Ráðgjafarhópur um lagningu sæstrengs til Evrópu skilar tillögum til iðnaðar- og viðskiptaráðherra
Ráðgjafarhópur iðnaðar- og viðskiptaráðherra um lagningu sæstrengs til Evrópu skilaði í dag tillögum sínum til Ragnheiðar Elínar Árnadóttur iðnaðar- og viðskiptaráðherra. Ráðgjafarhópurinn var samhljóða í sinni ályktun að það þurfi frekari upplýsingar til að unnt sé að fullyrða um þjóðhagslega hagkvæmni þess að leggja sæstreng milli Íslands og Bretlands. Lagt er til að haldið verði áfram að kortleggja alla þætti verkefnisins hér innanlands um leið og leitað verði svara um möguleg rekstrar- og eignarhaldsmódel hjá viðsemjendum í Bretlandi.
Nánari tillögur er að finna í lokaskýrslu ráðgjafarhópsins ásamt þremur greiningarskýrslum ráðgjafa sem skoðuðu sérstaklega þjóðhagslega hagkvæmni, umhverfisþætti og lagaumgjörð.
Ráðgjafarhópurinn var settur á laggirnar fyrir réttu ári síðan af iðnaðarráðherra til að kanna nánar þann möguleika að leggja sæstreng fyrir raforku milli Íslands og Evrópu. Slík framkvæmd hefur um nokkurt skeið verið talin tæknilega möguleg og eru vísbendingar um að hún geti skilað næ
gjanlegri hagkvæmni. Hópurinn var skipaður aðilum frá öllum þingflokkum, Samtökum atvinnulífsins, Alþýðusambandi Íslands, BSRB, Sambandi íslenskra sveitarfélaga, Neytendasamtakanna, Landssamtökum lífeyrissjóða, Landsneti, Landsvirkjun, Samorku og Náttúruverndarsamtökum Íslands. Gunnar Tryggvason var formaður hópsins.
Hópnum var ætlað að greina nánar þjóðhagslega hagkvæmni verkefnisins, tæknileg og umhverfisleg atriði ásamt lagaumhverfi og milliríkjasamninga. Þá var ráðgjafarhópnum ætlað að standa fyrir faglegri og upplýstri umræðu um málefni sæstrengs sem var gert með fjölsóttu málþingi sem haldið var í Hörpu í lok febrúar síðastliðnum. Upptökur og glærur frá málþinginu er að finna á meðfylgjandi hlekk.