Skoðanakönnun um nafnabreytingar á Farsýslu og Vegagerð
Ögmundur Jónasson innanríkisráðherra heimsótti í dag samgöngustofnanir og ræddi við starfsmenn um tillögur um nafnabreytingar á hinum nýju stofnunum sem taka eiga til starfa 1. júlí, þ.e. Farsýslunni og Vegagerðinni. Efnt verður til skoðanakönnunar meðal allra starfsmanna og niðurstöður lagðar fyrir Alþingi til ákvörðunar.
Samgöngustofnanirnar eru Flugmálastjórn Íslands, Siglingastofnun Íslands, Umferðarstofa og Vegagerðin. Starfsmenn færast annars vegar til stjórnsýslustofnunar sem í lögum um hina nýju stofnun fékk nafnið Farsýslan og hins vegar til framkvæmdastofnunar sem hlotið hefur heitið Vegagerðin. Innanríkisráðherra bárust fyrir nokkru undirskriftir frá nokkrum hópi starfsmanna þar sem farið var fram á endurskoðun á nafninu Farsýslan og í framhaldi af því ákvað ráðherra að efna til skoðanakönnunar á nafnabreytingu og gefa þá væntanlegum starfsmönnum beggja stofnananna kost á að tjá sig í henni.
Greiða á atkvæði um nokkur nöfn hvorrar stofnunar og greiða starfsmenn atkvæði um þá stofnun sem þeir koma til með að starfa hjá.
Tillögur um nafn stjórnsýslustofnunar eru
- Farsýslan
- Samgöngustofa
- Samgöngustofnun
Tillögur um nafn framkvæmdastofnunar eru:
- Samgöngustofnun Íslands
- Vegagerðin
Könnunin stendur yfir frá hádegi í dag og til hádegis næstkomandi mánudag. Innanríkisráðherra mun í framhaldinu leggja niðurstöðurnar fyrir Alþingi og munu þær fylgja öðrum lagabreytingartillögum sem afgreiða þarf í tengslum við tilurð hinna nýju stofnana.
