Hoppa yfir valmynd

Haus fyrir smærri skjái

Merki Stjórnarráðs Íslands Stjórnarráð Íslands
9. desember 2022 Utanríkisráðuneytið

Föstudagspósturinn 9. desember 2022

Heil og sæl.

Þórdís Kolbrún Reykfjörð Gylfadóttir utanríkisráðherra er í fyrstu vinnuheimsókn sinni til samstarfsríkis í þróunarsamvinnu til þess að kynnast aðstæðum í Malaví og sjá árangur verkefna sem njóta stuðnings íslenskra stjórnvalda. 

Þar hefur ráðherra haft í nógu að snúast.

Á mánudag var komið að því að endurnýja samstarfssamning Íslands og Malaví á tvíhliða fundi með Nancy Tembo utanríkisráðherra Malaví.

Á þriðjudag var byggðaþróunarverkefni héraðsstjórnar Nkhotakota héraðs og íslenskra stjórnvalda gegnum sendiráð Íslands í Lilongve formlega ýtt úr vör á skólalóð grunnskóla í héraðinu.

Á miðvikudag var formlega tekin í notkun ný miðstöð og skurðstofa við héraðssjúkrahúsið í Mangochi í Malaví þar sem boðið er upp heildstæðan stuðning við konur og stúlkur sem þjást af fæðingarfistli og/eða hafa orðið fyrir kynferðisofbeldi.

Miðstöðin nefndist „Lilja’s Fistula and One Stop Centre“ til minningar um Lilju Dóru Kolbeinsdóttur sem lést úr leghálskrabbameini fyrir tveimur árum. Hún var ötull talsmaður kynjajafnréttis og kynheilbrigðis og helgaði stærstan hluta ævi sinnar þróunarstarfi í Afríku, meðal annars sem forstöðumaður sendiráðs Íslands í Malaví.

Í dag var tilkynnt um nýtt samstarfsverkefni í Malaví um sólarknúið rafmagn í samstarfshéruðunum Mangochi og Nkhotakota.

Í dag heimsótti Þórdís Kolbrún sömuleiðis Kankhande skólann í Mangochi héraði og kynnti sér verkefni Íslands, í samstarfi við Matvælaáætlun Sameinuðu þjóðanna, WFP, um næringaríkar heimaræktaðar skólamáltíðir fyrir grunnskólanemendur í Malaví. Fyrir réttum tíu árum var samstarfið innsiglað með hátíð í téðum skóla.

Hvað starfsemi ráðuneytisins varðar fór fram tvíhliða samráð Íslands og Palestínu fram í gær. 

Á þriðjudag sögðum við svo frá því að utanríkisráðuneytið hefði verið lýst upp í fjólubláum lit á alþjóðadegi fatlaðs fólks. Fjólublár er litur alþjóðlegrar réttindabaráttu fatlaðs fólks og prýddi liturinn ráðuneytið í þrjá daga.

En þá að sendiskrifstofum okkar.

Í Helsinki sótti Harald Aspelund sendiherra hátíðarkvöldverð í forsetahöllinni í tilefni af þjóðhátíðardegi Finna. 

Þá bauð sendiherra Litáen í Helsinki Harald ásamt öðrum sendiherrum NB8-ríkjanna til fundar í tilefni af heimsókn sendiherra Litáa á Norðurlöndum og í Eystrasaltsríkjunum og yfirmanna utanríkisráðuneytis Litáens, til Helsinki

Sendiherra bauð svo jafnframt Íslendingum búsettum í Finnlandi á jólaball í ráðherrabústaðnum.

Í Osló átti Högni Kristjánsson sendiherra fund með forseta Stórþingsins, Masud Gharahkhani. 

Þá voru skrifstofustjóri og deildarstjóri evrópumála hjá viðskiptaskrifstofu utanríkisráðuneytisins gestir sendiherra í gær þar sem þeir kynntu viðskiptastefnu Íslands, samskipti Íslands við Evrópusambandið með áherslu á EES-samninginn og framtíðarsýn fyrir sendiherrum 38 ríkja gagnvart Íslandi með aðsetur í Osló. 

Í Varsjá kíkti Hannes Heimisson sendiherra á listasýningu sem skartar meðal annars málverkum frá íslenskum meisturum.

Okkar fólk þakkaði svo fyrir sig eftir viðburðaríka viku í kjölfar opnunar sendiráðsins.

Í London var sendiráðsstarfsfólki boðið í konunglega jólamóttöku í Buckinghamhöll í vikunni 

Í Brussel var sagt frá málþingi um orkuskipti en Ísland fer með formennsku í fastanefnd EFTA-ríkjanna um þessar mundir og stóð að málþinginu. Guðlaugur Þór Þórðarson, umhverfis, orku- og loftslagsráðherra, opnaði málþingið og greindi frá stöðu orkumála á Íslandi. Halla Hrund Logadóttir orkumálastjóri, flutti svo aðalerindi fundarins auk þess að stýra pallborðsumræðum.

Í París ræddu norrænir diplómatar málin í öldungadeild franska þingsins. 

Í New York flutti Þórður Óskarsson sendiherra ræðu í tilefni af 40 ára afmæli hafréttarsáttmála Sameinuðu þjóðanna. 

Í Washington sótti Bergdís Ellertsdóttir fund á vegum Women's Foreign Policy Group.

Í Kanada lauk þriggja daga ferð Hlyns Guðjónssonar sendiherra til norðvesturhluta landsins.

Í Nýju Delí fór fram fjölmenn móttaka í sendiherrabústaðnum þar sem samkomulag milli Sambands matreiðslumanna á Indlandi og íslenskra meistarakokka um að þjálfa fyrsta kokkalandslið Indlands var tilkynnt.

 

Í Kampala var skrifað undir samning um byggingu bættrar salernisaðstöðu og eflingar vatnsveitu í Lugala og Lufudu.

Fleira var það ekki í bili.

Bestu kveðjur frá upplýsingadeild.

Efnisorð

Föstudagspóstur

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Ef um er að ræða áríðandi erindi til borgaraþjónustu utanríkisráðuneytisins þá skal senda póst á [email protected]

Upplýsingar um netföng, símanúmer og staðsetningu ráðuneyta