Sandgerðisbær - Samningur um byggingu miðbæjarkjarna, skylda til að afla sérfræðiálits skv. 2. mgr. 65. gr. sveitarstjórnarlaga
Holtsgötu 44
245 SANDGERÐI
Vísað er til bréfs yðar, dags. 17. september 2003, þar sem óskað er álits ráðuneytisins á samþykkt bæjarstjórnar Sandgerðisbæjar frá 10. september sl., um að ganga til samninga við Búmenn hsf. um samstarf um byggingu íbúða- og þjónustukjarna. Í erindi yðar kemur fram að ágreiningur er um málið innan bæjarstjórnar og að við umræður á fundinum hafi ekki legið fyrir sérfræðiálit skv. 65. gr. sveitarstjórnarlaga um áhrif samningsins á fjárhag sveitarsjóðs.
Ráðuneytið aflaði upplýsinga um stöðu málsins í símtali við bæjarstjóra Sandgerðisbæjar 27. september sl. Í máli hans kom fram að viðræður færu nú fram á grundvelli samþykktar bæjarstjórnar frá umræddum fundi. Lýsti bæjarstjóri þeirri skoðun að þar sem forsendur samningsins væru enn í mótun væri á þessu stigi ekki unnt að leggja fram álit um áhrif samningsins á fjárhag sveitarsjóðs.
Með lögum nr. 74/2003 var bætt inn í 65. gr. sveitarstjórnarlaga nýrri málsgrein þar sem mælt er fyrir um skyldu til að afla álits sérfróðs aðila áður en sveitarstjórn staðfestir samninga um framkvæmdir eða þjónustu við íbúa sveitarfélags sem gilda eiga til langs tíma og hafa í för með sér verulegar skuldbindingar fyrir sveitarsjóð. Miðað við þau samningsdrög sem fylgdu erindi yðar er það mat ráðuneytisins að skuldbindingar vegna fyrirhugaðs miðbæjarkjarna muni að öllum líkindum hafa veruleg áhrif á fjárhag og rekstur Sandgerðisbæjar á komandi árum og af þeirri ástæðu sé skylt að afla álits sérfróðs aðila um kostnaðaráætlun og væntanleg áhrif á fjárhagsafkomu sveitarsjóðs á framkvæmdatíma og gildistíma þeirra samninga sem um er að ræða. Jafnframt skal gera grein fyrir því hvernig framkvæmdin samræmist þriggja ára áætlun sveitarfélagsins.
Miðað við framkomnar skýringar telur ráðuneytið að ekki hafi verið skylt að leggja fram umrætt sérfræðiálit á fundi bæjarstjórnar Sandgerðisbæjar sem haldinn var 10. september sl., þar sem ákveðið var að ganga til samninga við Búmenn hsf. um fyrirhugaða framkvæmd. Það er hins vegar mat ráðuneytisins, miðað við þau gögn sem liggja frammi í málinu, að umrætt álit verði að liggja fyrir áður en aflað verður endanlegrar staðfestingar bæjarstjórnar á samningum um fyrirhugaðar framkvæmdir.
F. h. r.
Guðjón Bragason (sign.)
Óskar Páll Óskarsson (sign.)
Afrit:
Sandgerðisbær