Hoppa yfir valmynd

Haus fyrir smærri skjái

Merki Stjórnarráðs Íslands Stjórnarráð Íslands
13. október 2023 Utanríkisráðuneytið

Föstudagspóstur 13. október 2023

Heil og sæl, 

Þessi vika hefur ekki verið tíðindalítil, svo ekki sé fastar að orði kveðið. Stormasamar sviptingar á alþjóðasviðinu og í okkar eigin ríkisstjórn settu svip sinn á dagana og meira að segja veðrið tók skarpa stefnu, lóðbeint í vetrargír.

Þórdís Kolbrún Reykfjörð Gylfadóttir utanríkisráðherra hóf vikuna á fordæmingu á hryðjuverkum Hamasliða í Ísrael og tók þar undir raddir kollega sinna víðsvegar um heim. Lýsti ráðherra yfir sorg vegna voðaverkanna og hvatti til þess að vítahring ofbeldis á svæðinu myndi linna. 

Svo var hafist handa við að koma Íslendingum sem stödd voru í Ísrael heim með sem skjótustum hætti. Icelandir lagði til flugvél sem upprunalega stóð til að flygi til Tel Aviv en vegna öryggissjónarmiða lenti á endanum í Amman í Jórdaníu, þangað sem strandaglóparnir gátu ferðast með rútum. Vélin tók á loft frá Jórdaníu 9. október, tæpum tveimur sólarhringum eftir að árásin átti sér stað. Í vélinni voru 126 Íslendingar ásamt 5 Færeyingum, 4 Norðmönnum, flugáhöfn og fulltrúa frá utanríkisráðuneytinu. Þar að auki var í vélinni 12 manna hópur þýskra skólabarn. Kunnu þýsk stjórnvöld Íslandi góðar þakkir fyrir björgunina. 

Á þriðjudag hófst árleg Friðarráðstefna sem þetta árið fjallaði um norræna samstöðu um frið. Aðstoðarframkvæmdastjóri Sameinuðu þjóðanna, Amina J. Mohammed, ávarpaði gesti og tók þátt í pallborðsumræðum við upphaf ráðstefnunnar. Hún var ánægð með heimsóknina en auk þess að taka þátt í ráðstefnunni átti hún fundi með utanríkisráðherra, utanríkismálanefnd alþingis, forseta Íslands, forsætisráðherra og ungliðum.

Utanríkisráðherra ávarpaði að sjálfsögðu ráðstefnuna og minnti enn á mikilvægi þess að alþjóðalög væru virt

Sama ákall mátti finna í yfirlýsingu Catherine Russel, framkvæmdastjóra UNICEF, einnar helstu samstarfsstofnunar Íslands í þróunarmálum, sem í yfirlýsingu sinni fordæmir alvarleg brot sem eru framin á börnum í Ísrael og á Gaza svæðinu um þessar mundir og ítrekaði mikilvægi þess að farið sé að alþjóðalögum og að mannúðarstofnanir fái að sinna sínu starfi og hafi öruggt aðgengi til að koma hjálpargögnum á rétta staði. Yfirlýsinguna má finna á Heimsljósi, fréttaveitu okkar um mannúðar- og þróunarmál.  

Í lok vikunnar fór ráðherra ásamt fríðu föruneyti til Svíþjóðar á fund leiðtoga ríkja Sameiginlegu viðbragssveitarinnar. Í leiðinni hitti hún forstöðumann sænsks ígildis Íslandsstofu

og átti tvíhliðafund með utanríkisráðherra Svíþjóðar Tobias Billström.

Þá hitti ráðherra á dögunum hagsmunaaðila í viðskiptum, ferðaþjónustu, menningu og háskólasamstarfi með sterk tengsl við Pólland. Fundurinn var skipulagður af sendiráði Íslands í Póllandi.

Hefjum yfirferð yfir líf og störf á sendiskrifstofunum í Vínarborg. Helga Hauksdóttir afhenti forseta Austurríkis, dr. Alexander van der Bellen trúnaðarbréf sitt.

Sendiherra Íslands í Berlín María Erla Marelsdóttir fundaði með forsætisráðherra sambandslandsins Brandenborg, Dr. Dietmar Woidke í Potsdam þar sem þau ræddu samstarf Íslands og Brandenborgar á ýmsum sviðum m.a. jarðhita, vísinda og menningar. Einnig heimsótti hún orkuveitu Potsdam og fundaði með framkvæmdastjóra orku- og vatnsveitukerfa borgarinnar Christiane Preuss, og ræddu þær saman um jarðhitaverkefni í borginni og aframhaldandi samstarf á því sviði. 

Íslenski píanóleikarinn Víkingur Heiðar fékk afhent Opus Classic verðlaunin sem besti hljóðfæraleikari ársins á verðlaunaathöfn í Berlín núna á sunnudaginn var. Sendiráðunautur sendiráðsins í Berlín Ágúst Már Águstsson var viðstaddur athöfnina. 

Harald Aspelund sendiherra Íslands í Finnlandi, sem jafnframt hefur Eistland í umdæmi sínu, sótti hádegisverðarfund utanríkisráðherra Eistlands þar sem tilkynnt var um tilnefningu Eista hvað varðar kjör í Alþjóðlega sakamáladómstólinn.

Okkar fólk í Helsinki hefur haft í nógu að snúast. Á laugardag hittu sendiherrahjónin Hernán Rojas, hljóðtæknimanninn, útvarpsmanninn og framleiðandann, sem hefur á undanförnum árum rannsakað hvernig tónlist getur aukið vitund fólks um sjálfbæra þróun. 

Þá opnuðu þau tvær listasýningar í gær

Sendiráðið þakkaði svo kjörræðismönnum Íslands í Finnlandi, Eistlandi, Lettlandi og Litáen fyrir komuna en þeir funduðu í sendiráðinu í dag um málefni líðandi stundar og verkefni kjörræðismanna.

Í Kaupmannahöfn sótti Áslaug Arna Sigurbjörnsdóttir háskóla-, iðnaðar- og nýsköpunarráðherra norrænan ráðherrafund um sjálfbæran hagvöxt sem haldinn var á Norðurbryggju í Kaupmannahöfn. 

Árni Þór Sigurðsson sendiherra hitti svo fulltrúa Íslands á ársfundi þings Atlantshafsbandalagsins sem fór fram í Kaupmannahöfn.

Í London var sett upp ljósmyndasýning Ásgeirs Péturssonar í sendiráðinu.

Jörundur Valtýsson fastafulltrúi Íslands hjá Sameinuðu þjóðunum hélt ræðu um gervigreind á vettvangi fyrstu nefndar Sameinuðu þjóðanna.

Í París var Orradóttir Ramette, sendiherra, var viðstödd opnun sýningar listakonunnar Örnu Gnáar Gunnarsdóttur.

Bergdís Ellertsdóttir sendiherra Íslands í Washington hitti þingmanninn Eric Swalwell og átti með honum hugvekjandi fund, meðal annars um samstarf Íslands og Bandaríkjanna á sviði viðskipta og varnarmála.

Sendiráðið í Washington fékk jafnframt heimsókn frá nemendum í Fjölbrautarskólanum í Garðabæ. Starfsmenn sendiráðsins gáfu kynningu um helstu verkefni, áherslur og nýlega hápunkta í starfi og boðið var upp á kaffi og kleinuhringi. Skemmtilegar umræður sköpuðust í kjölfarið. 

Eric Carlson, nýr Senior Arctic Official hjá Bandaríska utanríkisráðuneytinu kíkti líka í sendiráðið og ræddi við Bergdísi Ellertsdóttur sendiherra um þátttöku sína á Hringborði norðurslóða í Reykjavík í næstu viku.  

Og bandarísku öldungadeildarþingmennirnir og Íslandsvinirnir Lisa Murkowski (R-Alaska) og Angus King (I-Maine), sem eru í norðurslóðanefndar öldungadeildarinnar, lögðu fram frumvarpið “Nordic Trader and Investor Parity act“. Markmið frumvarpsins er að gera íslenskum fjárfestum auðveldara fyrir að fara á milli Íslands og Bandaríkjanna í því skyni að eiga viðskipti þar í landi. 

Hér er hægt að sjá frumvarpið sjálft. 

Í Tókýó voru gagnaver á dagskrá á viðburði í sendiráði Íslands.

Ragnar Þorvarðarson sendiráðunautur hjá sendiráði Íslands í Tókýó hélt til Kyoto þar sem hann sinnti málsvarastarfi á sviði kynjajafnréttis sem er eitt af lykiláherslumálum í utanríkisstefnu Íslands

Þórir Ibsen sendiherra Íslands í Peking stýrði samtali við vísindamenn um það hvernig karlmenn geti stutt betur við konur í vísindum og rannsóknum, á ráðstefnu á vegum UNDP í Shaozing sem haldin var í tengslum við 2023 World Women Scientist Conference 

Degi evrópskra tungumála var fagnað í Bachów í Póllandi líkt og sendiráð okkar í Varsjá vakti athygli á.

Degi stúlkubarnsins var jafnframt fagnað víða á sendiskrifstofum okkar.

Íslenska heimildamyndin Hækkum rána var sýnd í Brussel í tilefni af degi stúlkubarnsins. Kristján Andri Stefánsson bauð gesti velkomna og talaði um mikilvægi þess að halda áfram baráttunni í átt að jafnrétti. "Þegar konur væru ekki aðilar að vinnumarkaðnum til jafns við karla værum við aðeins að spila með helming liðsins inni á vellinum," segir m.a. í færslu sendiráðs okkar í Brussel á Facebook.

Í London, þar sem Ísland tók ásamt fleiri sendiráðum þátt í verkefninu Ambassador for a Day: 

Í Úganda, þar sem jafnframt var haldið upp á 25 ára afmæli almennrar grunnmentunar:

Og í Malaví: 

Við ljúkum þessum föstudagspósti á fréttum af árlegri skýrslu Mannfjöldstofnunar Sameinuðu þjóðanna (UNFPA) sem var í vikunni í fyrsta sinn formlega gefin út og kynnt á Íslandi. Athöfnin fór fram í Kvennaskólanum í Reykjavík í fullum sal af nemendum í kynjafræði sem spurðu fjölmargra hugvekjandi spurninga í kjölfar kynningar á skýrslunni. 

Óskum ykkur góðrar helgar! 

Upplýsingadeild

Efnisorð

Föstudagspóstur

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Ef um er að ræða áríðandi erindi til borgaraþjónustu utanríkisráðuneytisins þá skal senda póst á [email protected]

Upplýsingar um netföng, símanúmer og staðsetningu ráðuneyta