190 milljóna aukafjárveiting í viðhald heilbrigðis- og heilsugæslustofnana

190 milljónir króna af 500 milljóna aukafjárveitingu ríkissjóðs til viðhalds og endurbóta opinberra fasteigna í sumar verða nýttar í viðhald heilbrigðis- og heilsugæslustofnana.

Alls verða 90 milljónir króna lagðar í viðhald á eignum Landspítala og 40 milljónir króna verða nýttar til endurbóta á húsnæði Heilsugæslu höfuðborgarsvæðisins.

Þá renna 60 milljónir króna til viðhalds og endurbóta á Sjúkrahúsinu á Akureyri og á Kristnesspítala.

Alls fer rúmur milljarður króna í viðhald og endurbætur á heilbrigðisstofnunum á öllu landinu í ár. Aukafjárveitingin nú þýðir verulega viðbót til viðhalds fasteigna á þeim stöðum sem hún rennur til og ljóst að hún kemur í mjög góðar þarfir.

Aukafjárveitingunni er ætlað að stuðla að atvinnusköpun í byggingariðnaði. Verkefnin eru valin með það í huga að hægt verði að vinna þau í sumar.