Úrskurður nr. 68/2015
ÚRSKURÐUR ÚRSKURÐARNEFNDAR UM LEIÐRÉTTINGU VERÐTRYGGÐRA FASTEIGNAVEÐLÁNA
nr. 68/2015
Ár 2015, miðvikudaginn 11. mars 2015, er tekið fyrir mál nr. 41/2015; kæra A og B, dags. 15. janúar 2015. Í málinu úrskurða Eva Dís Pálmadóttir, Ingi Tryggvason og Kristján Jónasson. Upp er kveðinn svofelldur
ú r s k u r ð u r :
I.
Málavextir eru þeir að með erindi til ríkisskattstjóra, dags. 18. desember 2014 og 2. janúar 2015, gerðu kærendur athugasemdir við framkvæmd leiðréttingar, sbr. 2. mgr. 10. gr. laga nr. 35/2014 um leiðréttingu verðtryggðra fasteignaveðlána.
Með kæru, dags. 15. janúar 2015, hafa kærendur kært framkvæmd leiðréttingar, sbr. 11. gr. laga nr. 35/2014. Í kæru er því mótmælt að kærendur hafi fengið afskrifaðar tuttugu milljónir króna af lánum hjá X banka.
Fyrir liggur að ríkisskattstjóri hefur tekið afstöðu til þeirra athugasemda sem kærendur gerðu til ríkisskattstjóra á grundvelli 2. mgr. 10. gr. laga nr. 35/2014 þann 18. desember 2014 og 2. janúar 2015. Ríkisskattstjóri svaraði þeim athugasemdum þann 19. janúar 2015.
II.
Samkvæmt 2. mgr. 10. gr. laga nr. 35/2014 er heimilt að óska eftir leiðréttingu hjá ríkisskattstjóra með rafrænum hætti til ríkisskattstjóra innan þriggja mánaða frá birtingardegi, telji umsækjendur að niðurstaða útreiknings samkvæmt 9. gr. laga nr. 35/2014 byggist á röngum upplýsingum. Í 7. mgr. 6. gr. reglugerðar nr. 698/2014, um samræmt verklag og viðmið við leiðréttingu verðtryggðra fasteignaveðlána, kemur fram að geri umsækjandi athugasemdir við ákvörðun ríkisskattstjóra um leiðréttingu, sbr. 5. mgr. sömu greinar, vegna m.a. rangra upplýsinga um staðreyndir, rofnar sá frestur sem hann hefur til að samþykkja útreikning og framkvæmd leiðréttingar og tekur fresturinn að líða að nýju frá þeim tíma sem ríkisskattstjóri hefur birt niðurstöðu sína. Sama gildir ef umsækjandi kærir útreikning og/eða framkvæmd leiðréttingarinnar til úrskurðarnefndar skv. 14. gr. laga nr. 35/2014. Einnig kemur þar fram að á þeim tíma sem athugasemd er til meðferðar hjá ríkisskattstjóra er ekki unnt að kæra til úrskurðanefndar.
Samkvæmt framansögðu nýttu kærendur sér ofangreinda kæruleið á meðan athugasemdir þeirra voru til meðferðar hjá ríkisskattstjóra en ekki eftir að niðurstaða ríkisskattstjóra lá fyrir eins og kærendum var heimilt að gera eftir birtingu hennar. Verður því ekki talið að úrskurðarnefnd um leiðréttingu verðtryggðra fasteignaveðlána sé heimilt að taka kröfu kærenda frá 15. janúar 2015 til efnislegrar úrlausnar og ber því að vísa kröfu kærenda frá í máli þessu.
Rétt þykir með vísan til 7. gr. stjórnsýslulaga nr. 37/1993 að benda kærendum á að sá frestur sem þeir hafa til að samþykkja og kæra útreikning leiðréttingar og framkvæmd hennar er þrír mánuðir frá birtingardegi ákvörðunar. Sá frestur rofnaði þegar þeir gerðu athugasemd til ríkisskattstjóra, sbr. 7. mgr. 6. gr. reglugerðar nr. 698/2014, sbr. einnig 4. mgr. 27. gr. stjórnsýslulaga nr. 37/1993. Fresturinn tók að líða að nýju frá þeim tíma þegar ríkisskattstjóri birti niðurstöðu sína 19. janúar 2015. Eftir það og fram til loka kærufrests er unnt að kæra að nýju ákvörðun um fjárhæð leiðréttingar og framkvæmd hennar, sbr. 14. gr. laga nr. 35/2014.
Ú r s k u r ð a r o r ð :
Kærunni er vísað frá úrskurðarnefnd um leiðréttingu verðtryggðra fasteignaveðlána.