Framlag menningar og skapandi greina til verðmætasköpunar á Íslandi
Framlag menningar og skapandi greina til verðmætasköpunar á Íslandi - skýrsla unnin fyrir Menningar- og viðskiptaráðuneytið af Ágústi Ólafi Ágústssyni hagfræðingi.
Meðal meginniðurstaðna skýrslunnar er eftirfarandi:
- Beint framlag menningar og skapandi greina nam 3,5% af landsframleiðslu, eða um 150 milljörðum kr., árið 2022, sem er litlu minna en framlag sjávarútvegs.
- Opinber fjárfesting einnar krónu í menningu og skapandi greinum verður að þremur krónum í hagkerfinu og sé óbein hlutdeild menningar og skapandi greina tekin með nemur hlutfall af landsframleiðslu um 4,5% sem er um 190 milljarðar kr.
- Áætlaðar skatttekjur hins opinbera vegna skatta á laun og neyslu vinnuafls í menningu og skapandi greinum ásamt tekjum vegna áhrifa þessara greina á ferðamannafjölda er a.m.k. 40 milljarðar kr.
- Skatttekjur ríkisins af menningu og skapandi greinum eru 17 milljörðum kr. hærri heldur en það sem ríkið lætur nú renna til menningarmála og fjölmiðlunar, fyrir utan endurgreiðslur.
- Séu hins vegar endurgreiðslur ríkisins vegna rannsóknar og þróunar ásamt endurgreiðslum vegna kvikmynda teknar með eru umræddar skatttekjur næstum jafnháar og útgjöld ríkisins sem renna til menningar og skapandi greina.
Í skýrslunni eru lagðar fram 40 tillögur sem ætlað er að styrkja stöðu menningar og skapandi greina sem undirstöðuatvinnugreinar hér á landi. Þær skiptast í nokkra flokka;
- Skýr markmiðasetning
- Aukinn stuðningur
- Bætt fræðsla og vernd hugverka
- Atvinnulíf og kjaramál
- Stjórnsýsla
- Bætt tölfræði
