Skeiða- og Gnúpverjahreppur - Lausn frá hreppsnefndarstörfum, endurskoðun ákvörðunar hreppsnefndar
Þrándur Ingvarsson
30. ágúst 2005
FEL05080033/1001
Þrándarholti
801 SELFOSSI
Vísað er til bréfs yðar, dags. 22. ágúst 2005, þar sem þér óskið eftir áliti ráðuneytisins um túlkun
sveitarstjórnarlaga, nr. 45/1998, með síðari breytingum, varðandi það hvort hreppsnefndarmaður
sem beðist hefur lausnar skv. 34. gr. laganna geti fallið frá lausnarbeiðni sem hreppsnefnd hefur
samþykkt.
Á fundi hreppsnefndar Skeiða- og Gnúpverjahrepps sem haldinn var 9. ágúst 2005 var
eftirfarandi bókað:
„Erindi frá A hreppsnefndarfulltrúa dags. 2. ágúst 2005 þar sem hún óskar eftir lausn frá
störfum í hreppsnefnd og nefndum á hennar vegum til loka kjörtímabils vegna anna við nám og
önnur störf. A gerði grein fyrir erindi sínu og tók fram að hún óskaði eftir lausn frá og með 7.
september nk. Hreppsnefnd samþykkir erindið.“
Í bréfi yðar er vísað til ofangreindrar samþykktar og jafnframt greint frá því að í blöðum sé haft
eftir A og oddvita hreppsnefndar að A sé hætt við að hætta hreppsnefndarstörfum.
Álit ráðuneytisins.
Mál þetta er tekið fyrir á grundvelli 102. gr. sveitarstjórnarlaga, nr. 45/1998, þar sem kveðið er á
um að ráðuneytið skuli hafa eftirlit með því að sveitarstjórnir gegni skyldum sínum samkvæmt
þeim lögum og öðrum löglegum fyrirmælum.
Í bréfi yðar, dags. 22. ágúst 2005, er óskað eftir því að ráðuneytið taki til skoðunar samþykkt
hreppsnefndar Skeiða- og Gnúpverjahrepps um lausn hreppsnefndarfulltrúans A. Hún hafði að
eigin frumkvæði beðist lausnar sem hreppsnefndarfulltrúi til loka kjörtímabilsins með bréfi
dagsettu 2. ágúst 2005.
Samkvæmt 1. mgr. 34. gr. sveitarstjórnarlaga getur sveitarstjórnarmaður óskað eftir því að
honum verði veitt lausn um tiltekinn tíma eða til loka kjörtímabilsins. Hreppsnefndarfulltrúinn
A óskaði eftir því með bréfi dagsettu 2. ágúst 2005 að henni yrði veitt lausn frá störfum í
hreppsnefnd og nefndum á hennar vegum til loka kjörtímabilsins. Á fundi hreppsnefndar
Skeiða- og Gnúpverjahrepps þann 9. ágúst sl. var erindi hreppsnefndarfulltrúans samþykkt, og
henni veitt lausn frá hreppsnefndarstörfum frá og með 7. september 2005.
Umræddur hreppsnefndarmaður hefur verið kosinn til setu í sveitarstjórn, sbr. 8. gr.
sveitarstjórnarlaga. Eins og áður hefur komið fram hefur hún beðist lausnar frá og með 7.
september nk. og var sú beiðni samþykkt. Fram til þess tíma situr hún í hreppsnefnd og ber þar
af leiðandi ábyrgð og skyldur sem hreppsnefndarfulltrúi, sbr. 9. gr. sveitarstjórnarlaga. Þegar
litið er til þess er það mat ráðuneytisins að heimilt sé að bera fram á hreppsnefndarfundi tillögu
þess efnis að samþykkt hreppsnefndar um að veita A lausn frá og með 7. september 2005 verði
felld úr gildi, enda fari sú afgreiðsla fram fyrir þann dag.
Í 1. mgr. 19. gr. sveitarstjórnarlaga er kveðið á um að sveitarstjórnarmanni beri að víkja sæti
við meðferð og afgreiðslu máls þegar það varðar hann eða nána venslamenn hans svo
sérstaklega að almennt megi ætla að viljaafstaða hans mótist að einhverju leyti þar af, sbr.
samhljóða ákvæði í 1. mgr. 23. gr. samþykktar um stjórn og fundarsköp Skeiða- og
Gnúpverjahrepps nr. 807/2002. Komi fram beiðni um að fallið verði frá samþykkt
hreppsnefndarinnar frá 9. ágúst sl. telur ráðuneytið að hreppsnefndarfulltrúanum A beri að víkja
sæti við meðferð og afgreiðslu málsins.
Ráðuneytið telur rétt að taka afstöðu til þess hvort 2. mgr. 19. gr. sveitarstjórnarlaga geti átt við
um aðstæður í máli þessu, en þar er kveðið á um að sveitarstjórnarmenn séu ekki vanhæfir þegar
verið er að velja fulltrúa til trúnaðarstarfa á vegum sveitarstjórnar eða ákvörðun um þóknun fyrir
slík störf. Ákvæðið tekur meðal annars til þess þegar fulltrúar eru kjörnir í nefndir og stjórnir á
vegum sveitarfélagsins. Þegar litið er til atvika þessa máls er það niðurstaða ráðuneytisins að
ákvæðið eigi ekki við þegar greiða á atkvæði um áframhaldandi setu sveitarstjórnarfulltrúa í
sveitarstjórn. Umræddur sveitarstjórnarfulltrúi getur því ekki á grundvelli 2. mgr. 19. gr.
sveitarstjórnarlaga tekið þátt í atkvæðagreiðslu um afturköllun lausnarbeiðnar sinnar frá störfum
í sveitarstjórn.
F. h. r.
Guðjón Bragason (sign.)
Guðrún A Þorsteinsdóttir (sign.)
Afrit:
Skeiða- og Gnúpverjahreppur
Árnes
801 Selfoss