Greiðsluafkoma ríkissjóðs janúar-apríl 2008

• Greiðsluafkoma ríkissjóðs janúar-apríl 2008 (PDF 61K)

Greiðsluuppgjör ríkissjóðs fyrir fyrsta þriðjung ársins 2008 liggur nú fyrir. Samkvæmt uppgjörinu er breyting á handbæru fé frá rekstri jákvæð um 28,4 ma.kr. innan ársins, sem er 2,5 milljörðum lakari útkoma heldur en á sama tíma í fyrra. Tekjur reyndust 11,5 milljörðum meiri en í fyrra á meðan gjöldin jukust um tæpa 10 milljarða. Hreinn lánsfjárjöfnuður er jákvæður um 26 ma.kr., sem er 24,5 milljörðum hagstæðari útkoma en á sama tíma í fyrra.

Sjóðstreymi ríkissjóðs janúar–apríl 2004-2008

Innheimtar tekjur ríkissjóðs námu 161 ma.kr. á fyrsta þriðjungi ársins sem er 8% aukning frá sama tíma árið 2007. Þar af námu skatttekjur og tryggingagjöld 148 ma.kr. og jukust um 7% að nafnvirði á milli ára. Á sama tíma hefur almennt verðlag hækkað um 5,8% (VNV án húsnæðis) og skatttekjur og tryggingagjöld hafa því aukist um 1,1% að raunvirði. Aðrar rekstrartekjur námu rúmlega 10,5 ma.kr. og jukust um 10,5% frá sama tímabili í fyrra, en sá liður samanstendur að mestu af vaxtatekjum og tekjum af sölu vöru og þjónustu. Þá var eignasala ríkissjóðs um 2 ma.kr. á fyrstu fjórum mánuðum ársins.

Skattar á tekjur og hagnað námu 65 ma.kr. sem er aukning um 11,1% frá sama tíma árið áður. Þar af nam tekjuskattur einstaklinga 31 ma.kr. (aukning um 3,5%), tekjuskattur lögaðila 8 ma.kr. (aukning um 2,1%) og fjármagnstekjuskattur 26 ma.kr. (aukning um 25,5%). Innheimta eignarskatta nam 3 ma.kr. sem er samdráttur upp á 17,8% á milli ára. Stimpilgjöld, sem eru um 80% eignarskattanna, drógust saman um 15,4% á tímabilinu.

Innheimta almennra veltuskatta gefur ágæta mynd af þróun innlendrar eftirspurnar. Hún nam 64 ma.kr. á fyrstu fjórum mánuðum ársins og jókst um 3,7% að nafnvirði frá sama tíma árið áður en dróst hins vegar saman um 2% að raunvirði (miðað við hækkun vísitölu neysluverðs án húsnæðis). Þegar horft er á 6 mánaða hlaupandi meðaltal fer raunvöxtur veltuskatta minnkandi og var nú 2,1% á milli ára. Stærsti hluti veltuskattanna er virðisaukaskattur og skilaði hann ríkissjóði um 45 ma.kr. á fyrsta þriðjungi ársins sem er nánast sama fjárhæð og hann skilaði á tímabilinu janúar-apríl 2007. Þar af skilaði hann tæplega 10 ma.kr. fyrir aprílmánuð 2008 sem er lítillega hærri fjárhæð en í mánuðinum á undan. Ef litið er til tímabilsins frá ársbyrjun, er raunlækkun virðisaukaskatts 4,8% á milli ára. Aðrir veltuskattar námu 19 ma.kr. á tímabilinu, um 2 ma.kr. meira en í fyrra. Þá námu tollar 2 ma.kr. og tryggingagjöld tæpum 14 ma.kr. sem er aukning um annars vegar 35,6% og hins vegar 4,9% á milli ára.

Greidd gjöld nema 125,2 ma.kr. og hækka um tæpa 10 milljarða frá fyrra ári, eða um 8,6%. Mest hækka geiðslur til almannatrygginga og velferðarmála, um 2,1 ma.kr. eða 7,7% og til almennrar opinberrar þjónustu, um 2 ma.kr. eða 13,2%. Hlutfallslega er mest hækkun til varnarmála, en Ratsjárstofnun kemur sem ný stofnun undir þennan lið á þessu ári. Óregluleg útgjöld hækka um 29,7% og munar mest um gjaldfærslu fjármagnstekjuskatts sem er um 800 m.kr. meiri en á sama tíma í fyrra. Liðurinn löggæsla, réttargæsla og öryggismál hækka um 19,7% en þar munar mestu um hækkun á liðnum Landhelgissjóður vegna smíði varðskips.

Lánsfjárjöfnuður ríkissjóðs er jákvæður um 23,9 ma.kr. eftir fyrsta ársþriðjung en lánsfjárþörfin var 31,9 milljarðar á sama tíma í fyrra. Hreinn lánsfjárjöfnuður nam 26 ma.kr. fyrstu fjóra mánuði ársins, en var jákvæður um tæpa 1,5 ma.kr. fyrir sama tímabil á síðasta ári.

Tekjur ríkissjóðs janúar-apríl 2006-2008

Gjöld ríkissjóðs janúar–apríl 2006-2008