Mál nr. 32/2018 Úrskurður 22. maí 2018

Mál nr. 32/2018                    Eiginnafn:     Sigríður (kk.)

Hinn 22. maí 2018 kveður mannanafnanefnd upp svohljóðandi úrskurð í máli 32/2018 en erindið barst nefndinni 14. maí.

Til þess að heimilt sé að samþykkja nýtt eiginnafn þurfa öll skilyrði 5. gr. laga nr. 45/1996 um mannanöfn að vera uppfyllt. Skilyrðin eru:

• Eiginnafn skal geta tekið íslenska eignarfallsendingu eða hafa unnið sér hefð í íslensku máli.

• Nafnið má ekki brjóta í bág við íslenskt málkerfi.

• Það skal ritað í samræmi við almennar ritreglur íslensks máls nema hefð sé fyrir öðrum rithætti þess.

• Stúlku skal gefa kvenmannsnafn og dreng skal gefa karlmannsnafn.

• Eiginnafn má ekki vera þannig að það geti orðið nafnbera til ama.

Eiginnafnið Sigríður er skráð á mannanafnaskrá sem kvenmannsnafn. Með vísan til 2. mgr. 5. gr. laga um mannanöfn er því ekki hægt að samþykkja það sem karlmannsnafn.

Úrskurðarorð:

Beiðni um eiginnafnið Sigríður (kk.) er hafnað.