Bolungarvíkurkaupstaður - Seta forseta bæjarstjórnar á fundum bæjarráðs
Elías Jónatansson, bæjarfulltrúi
21. júlí 2006
FEL06070022
Grænuhlíð 19
415 Bolungarvík
Vísað er til erindis yðar, dags. 5. júlí 2006, varðandi heimild forseta bæjarstjórnar til setu á fundum
bæjarráðs án þess að hafa verið til þess kjörinn. Ráðuneytinu hefur ekki borist fyrirspurn frá
Bolungarvíkurkaupstað um sama efni, sbr. fyrsta lið fyrirspurnar yðar.
Í 47. gr. sveitarstjórnarlaga nr. 45/1998 segir svo um réttindi og skyldur fulltrúa í nefndum, ráðum og
stjórnum: “Ákvæði II. og III. kafla laga þessara gilda að öðru leyti um fulltrúa í nefndum, ráðum og
stjórnum á vegum sveitarfélags eftir því sem við á.” Í 29. gr. laganna segir jafnframt svo:“Aðalmenn í
sveitarstjórnum hafa málfrelsi á fundum sveitarstjórna eftir því sem nánar er ákveðið í fundarsköpum.
Þeir hafa og tillögurétt, atkvæðisrétt og kjörgengi í nefndir.”
Rétt er að skýra framangreind ákvæði svo að þeir einir bæjarfulltrúar hafi seturétt á fundum nefnda með
málfrelsi og tillögurétt sem eru kjörnir fulltrúar í viðkomandi nefnd eða eru áheyrnarfulltrúar samkvæmt
lögum eða samþykkt sveitarstjórnar. Auk kjörinna fulltrúa hefur framkvæmdastjóri sveitarstjórnar slík
réttindi, sbr. ákvæði 55. gr. sveitarstjórnarlaga, en þar segir: “Framkvæmdastjóri sveitarfélags skal sitja
fundi sveitarstjórnar og hefur hann þar málfrelsi og tillögurétt en eigi atkvæðisrétt nema hann sé kjörinn
fulltrúi í sveitarstjórninni. Hann hefur og rétt til setu á fundum nefnda sveitarfélags með sömu
réttindum.”Rétt er þó að taka fram að í 3. mgr. 46. gr. sveitarstjórnarlaga er nefndum og ráðum
sveitarfélaga heimilað að kalla á sinn fund starfsmenn sveitarfélagsins sem og aðra aðila til viðræðna um
tiltekin mál.
Samkvæmt framansögðu er ljóst að forseti bæjarstjórnar hefur ekki stöðu sinnar vegna rétt til að taka sér
einhliða setu á fundum bæjarráðs sem áheyrnarfulltrúi. Bæjarráð getur hins vegar ákveðið að boða hann á
einstaka fundi til viðræðna um tiltekin mál.
Fyrir hönd ráðherra
Guðjón Bragason (sign.)
Stefanía Traustadóttir (sign.)
21. júlí 2006 - Bolungarvíkurkaupstaður - Seta forseta bæjarstjórnar á fundum bæjarráðs (PDF)