Guðni Bragason sendiherra afhendir trúnaðarbréf á Indlandi

Guðni Bragason afhenti hinn 22. september Ram Nath Kovind forseta Indlands trúnaðarbréf sem sendiherra á Indlandi. Athöfnin fór fram með fjarfundi. Sendiherra færði forseta Indlands bestu kveðjur Guðna Th. Jóhannessonar forseta Íslands og þakkir forsetahjóna fyrir ánægjulega heimsókn indversku forsetahjónanna til Íslands í september 2019.

Sendiherra minntist á að á næsta ári verða fimmtíu ár liðin frá því Ísland og Indland tóku upp stjórnmálasamband árið 1972 og hvatti til að þess yrði minnst með veglegum hætti. Afmælið gæfi gott tilefni til að undirstrika þau málefni og hugsjónir sem þjóðirnar deildu, eins og áherslu á öryggi, lýðræði og mannréttindi, sjálfbæra þróun og nýtingu náttúruauðlinda og markaðshagkerfi, og minnast hinna góðu samskipta með menningarviðburðum. Indland og Ísland hefðu staðið frammi fyrir miklum áskorunum síðustu mánuði vegna COVID-19 faraldursins og sýndi það styrk samfélaga ríkjanna að þau hefðu sigrast á þeim. Alls afhentu fimm sendiherrar trúnaðarbréf við þetta tækifæri.

Sendiráð Íslands í Nýju-Delhí, sem sett var á laggirnar árið 2006, sinnir hagsmunum Íslands á sviði stjórnmála, viðskipta, menningar og borgaraþjónustu. Samskipti ríkjanna síðustu ár hafa verið blómleg og eins og nærri má geta eru nær ótakmarkaðir möguleikar fyrir hendi í samskiptum Íslendinga við þetta fjölmennasta lýðræðisríki í heimi. Indland hefur starfrækt sendiráð í Reykjavík síðan 2008.