Athyglisvert verkefni í Hörpu
Mennta- og menningarmálaráðherra, Svandís Svavarsdóttir og starfsfólk úr ráðuneytinu heimsóttu Hörpu nýlega til að kynna sér Biophilia verkefnið.
Mennta- og menningarmálaráðherra, Svandís Svavarsdóttir og starfsfólk úr ráðuneytinu heimsóttu Hörpu nýlega til að kynna sér Biophilia verkefnið.
Biophilia þýðir ást eða kærleikur til lífsins eða alls þess sem lífsandann dregur. Það er ekki einungis afar sérstakir tónleikar og hljóm- og margmiðlunardiskur Bjarkar heldur viðamikið sköpunarverkefni með þátttöku skólabarna, fræðimanna, kennara og fleiri. Fólk getur haldið áfram að vinna með sköpunarverk Bjarkar með því að kaupa þar til gerð smáforrit (e. apps) og nota til þess spjaldtölvur eða síma með snertiskjám. Verkefnið með börnunum byggist m.a. á þeirri grunnhugmynd að best sé að þau hefji tónlistariðkun sína með sköpun. Börnin fá fræðslu um helstu krafta og fyrirbæri, sem hafa áhrif á jörðina, svo sem aðdráttarafl jarðar, áhrif tunglsins á flóð og fjöru, ljós og eldingar og margt fleira. Þau nota svo þessa þekkingu og gera sín eigin tónverk og nota til þess smáforritin og spjaldtölvurnar. Náttúra, vísindi og tónlist eru tengd saman með algjörlega einstökum hætti. Ekki virðist vafa undirorpið að spjaldtölvurnar og sá aragrúi smáforrita, sem eru til og verið er að búa til, munu geta skapað nýjar forsendur fyrir öllu fræðslu- og sköpunarstarfi ungs fólks. Háskóli Íslands, Reykjavíkurborg, Smekkleysa, Iceland Airwaves og fleiri koma að verkefninu ásamt Björk.
