Mælaborð birt vegna aðgerðaáætlunar um meðferð kynferðisbrota
Vinna við aðgerðaáætlun til ársins 2025 um meðferð kynferðisbrota í réttarkerfinu heldur áfram af fullum krafti. Á vef Stjórnarráðsins hefur verið birt mælaborð um eftirfylgni þar sem hægt er að kynna sér stöðu einstakra atriða í aðgerðaáætluninni.
Vorið 2022 skipaði dómsmálaráðherra starfshóp sem var falið það hlutverk að endurnýja aðgerðaáætlun um meðferð kynferðisbrota fram til ársins 2025. Með aðgerðaáætluninni var stefnan sett á að vinna áfram markvisst að úrbótum við meðferð kynferðisbrota í réttarkerfinu auk þess að stuðla að bættri upplifun og betri þjónustu við þá sem í hlut eiga. Á meðal verkefna er stytting málsmeðferðartíma, mótun og kynning á verklagi og gátlistum vegna rannsóknar brota, trygging á viðeigandi heilbrigðisþjónustu fyrir þolendur, bætta upplifun málsaðila með virkari samskiptum og bætta aðstöðu í dómshúsi.
Aðgerðaáætlunin undirstrikar jafnframt mikilvægi þessa málaflokks í huga stjórnvalda.
Verkefnin í áætluninni eru fjölbreytt og mörg og eru á ábyrgð dómsmálaráðuneytis, félags- og vinnumarkaðsráðuneyti, heilbrigðisráðuneytis, ríkissaksóknara, Dómstólasýslunnar, Fangelsismálastofnunar, héraðssaksóknara, ríkislögreglustjóra og annarra lögregluembætta, sem og Lögmannafélagsins.
Aðgerðaráætlun um meðferð kynferðisbrota 2023-2025 (PDF skjal)
Mælaborð aðgerðaáætlunar um meðferð kynferðisbrota (Vefsvæði)