28. mars 2025 Umhverfis-٫ orku- og loftslagsráðuneytið

Boðað til samráðsfunda um málefni lífríkis á landi og lífríkis í sjó og ferskvatni

Lundi með síli. - mynd — Lundi með síli.

Stýrihópur um stefnumótunarvinnu um líffræðilega fjölbreytni boðar til samráðsfunda um málefni lífríkis á landi og lífríkis í sjó og ferskvatni. Húsfyllir var á fundi sem umhverfis-, orku- og loftslagsráðuneytið hélt nýlega til kynningar á vinnu stýrihópsins. Stýrihópurinn leitar nú eftir áliti og ábendingum frá almenningi og boðar því til tveggja samráðsfunda sem framhald þeirrar vinnu.

Fjarfundur um málefni lífríkis á landi verður miðvikudaginn 2. apríl kl. 13:00 og fjarfundur um málefni lífríkis í sjó og í ferskvatni verður haldinn miðvikudaginn 9. apríl kl. 13. Hlekki á fundina er að finna hér fyrir neðan.

Fundirnir eru opinn vettvangur fyrir áhugasama til að koma sjónarmiðum sínum á framfæri og verður þar rætt um hver séu brýnustu viðfangsefnin er varða líffræðilega fjölbreytni.

Meðal málefna sem óskað er ábendinga um er:

Tegundavernd
Endurheimt raskaðra vistkerfa á landi, í hafi og í ferskvatni
Friðun og svæðisbundna verndun á landi og í hafi
Sjálfbær notkun á auðlindum og veiðimálum
Framandi ágengar tegundir
Staða rannsókna og vöktunar á Íslandi
Eyðing búsvæða á Íslandi
Sjálfbæra landnotkun
Áhrif mengunar og loftslagsbreytinga á lífríki
og annað tengt líffræðilegri fjölbreytni

Sérstaklega er óskað eftir ábendingum frá þeim sem búa yfir sérþekkingu og/eða vinna í tengdum greinum, m.a. frá náttúruvísindafólki og öðrum sérfræðingum, sem og fólki sem vinnur í atvinnugreinum þar sem líffræðileg fjölbreytni skiptir höfuðmáli s.s.. landbúnaði, fiskveiði og fiskeldi, skógrækt og landgræðslu.

Á fundunum verður m.a. rætt um hver séu brýnustu viðfangsefnin er varða líffræðilega fjölbreytni. Tekin verða fyrir ýmis málefni t.a.m. landnotkun, tegundavernd, endurheimt vistkerfa, friðun og svæðisbundna verndun, sjálfbæra nýtingu auðlinda, stöðu rannsókna og vöktunar, áhrif mengunar og loftslagsbreytinga, framandi ágengar tegundir og fleira sem tengist líffræðilegri fjölbreytni.

Gert er ráð fyrir að hvor fundur taki um í eina og hálfa klukkustund. Öll eru velkomin til að taka þátt á fundinum..