Frumvarp til laga um Fjarskiptastofu í samráðsgátt
PexelsDrög að frumvarpi til laga um Fjarskiptastofu hafa verið birt í samráðsgátt stjórnvalda. Allir hafa tækifæri til að senda inn umsögn eða ábendingar en frestur til að skila umsögn er til og með 13. desember 2020.
Í frumvarpinu felst heildarendurskoðun á lögum um Póst- og fjarskiptastofnun. Eitt meginmarkmið þess er að stofnunin geti tekist á við kröfur tímans en á fáum sviðum er viðvarandi jafn hröð tækniþróun eins og raun ber vitni á sviði fjarskipta og netöryggis. Mikilvægt er því að leita leiða til þess að stofnunin geti þjónustað samfélagið sem best til framtíðar.
Fjarskipti gegna lykilhlutverki í nútímasamfélagi og eru grundvöllur fyrir þjónustu á svo mörgum öðrum sviðum, því er sérstaklega mikilvægt að huga að því að öll umgjörð sé eins og best verður á kosið. Þrátt fyrir að Ísland standi mjög framarlega í alþjóðlegu samhengi hvað varðar grunnlag fjarskipta, þ.e. gæði og fjölda háhraðanettenginga á landsvísu, þá er einnig mikilvægt að tryggja næsta lag, þ.e.a.s. öryggi fjarskiptanna, til að fjarskiptagrunnvirkin nýtist sem best. Nauðsynlegt er að aðhafast til þess að halda í við tækniþróun, og nýta þau tækifæri sem bjóðast til úrbóta.
Lagarammi sem stofnunin vinnur eftir hefur tekið miklum breytingum á undanförnum misserum. Sem dæmi um nýlegar lagabreytingar má nefna ný póstlög nr. 98/2019, ný lög um öryggi net- og upplýsingakerfa mikilvægra innviða nr. 78/2019, og lög nr. 125/2019 um ráðstafanir til hagkvæmrar uppbyggingar háhraðafjarskiptaneta. Þá eru nú til umfjöllunar á Alþingi frumvarp til nýrra fjarskiptalaga og frumvarp til laga um landslénið .is, sem hvoru tveggja hafa áhrif á starfsumhverfi Póst- og fjarskiptastofnunar.
Meginþungi verkefna stofnunarinnar snýr að fjarskipta- og netöryggismálum, en póstmál eru aðeins um 6% af starfsemi stofnunarinnar. Í kjölfar greiningar á verkefnum stofnunarinnar hefur einnig verið lagt til að eftirlit með póstmálum flytjist frá Póst- og fjarskiptastofnun. Ákvæði er varða flutning eftirlits með póstþjónustu verða lögð fram í öðru frumvarpi.
Með frumvarpinu er ætlunin að einfalda og skýra regluverkið sem gildir um þá stofnun sem fer með eftirlit og stjórnsýslu á fjarskiptamarkaði. Meginmarkmiðið er að stuðla að því að stofnunin mæti væntingum og þörfum samfélagsins í heimi fjarskipta og netöryggis, með því að gera stofnuninni kleift að styrkja þá þætti stofnunarinnar er snúa að tæknilegum verkefnum, en á næstu árum munu verkefni stofnunarinnar á sviði netöryggismála aukast til muna.
Til að endurspegla betur verkefni stofnunarinnar er lagt til að stofnunin fái nýtt nafn, Fjarskiptastofa.