Langveikum börnum tryggð heimaþjónusta áfram

Samningur Sjúkratrygginga Íslands við Heilsueflingarmiðstöðina sem annast heimaþjónustu við langveik börn hefur verið framlengdur um ótiltekinn tíma. Þetta er forgangsþjónusta sem mun verða tryggð til frambúðar segir Guðbjartur Hannesson, heilbrigðisráðherra.

Ráðherra segir mikilvægt að óvissu um heimaþjónustu við langveik börn hafi verið eytt og tryggt að ekki verði rof á þjónustunni. Heilsueflingarmiðstöðin mun vinna samkvæmt óbreyttum samningi við Sjúkratryggingar Íslands sem greiðir fyrir þjónustuna, meðan leiðir til hagræðingar verða skoðaðar.