Mál nr. IRR13050290

Ár 2014, þann 30. janúar, er í innanríkisráðuneytinu kveðinn upp svohljóðandi

ú r s k u r ð u r

í máli nr. IRR13050290

Kæra [A]
á ákvörðun
sýslumannsins í Kópavogi

I.      Kröfur og kæruheimild

Með stjórnsýslukæru dagsettri 29. maí 2013 kærði [A] (hér eftir nefndur [A]), […], ákvörðun sýslumannsins í Kópavogi (hér eftir nefndur sýslumaður) um gildistíma ökuréttinda í útgefnu ökuskírteini [A] þann 12. mars 2013. Krefst [A] þess að gildistími skírteinisins verði til 2047 í stað 12. mars 2028. Kæruheimild er í 26. gr. stjórnsýslulaga nr. 37/1993.

II.      Málsatvik og málsmeðferð

Samkvæmt gögnum málsins sótti [A] um endurnýjun ökuréttinda til sýslumanns og fékk útgefið nýtt fullnaðarskírteini þann 12. mars 2013. Var gildistími skírteinisins 15 ár sbr. ákvæði 3. mgr. 51. gr. umferðarlaga.

Með kæru dagsettri þann 29. maí 2013 fór [A] þess á leit að að ökuskírteinið myndi gilda til 2047 en ekki 2028 líkt og fram kemur í skírteininu.

Með tölvubréfi ráðuneytisins dags. 9. júlí 2013 var óskað eftir frekari upplýsingum frá [A] vegna kærunnar. Bárust þær ráðuneytinu með tölvubréfi [A] dags. þann 9. júlí 2013.

Með bréfi ráðuneytisins dags. 9. júlí 2013 var sýslumanni gefinn kostur á að koma að sjónarmiðum sínum varðandi kæruna. Bárust þau sjónarmið með bréfi sýslumanns dags. 24. júlí 2013.

Með bréfi ráðuneytisins dags. 13. ágúst 2013 var [A] gefinn kostur á að gæta andmælaréttar gagnvart sjónarmiðum sýslumanns og var sá frestur framlengdur með tölvubréfi ráðuneytisins dags. 30. september 2013. Engar athugasemdir bárust.

Með bréfi ráðuneytisins til [A] dags. 4. nóvember 2013 og tölvubréfi dags. 8. nóvember 2013 tilkynnti ráðuneytið að gagnaöflun væri lokið og málið væri tekið til úrskurðar.

III.    Málsástæður og rök [A]

Af kæru verður ráðið að [A] byggi á því að fyrra ökuskírteini hans hafi gilt til 2047 en endurnýjað skírteini hans frá 12. mars 2013 gildi aðeins til ársins 2028. Hafi því 19 ár verið tekin aftan af ökuréttindum [A] og krefst hann þess að það verði leiðrétt. Telur [A] að ekki sé heimilt að láta lög og reglugerðir gilda afturvirkt líkt og raunin sé með útgáfu hins endurnýjaða skírteinis. Þá telur [A] að þessi breyting taki af honum áður áunnin réttindi.

IV.    Umsögn  sýslumanns

Sýslumaður bendir á að [A] hafi fengið útgefið nýtt fullnaðarskírteini 12. mars 2013 þegar hann hafi bætt við auknum réttindum. Gildistími fullnaðarskírteinis sé 15 ár, sbr. 3. mgr. 51. gr. umferðarlaga nr. 50/1987, sbr. lög nr. 152/2012. Þegar bætt sé við ökuréttindi séu öll réttindi samkvæmt skírteininu endurnýjuð í samræmi við gildandi lög. Þannig muni almenn ökuréttindi [A] fá nýjan 15 ára gildistíma við endurnýjun aukinna ökuréttinda hans árið 2018. Ekki sé hægt að fallast á að tekin hafi verið 19 ár aftan af ökuréttindum [A] enda séu ökuskírteini endurnýjuð samkvæmt 5. mgr. 51. gr. umferðarlaga ef hlutaðeigandi fullnægir enn skilyrðum til að fá ökuskírteini útgefið. Þá sé einnig unnt að afturkalla ökuréttindi ef hlutaðeigandi fullnægir ekki lengur skilyrðum til að fá ökuskírteini útgefið samkvæmt 53. gr. umferðarlaga.

V.    Niðurstaða ráðuneytisins

Til umfjöllunar er útgáfa endurnýjaðs ökuskírteinis [A] sem gefið var út af sýslumanni þann 12. mars 2013 þegar [A] bætti við auknum réttindum. Gildir skírteinið til 12. mars 2028. Krefst [A] þess að gildistíminn verði leiðréttur þar sem fyrra skírteini hans gilti til ársins 2047 eða til 70 ára aldurs hans. Telur [A] að ekki sé heimilt að láta breytingar á lögum og reglugerðum gilda afturvirkt með þessum hætti.

Samkvæmt 3. mgr. 51. gr. umferðarlaga nr. 50/1987, sbr. lög nr. 152/2012, gildir fullnaðarökuskírteini í 15 ár. Var ákvæðinu breytt með lögunum frá 2012 og kveðið á um 15 ára gildistíma fullnaðarskírteinis í stað þess að áður gilti skírteinið til 70 ára aldurs skírteinishafa. Þegar [A] endurnýjaði ökuskírteini sitt þegar hann bætti við auknum ökuréttindum bar sýslumanni því að kveða á um 15 ára gildistíma ökuréttinda [A] í samræmi við fyrrnefnt ákvæði umferðarlaga enda ber við endurnýjun réttinda að fylgja fyrirmælum þeirra laga sem í gildi eru þegar endurnýjunin á sér stað. Þá er réttilega á það bent af hálfu sýslumanns að þegar bætt er við ökuréttindum eru öll réttindi samkvæmt skírteininu endurnýjuð í samræmi við gildandi lög á þeim tíma sem endurnýjunin á sér stað. Þá bendir ráðuneytið einnig á að samkvæmt 5. mgr. 51. gr. umferðarlaga má endurnýja ökuskírteini að loknum gildistíma enda fullnægi hlutaðeigandi enn skilyrðum til að fá ökuskírteini útgefið. Er því ekki um það að ræða að tekin hafi verið 19 ár aftan af ökuréttindum [A] líkt og hann heldur fram. Með þessum athugasemdum verður hin kærða ákvörðun staðfest.

Úrskurðarorð: 

Staðfest er ákvörðun sýslumannsins í Kópavogi um gildistíma ökuréttinda til 15 ára við endurnýjun ökuskírteinis [A] þann 12. mars 2013.