Styrkir veittir til verkefna og rannsókna á sviði velferðartækni

Eygló Harðardóttir, félags- og húsnæðismálaráðherra, veitti nýverið fjóra styrki til verkefna á sviði nýsköpunar og tækni í velferðarþjónustu, samtals 4,5 milljónir króna. Styrkirnir eru veittir á grundvelli stefnumörkunar og framkvæmdaáætlunar á sviði velferðartækni sem unnið var að á síðasta ári. Tilgangurinn er að stuðla að nýsköpun og frumkvöðlahugsun þar sem leitað er nýrra leiða til að auka lífsgæði notenda velferðarþjónustunnar í nútíð og framtíð.

Samstarfsverkefni á vegum velferðarsviðs Reykjavíkurborgar og búsetudeildar Akureyrarkaupstaðar og Öldrunarheimila Akureyrar fær þriggja milljóna króna styrk. Verkefnið er þríþætt og greinist í nokkur verkefni sem eru í fyrsta lagi á sviði stefnumörkunar og samstarfs, í öðru lagi vegna innleiðingar og prófunar á búnaði sem tengist velferðartækni og í þriðja lagi til að vinna úttektir, mat og rannsóknir á þeim verkefnum sem styrkurinn tekur til.

Þrír styrkir, hver um sig að fjárhæð 500.000 kr. voru veittir til námsmanna í framhaldsnámi á háskólastigi. Kolbeinn Aðalsteinsson, nemi í opinberri stjórnsýslu, hlaut styrk til að vinna rannsókn á viðhorfum og reynslu notenda til rafrænnar skráningar í heimaþjónustu

María Guðnadóttir lýðheilsufræðingur hlaut styrk til að vinna yfirlitsrannsókn um kosti og áhrif yfirbyggðra útivistarsvæða (ylgarða) á lífsgæði eldra fólks á hjúkrunarheimilum.

Vigdís Vala Valgeirsdóttir nemi við heilbrigðisvísindasvið Háskóla Íslands, hlaut styrk til að við vinna að þróun og prófun á stoðbúnaði fyrir sjónskerta og blinda (The Sound of Vision) til að skynja og ferðast um umhverfi sitt á öruggan hátt.