Morgunverðarfundur um hollar matvörur

Heilbrigðis-og tryggingamálaráðuneytið, Lýðheilsustöð og Samtök iðnaðarins efna til sameiginlegs morgunverðarfundar næstkomandi miðvikudag 28. mars undir yfirskriftinni “Samstarf um aukið framboð á hollum matvörum – markaðssetning, vöruþróun og skammtastærðir”. Fundurinn sem haldinn verður á hótel Nordica hefst kl. 8:30 með ávarpi Sivjar Friðleifsdóttur heilbrigðis- og tryggingamálaráðherra.

Á fundinum mun Anna Elísabet Ólafsdóttir, forstjóri Lýðheilsustöðvar, fjalla um stóra skammta og ný viðmið og Ragnheiður Héðinsdóttir, matvælafræðingur hjá Samtökum iðnaðarins ræðir um stefnu matvælaiðnaðarins í vöruþróun. Þá mun Friðrik Larsen matvælafræðingur og lektor við Háskólann í Reykjavík velta fyrir sér hvort það sé árangursríkara að markaðssetja óhollar matvörur og Stefán Jóhannsson gæðastjóri hjá Subway á Íslandi fjallar um hvað skyndibitastaðirnir geta gert til að bæta framboð á hollum mat. Að loknum erindum framsögumanna verða pallborðsumræður með þátttöku fulltrúa heilbrigðis- og tryggingamálaráðuneytis, Lýðheilsustöðvar, Samtaka iðnaðarins, Matvæla- og næringafræðafélags Íslands og Háskólans í Reykjavík. Skráning á fundinn fer fram á vef Lýðheilsustöðvar og lýkur henni á þriðjudag 27. mars.

Dagskrá fundarins (pdf 3,46MB)