COVID-19: Heilbrigðisstofnanir taka á móti 30 sjúklingum til að létta álagi af LSH

Stefnt er að því að flytja hátt í 30 sjúklinga frá Landspítala á aðrar heilbrigðisstofnanir víðsvegar um landið til að bregðast við erfiðum aðstæðum á spítalanum vegna Covid. Skortur er á legurýmum auk þess sem hátt í 200 starfsmenn sjúkrahússins eru frá vinnu, ýmist smitaðir af Covid eða í sóttkví.

Heilbrigðisráðuneytið, Sjúkratryggingar Íslands og forstjórar heilbrigðisstofnana um allt land hafa átt í nánu samstarfi undanfarið til að skapa aðstæður sem gera kleift að taka við sjúklingum frá Landspítala. Samstarfið hefur leitt til þess að nú eru samtals um 30 rými til reiðu á heilbrigðisstofnunum þar sem tekið verður á móti sjúklingum frá Landspítala sem eru færir um flutning þótt útskrift sé ekki tímabær. Sjúklingar verða fluttir á þær heilbrigðisstofnanir sem best henta hverjum og einum miðað við þarfir sjúklinganna og þjónustunnar sem í boði er á hverjum stað. Meðal annars eru 11 rými á endurhæfingarmiðstöðinni Reykjalundi.

„Það er einstakt að verða vitni að því hvað stjórnendur allra þeirra stofnana sem hlut eiga að máli hafa unnið hratt og vel og sýnt fyrirhyggju og einbeittan vilja til að leysa þann vanda sem nú steðjar að Landspítala og fyrir það er ég þakklátur“ segir Willum Þór Þórsson heilbrigðisráðherra.