Hinn 18. mars 2025 kvað úrskurðarnefnd um upplýsingamál upp svohljóðandi úrskurð nr. 1259/2025 í máli ÚNU 25030004.
 

Kæra og málsatvik

Með erindi, dags. 4. mars 2025, kærði […] til úrskurðarnefndar um upplýsingamál ákvörðun Vestmannaeyjaferjunnar Herjólfs ohf. að synja upplýsingabeiðni hans. Með erindi, dags. 8. febrúar 2025, óskaði kærandi upplýsinga um hvar skórinn kreppti helst í starfsmannamálum hjá félaginu. Í svari félagsins, dags. 24. febrúar 2025, kom fram að trúnaður ríkti um einstök starfs­mannamál. Almennt mætti þó segja að stjórnendur félagsins væru meðvitaðir um að mannauður­inn væri dýrmætur og mikilvægt væri að búa þannig um hnúta að fólki liði vel í vinnunni og að aðbún­aður, hvort sem er til sjós eða lands, væri eins góður og mögulegt væri.
 
Í kæru til úrskurðarnefndarinnar kemur fram að fyrirspurn kæranda sé mjög opin og almenns eðlis. Henni sé mjög auðvelt að svara án persónugreinanlegra upplýsinga, auk þess sem vitað sé að fél­agið hafi ekki farið varhluta af því að skórinn kreppir í starfsmannamálum.
 

Niðurstaða

Upplýsingaréttur almennings tekur samkvæmt 1. mgr. 5. gr. upplýsingalaga, nr. 140/2012, til að­gangs að fyrir­liggj­andi gögnum sem varða tiltekið mál og aðgangs að tilteknum fyrirliggjandi gögn­um. Þegar aðili sem heyrir undir gildis­svið laganna tekur á móti erindi sem ber með sér að vera beiðni um aðgang að gögn­um á hann að athuga hvort fyrir liggi annaðhvort þau gögn sem bein­línis er óskað eftir eða gögn sem innihalda þær upplýsingar sem tilgreindar eru í beiðninni og taka ákvörðun um hvort aðgangur að gögn­un­um á grundvelli upplýsingalaga verði veittur.
 
Af upplýsingalögum verður ekki leidd sambærileg skylda til að svara erindum sem bera ekki með sér að vera beiðnir um að­gang að gögnum. Ekki er útilokað að skylt kunni að vera að bregðast við slík­um erind­um, sbr. 1. mgr. 7. gr. stjórnsýslulaga, nr. 37/1993, og óskráða leið­beiningar­reglu þess efnis að stjórn­völd­um sé skylt að veita þeim sem til þeirra leita nauð­synlega aðstoð og leið­beiningar varðandi þau mál sem snerta starfssvið þeirra. Hins vegar er það ekki hlutverk úrskurðar­nefnd­ar um upp­lýs­inga­mál að skera úr um rétt beiðanda til að fá svar við slíku erindi eða ágrein­ing um það hvort erindinu hafi verið svarað með full­nægjandi hætti, enda byggja kæruheimildir til nefndarinnar í upplýsingalögum á því að beðið hafi verið um aðgang að gögnum, sbr. 3. mgr. 17. gr. og 1. mgr. 20. gr. upplýsingalaga. Þá þarf og að liggja fyrir beiðni um aðgang að gögnum sam­kvæmt upplýsingalögum til að kæru, vegna óhóflegs dráttar á afgreiðslu máls samkvæmt 4. mgr. 9. gr. stjórnsýslulaga, teljist réttilega beint til úrskurðarnefndarinnar.
 
Úrskurðarnefndin hefur farið yfir erindi kæranda til Vestmannaeyjaferjunnar Herjólfs ohf. og telur erindið ekki bera með sér að vera beiðni um gögn í skilningi upplýsingalaga heldur almenn fyrirspurn til félagsins um starfsmannamál. Af þeim sökum er óhjákvæmilegt að vísa kærunni frá úrskurðarnefndinni.
 

Úrskurðarorð

Kæru […], dags. 4. mars 2025, er vísað frá úrskurðarnefnd um upplýsingamál.
 
 
 
 
Trausti Fannar Valsson, formaður
Hafsteinn Þór Hauksson
Sigríður Árnadóttir