Úrskurður í máli nr. SRN17040966
Ár 2017, þann 6. júní, er í samgöngu- og sveitarstjórnarráðuneytinu kveðinn upp svohljóðandi
ú r s k u r ð u r
í máli nr. SRN17040966
Kæra X
á ákvörðun
lögreglustjórans á höfuðborgarsvæðinu
I. Kröfur og kæruheimild
Með stjórnsýslukæru móttekinni 10. mars 2017 kærði X kt. 000000-0000, ákvörðun lögreglustjórans á höfuðborgarsvæðinu (hér eftir nefndur lögreglustjóri) frá 6. janúar 2017 um að synja beiðni hans um endurveitingu ökuréttar. Af kæru verður ráðið að þess sé krafist að hin kærða ákvörðun verði felld úr gildi. Kæruheimild er í 106. gr. umferðarlaga nr. 50/1987.
II. Málsatvik og málsmeðferð
Samkvæmt gögnum málsins var X sviptur ökurétti í átján mánuði frá 8. febrúar 2016 til 7. ágúst 2017. Sótti X um endurveitingu ökuréttar til lögreglustjóra en þeirri beiðni var hafnað með bréfi embættisins dags. 6. janúar 2017.
Ákvörðun lögreglustjóra var kærð til ráðuneytisins með tölvubréfi X mótteknu þann 10. mars 2017.
Með bréfi ráðuneytisins dags. 22. mars 2017 var lögreglustjóra gefinn kostur á að koma að sjónarmiðum sínum varðandi kæruna. Bárust þau sjónarmið með bréfi embættisins mótteknu þann 10. apríl 2017.
Með bréfi ráðuneytisins dags. 12. apríl 2017 var X gefinn kostur á að gæta andmælaréttar gagnvart sjónarmiðum lögreglustjóra. Engar athugasemdir bárust.
Með bréfi til X dags. 18. maí 2017 tilkynnti ráðuneytið að gagnaöflun væri lokið og málið væri tekið til úrskurðar.
III. Málsástæður og rök X
Í kæru vísar X til þeirra sjónarmiða sem fram komu með beiðni hans til lögreglustjóra. Kemur þar fram ökuleyfissviptingin hafi verið X fjötur um fót bæði varðandi tekjur og framgang í starfi, en X starfi sem iðnaðarmaður.
IV. Ákvörðun og umsögn lögreglustjóra
Í ákvörðun lögreglustjóra kemur fram að í 1. mgr. 106. gr. umferðarlaga segi að hafi maður verið sviptur ökurétti um lengri tíma en þrjú ár geti lögreglustjóri, þegar svipting hefur staðið í þrjú ár, heimilað að honum skuli veittur ökuréttur að nýju. Fyrir liggi að X hafi verið sviptur ökurétti í átján mánuði frá 8. febrúar 2016 til 7. ágúst 2017. Samkvæmt ákvæðinu sé ekki heimilt að breyta ákvörðun um tímabundna ökuréttarsviptingu nema þegar svipting skal vara lengur en þrjú ár. Séu því ekki lagaskilyrði til að verða við beiðni X.
Í umsögn lögreglustjóra eru áréttuð þau sjónarmið sem fram koma í ákvörðun embættisins. Þá kemur fram að ákvæði 1. mgr. 106. gr. umferðarlaga sé undantekningarregla sem skýra verði þröngt. Ekki sé að finna heimild í lögum til að víkja frá skilyrðum ákvæðisins um lágmarkstímalengd sviptingar vegna sérstakra aðstæðna. Skorti því lagaheimild til að verða við beiðni X.
V. Niðurstaða ráðuneytisins
Í 1. mgr. 106. gr. umferðarlaga segir að hafi maður verið sviptur ökurétti um lengri tíma en þrjú ár geti lögreglustjóri þegar svipting hafi staðið í þrjú ár heimilað að honum skuli veittur ökuréttur að nýju. Þá segir að hafi maður verið sviptur ökurétti ævilangt megi þó ekki veita ökurétt að nýju fyrr en svipting hefur staðið í fimm ár.
Fyrir liggur að X var sviptur ökurétti í átján mánuði frá 8. febrúar 2016.
Ráðuneytið áréttar að aðeins er heimilt að breyta ákvörðun um tímabundna sviptingu ökuréttar þegar maður hefur sviptur ökurétti um lengri tíma en þrjú ár. Nær svipting ökuréttar X ekki þeirri tímalengd. Eru því ekki skilyrði til að verða við beiðni X um endurveitingu ökuréttar og verður hin kærða ákvörðun því staðfest.
Úrskurðarorð:
Staðfest er ákvörðun lögreglustjórans á höfuðborgarsvæðinu frá 6. janúar 2017 um að synja beiðni X um endurveitingu ökuréttar.