða sem nær frá upplandi Garðabæjar nær óslitið til sjávar. Svæðin sem um er að ræða eru: Reykjanesfólkvangur (friðlýst 1975), Búrfell (friðlýst 2020), Garðahraun efra og neðra, Vífilsstaðahraun og Maríuhellar (friðlýst 2021), Gálgahraun (friðlýst 2009) og innan marka Garðabæjar (friðlýst 2009) og Bessastaðanes (friðlýst 2023) og nú bætist Urriðakotshraun við net verndarsvæða Garðabæjar.

Guðlaugur Þór Þórðarson, umhverfis-, orku- og loftslagsráðherra, undirritar friðlýsingu Urriðakotshrauns að viðstöddum fulltrúum Oddfellow.

Guðlaugur Þór Þórðarson, umhverfis-, orku- og loftslagsráðherra: „Það er mér ánægjuefni að tryggja aðgengi almennings að náttúru Urriðakotshrauns með friðlýsingu svæðisins sem fólkvangs. Með friðlýsingunni nú hefur orðið til samfella í friðlýstum svæðum innan Garðabæjar sem sýnir heildarhugsun og metnað sveitarfélagsins í þessum málum. Almenningur á að hafa aðgengi að náttúruperlum okkar og við þurfum ekki alltaf að leita fjarri heimabyggð. Fleiri sveitarfélög á höfuðborgarsvæðinu mættu taka sér framtak Garðabæjar til fyrirmyndar þegar kemur að verndun grænna svæða á höfuðborgarsvæðinu.“

Urriðakotshraun. Ljósmynd Árni Geirsson Alta ráðgjöf.

Viðstödd friðlýsinguna voru, auk ráðherra og bæjarstjóra og landeigenda, fulltrúar og starfsmenn Garðabæjar, ráðuneytisins og Umhverfisstofnunar.

Samstarfshópurinn sem vann að friðlýsingunni. Í hópinum voru fulltrúar Styrktar- og líknarsjóðs Oddfellowa, Umhverfisstofnunar, Garðabæjar og Skógræktarfélags Reykjavíkur. Ljósmynd Þórdís Björt/Umhverfissstofnun.