Land og skógur tók á móti matvælaráðherra
DLÁgúst Sigurðsson, forstöðumaður Lands og skógar, tók ásamt sérfræðingum stofnunarinnar á móti Bjarkeyju Olsen Gunnarsdóttur í Gunnarsholti nýverið á ferð ráðherra um Suðurland.
Í heimsókn sinni fékk ráðherra kynningu á starfsemi og sögu stofnunarinnar en Land og skógur varð til 1, janúar sl. við sameiningu stofnana Landgræðslunnar og Skógræktarinnar.
Land og skógur er þekkingarstofnun á sviði gróður- og jarðvegsauðlinda og gegnir mikilvægu rannsókna-, eftirlits-, og fræðsluhlutverki við að vernda, endurheimta og bæta þessar auðlindir Íslands og stuðla að sjálfbærri nýtingu þeirra. Meginmarkmið stofnunarinnar eru þannig að bæta gróður- og jarðvegsauðlindir þjóðarinnar, vakta landnýtingu, stuðla að bindingu kolefnis og virkja og fræða almenning og hagsmunaaðila um gróður- og jarðvegsvernd, sjálfbæra nýtingu lands, uppbyggingu og endurheimt vistkerfa, skóga og skógrækt.
Starfsemin byggist á margvíslegu innlendu og alþjóðlegu samstarfi og hefur víðtæk tengsl við ýmsar stefnur, áætlanir og alþjóðlegar skuldbindingar þjóðarinnar einkum á sviði líffræðilegrar fjölbreytni og loftslagsmála. Stofnunin starfar í samræmi við hina opinberu stefnu og framtíðarsýn í landgræðslu og skógrækt - Land og líf, landgræðsluáætlun og landsáætlun í skógrækt. Stofnunin rekur 18 starfstöðvar víðsvegar um landið og hefur umsjón með þjóðskógum, löndum og landgræðslusvæðum.
„Sjálfbær uppbygging og nýting lands er eitt stærstu málum okkar samtíma“, sagði matvælaráðherra. „Öflug þekkingarstofnun á borð við Land og skóg spilar lykilhlutverk til að við megum skila landinu í sem bestu ástandi til komandi kynslóða“