Seltjarnarneskaupstaður - Röð varamanna í nefndum, fundarboðanir
Seltjarnarneskaupstaður
7. nóvember 2005
FEL05110017
Jónmundur Guðmarsson, bæjarstjóri
Austurströnd 2
170 Seltjarnarnesi
Vísað er til fyrirspurnar yðar um röð varamanna í nefndum, sem barst ráðuneytinu í rafpósti
27. október sl. Fram kemur í fyrirspurninni að ekki sé um það að ræða að á Seltjarnarnesi sé
fyrir hendi ákveðin röð varamanna þegar framboðslisti á fleiri en einn aðalmann í nefnd nema
þá helst að hlutaðeigandi aðalmaður geri ráðstafanir til að tryggja að varamaður sé boðaður á
fund eða óski þess að bæjarstjóri sjái til þess að svo sé gert. Þetta hafi valdið ákveðnum vafa
um það hvort heimilt sé að kveðja til hvaða varamann sem er þegar aðalmaður forfallast um
stundarsakir. Í fyrirspurninni er óskað leiðbeininga ráðuneytisins um hvort til sé almenn regla
um þetta álitaefni.
Ekki verður séð að tekið sé á þessu álitaefni í IV. kafla sveitarstjórnarlaga, nr. 45/1998, með
síðari breytingum, sbr. einkum 43. gr. Umrætt ákvæði er nánast samhljóða 45. gr. samþykktar
um stjórn og fundarsköp Seltjarnarskaupstaðar frá árinu 2002. Einnig verður ekki séð að
fjallað hafi verið um sambærileg atvik í eldri úrskurðum eða álitum ráðuneytisins.
Af umræddum ákvæðum verður þó að draga þá ályktun að ef aðalmaður forfallast varanlega
skuli tiltekinn varamaður taka sæti hans, sbr. 1. mgr. 43. gr. sveitarstjórnarlaga. Ákvæðið
virðist með öðrum orðum gera ráð fyrir því að varamenn séu kosnir í tiltekinni röð.
Minnt skal á að skv. 2. mgr. 47. gr. sveitarstjórnarlaga gilda í meginatriðum sömu reglur um
nefndir sveitarfélags og gilda um sveitarstjórn. Samkvæmt 1. mgr. 24. gr. laganna er
meginreglan sú að varamenn taka sæti í sveitarstjórn í þeirri röð sem þeir eru kosnir. Við
nefndakjör er í mörgum tilvikum borinn upp til atkvæða framboðslisti. Verður að telja það
nærtæka ályktun að varamenn í nefndum taki sæti í þeirri röð sem þeir eru tilgreindir á slíkum
listum eða í bókun sveitarstjórnar um niðustöðu nefndarkjörs, nema undantekningarregla 2.
mgr. 43. gr. sveitarstjórnarlaga eigi við. Þó verður að gera þann almenna fyrirvara að ef
aðalmaður forfallast með skömmum fyrirvara getur reynst nauðsynlegt að boða þann
varamann sem fyrst næst í, þótt hann sé ekki fyrsti varamaður. Verður að telja að slík tilvik
brjóti almennt ekki í bága við framangreinda meginreglu.
Fyrir hönd ráðherra
Guðjón Bragason (sign.)
Þorgerður Benediktsdóttir (sign.)
7. nóvember 2005 - Seltjarnarneskaupstaður - Röð varamanna í nefndum, fundarboðanir (PDF)