Úrskurðarnefnd velferðarmála

Mál nr. 496/2021

Miðvikudaginn 19. janúar 2022

A

gegn

Tryggingastofnun ríkisins

Ú R S K U R Ð U R

Mál þetta úrskurða Rakel Þorsteinsdóttir lögfræðingur, Eva Dís Pálmadóttir lögfræðingur og Unnþór Jónsson lögfræðingur.

Með rafrænni kæru, móttekinni 23. september 2021, kærði A, til úrskurðarnefndar velferðarmála ákvörðun Tryggingastofnunar ríkisins frá 20. maí 2021 um endurreikning og uppgjör tekjutengdra bóta vegna ársins 2020.

I.  Málsatvik og málsmeðferð

Niðurstaða endurreiknings og uppgjörs tekjutengdra bóta ársins 2020 var sú að kæranda hefðu verið ofgreiddar bætur það ár að fjárhæð 582.107 kr., að teknu tilliti til endurgreiddrar staðgreiðslu. Kæranda var tilkynnt um framangreinda ofgreiðslu með bréfi Tryggingastofnunar ríkisins, dags. 20. maí 2021. Kærandi andmælti niðurstöðu endurreikningsins 1. júlí 2021 og var þeim andmælum svarað með bréfi stofnunarinnar, dags. 15. september 2021.

Kæra barst úrskurðarnefnd velferðarmála 23. september 2021. Með bréfi, dags. 28. september 2021, óskaði úrskurðarnefnd eftir greinargerð Tryggingastofnunar ríkisins ásamt gögnum málsins. Með bréfi, dags. 3. nóvember 2021, barst greinargerð stofnunarinnar og var hún send kæranda til kynningar með bréfi úrskurðarnefndar, dags. 4. nóvember 2021. Athugasemdir bárust frá kæranda 13. nóvember 2021 og voru þær sendar Tryggingastofnun ríkisins til kynningar með bréfi úrskurðarnefndar, dags. 15. nóvember 2021. Efnislegar athugasemdir bárust ekki.

II.  Sjónarmið kæranda

Í kæru greinir kærandi frá því að þann 1. apríl 2020 hafi hann byrjað á greiðslum ellilífeyris. Niðurstöðu Tryggingastofnunar sé mótmælt á þeim forsendum að greiðslur sem hann hafi fengið frá B 1. maí 2020 og 1. júní 2020 hafi verið vegna launabreytinga á tímabilinu 1. apríl 2019 til 31. mars 2020 þar sem engir samningar hafi verið til staðar í næstum eitt ár. Enn fremur hafi kærandi fengið greitt orlof fyrir tímabilið 1. maí 2019 – 30. apríl 2020 en 11/12 þessarar greiðslu sé fyrir tímabilið 1. apríl 2019 – 31. mars 2020.

Vegna mistaka launadeildar B og/eða C hafi kærandi fengið uppgjör á eldri laun greidd 1. maí og 1. júní í stað 1. apríl.

Í athugasemdum kæranda frá 13. nóvember 2021 kemur fram að í lok mars 2020 hafi hann haft áhyggjur af því hvernig laun vegna marsmánaðar sem hafi verið greidd 1. apríl myndu verða tekin inn í útreikninga Tryggingastofnunar. Í símtali við þjónustufulltrúa stofnunarinnar hafi kæranda verið sagt að umræddar tekjur myndu ekki vera teknar með í uppgjörinu. Þessu hafi kærandi trúað og því hafi það komið honum á óvart að greiðslur vegna ársins 2019 og til 31. mars 2021 hafi verið taldar honum til tekna í bréfi frá 20. maí 2021.

Þetta sé að mestu leyti orlof fyrir tímabilið 1. maí 2019 til 31. mars 2020 og launahækkanir vegna kjarasamninga frá 1. mars 2019 og til 31. mars 2020. Það hefði verið eðlilegt að fá þetta greitt 1. apríl en einhverra hluta vegna hafi þetta verið greitt 1. maí og 1. júní.

III.  Sjónarmið Tryggingastofnunar ríkisins

Í greinargerð Tryggingastofnunar ríkisins kemur fram að kærður sé endurreikningur tekjutengdra bóta ársins 2020.

Í 16. gr. laga nr. 100/2007 um almannatryggingar, með síðari breytingum, sé kveðið á um tilhögun útreiknings tekjutengdra bóta. Í 2. mgr. ákvæðisins sé vísað til laga nr. 90/2003 um tekjuskatt varðandi hvað skuli teljast til tekna. Til tekna samkvæmt III. kafla laga um almannatryggingar teljast tekjur samkvæmt II. kafla laga um tekjuskatt, að teknu tilliti til ákvæða 28. gr. sömu laga um hvað ekki teljist til tekna og frádráttarliða samkvæmt 1., 3., 4. og 5. tölul. A-liðar 1. mgr. 30. gr. og 31. gr. sömu laga eða undantekninga og takmarkana samkvæmt öðrum sérlögum.

Tryggingastofnun greiði lífeyri á grundvelli áætlunar um tekjur viðkomandi árs, sbr. 5. mgr. 16. gr. laga um almannatryggingar. Bótaþegi beri ábyrgð á því að slík tekjuáætlun endurspegli árstekjur og beri að breyta áætluninni ef svo sé ekki, sbr. 1. mgr. 39. gr. sömu laga og 3. gr. reglugerðar nr. 598/2009 um útreikning, endurreikning og uppgjör tekjutengdra bóta og vistunarframlags, en þar komi fram að bótaþega sé skylt að veita Tryggingastofnun allar nauðsynlegar upplýsingar til að hægt sé að taka ákvörðun um bótarétt, fjárhæð og greiðslu bóta og endurskoðun þeirra. Að sama skapi sé bótaþega skylt að tilkynna Tryggingastofnun um breytingar á tekjum eða öðrum aðstæðum sem geti haft áhrif á greiðslur.

Í 7. mgr. 16. gr. laga um almannatryggingar komi fram að þegar endanlegar upplýsingar um tekjur bótagreiðsluársins liggi fyrir við álagningu skattyfirvalda á opinberum gjöldum, skuli Tryggingastofnun endurreikna bótafjárhæðir á grundvelli tekna. Einnig sé fjallað um endurreikning í reglugerð nr. 598/2009 um útreikning, endurreikning og uppgjör tekjutengdra bóta og vistunarframlags. Tryggingastofnun hafi ekki heimild til að líta fram hjá tekjuupplýsingum sem fram komi í skattframtölum.

Í a. lið 1. mgr. 7. gr. reglugerðar nr. 598/2009 um útreikning, endurreikning og uppgjör tekjutengdra bóta og vistunarframlags segi að í þeim tilfellum sem greiðsluþegi hafi fengið greiðslur hluta úr ári skuli byggja á upplýsingum úr staðgreiðsluskrá skattyfirvalda þegar um sé að ræða tekjur sem séu staðgreiðsluskyldar samkvæmt lögum nr. 45/1987 um staðgreiðslu opinberra gjalda. Eingöngu beri að líta til tekna þeirra mánaða sem bótaréttur hafi verið fyrir hendi í.

Á skýran hátt sé tekið fram í lögum um almannatryggingar og reglugerð nr. 598/2009 að meginreglan sé sú að Tryggingastofnun skuli innheimta ofgreiddar bætur, sbr. 55. gr. laga um almannatryggingar, sem sé svohljóðandi: „Hafi Tryggingastofnun ríkisins eða umboð hennar eða eftir atvikum sjúkratryggingastofnunin ofgreitt bótaþega bætur samkvæmt lögum þessum skal stofnunin draga ofgreiddar bætur frá bótum sem bótaþegi síðar kann að öðlast rétt til, sbr. þó 2. mgr. Einnig á Tryggingastofnun eða eftir atvikum sjúkratryggingastofnunin endurkröfurétt á hendur bótaþega eða dánarbúi hans samkvæmt almennum reglum.“

Á árinu 2020 hafi kærandi verið með ellilífeyri frá 1. apríl til 31. desember 2020. Uppgjör tekjutengdra bóta ársins hafi leitt til 582.107 kr. ofgreiðslu, að teknu tilliti til greiddrar staðgreiðslu. Ástæða þess að endurkrafa hafi myndast sé sú að við samkeyrslu við tekjuupplýsingar af skattframtali 2021, vegna tekjuársins 2020, hafi komið í ljós að tekjur kæranda hafi reynst hærri en tekjuáætlun hafi gert ráð fyrir. Endurreikningur byggist á upplýsingum úr skattframtölum bótaþega.

Kærandi hafi sent inn tekjuáætlun, dags. 7. febrúar 2020, vegna umsóknar um ellilífeyri. Í þeirri áætlun hafi kærandi gert ráð fyrir 1.820.000 kr. í lífeyrissjóðstekjur. Á grundvelli þeirrar áætlunar og upplýsinga úr staðgreiðsluskrá hafi Tryggingastofnun gert tillögu að tekjuáætlun þar sem miðað hafi verið við að kærandi myndi hafa 2.670.135 kr. í lífeyrissjóðstekjur á tímabilinu 1. apríl til 31. desember 2020. Kæranda hafi verið tilkynnt um þessa tekjuáætlun með bréfi stofnunarinnar, dags. 13. mars 2020, en engar athugasemdir hafi borist. Á grundvelli þessarar tekjuáætlunar hafi kærandi fengið greitt frá 1. apríl 2020 til 30. september 2020. 

Við reglubundið eftirlit Tryggingastofnunar í september 2020 hafi komið í ljós misræmi á milli tekjuáætlunar kæranda og upplýsinga úr staðgreiðsluskrá Skattsins. Tryggingastofnun hafi búið til nýja tillögu að tekjuáætlun á grundvelli þeirra upplýsinga og hafi sent kæranda bréf, dags. 11. september 2020, þar sem tilkynnt hafi verið um hina nýju tillögu að tekjuáætlun. Samkvæmt henni hafi verið gert ráð fyrir 3.166.135 kr. í launatekjur og 5.033.782 kr. lífeyrissjóðstekjur á árinu.

Í kjölfarið hafi kærandi skilað inn eigin tekjuáætlun þar sem gert hafi verið ráð fyrir 188.000 kr. í launatekjur og 3.460.787 kr. í lífeyrissjóðstekjur, hann hafi ekki gert frekari athugasemdir og hafi fengið greitt samkvæmt þessari áætlun frá 1. október 2020 til 31. desember 2020. 

Við bótauppgjör ársins 2020 hafi komið í ljós að endanlegar tekjur kæranda á tímabilinu 1. apríl 2020 til 31. desember 2020 hafi verið 1.691.062 kr. í launatekjur, 3.603.732 kr. í lífeyrissjóðstekjur, 1.960.000 kr. í greiðslur úr séreignarlífeyrissjóði og 17.571 kr. í fjármagnstekjur, sameiginlegar með maka. Einnig hafi verið tekið tillit til þess að greitt hafði verið 33.006 kr. í iðgjald til lífeyrissjóð og 63.661 kr. í iðgjald í séreignarsjóð sem hafi komið til frádráttar.

Niðurstaða endurreiknings tekjutengdra bóta ársins 2020 hafi verið sú að kærandi hafi fengið ofgreiddan ellilífeyri. Kærandi hafi fengið 1.305.582 kr. greiddar á árinu en hafi með réttu átt að fá 700.331 kr. Þessi mismunur hafi leitt til ofgreiðslu að fjárhæð 582.107 kr., að teknu tilliti til endurgreiddrar staðgreiðslu skatta. Tryggingastofnun hafi borist andmæli við uppgjörið þann 23. júní 2021 sem hafi verið svarað með bréfi, dags. 16. september 2021.

Í kæru gerir kærandi fyrst og fremst athugasemdir við tvo liði. Í fyrsta lagi að launatekjur vegna leiðréttinga fyrir tímabilið 1. apríl 2019 til 31. mars 2020, sem honum hafi verið greiddar í maí 2020 og hafi komið á staðgreiðsluskrá í apríl 2020, hafi verið taldar honum til tekna á því tímabili sem hann hafi fengið greiðslur ellilífeyris. Í öðru lagi geri kærandi athugasemdir við að orlof teljist honum til tekna á framangreindu tímabili.

Varðandi launatekjur kæranda þá virðist hann hafa fengið leiðréttingu vegna eldra tímabils eftir að hann hafi hafið töku ellilífeyris. Fjárhæðin virðist vera á bilinu 100.000 til 200.000 kr. Þó að gögn málsins séu ekki alveg skýr megi ráða að þeim af megnið af þeirri greiðslu sé vegna ársins 2019. Tryggingastofnun hafi ekki heimild til að líta fram hjá tekjuupplýsingum sem komi fram í skattframtölum og hafi ekki heimild til að færa tekjur á milli ára. Telji kærandi að tekjur sínar tilheyri fyrra ári þurfi hann að skila inn breyttu skattframtali svo að hægt sé að taka tillit til þess. Kæranda hafi ekki verið leiðbeint um þetta með fullnægjandi hætti í svari stofnunarinnar á sínum tíma og beðist sé velvirðingar á því.

Varðandi orlofsgreiðslur þá séu þær greiðslur greiddar á tilskildum tímum. Tryggingastofnun sé bundin af þeim reglum sem um staðgreiðsluskyldar tekjur gilda. Í a. lið 1. mgr. 7. gr. reglugerðar nr. 598/2009 um útreikning, endurreikning og uppgjör tekjutengdra bóta og vistunarframlags segi að í þeim tilfellum sem greiðsluþegi hafi fengið greiðslur hluta úr ári, skuli byggja á upplýsingum úr staðgreiðsluskrá skattyfirvalda þegar um sé að ræða tekjur sem séu staðgreiðsluskyldar samkvæmt lögum nr. 45/1987 um staðgreiðslu opinberra gjalda. Eingöngu beri að líta til tekna þeirra mánaða sem bótaréttur hafi verið fyrir hendi í. Þessi túlkun Tryggingastofnunar sé einnig í samræmi við fyrri fordæmi og framkvæmd úrskurðarnefndar í sambærilegum málum, til dæmis í máli nr. 192/2014.

Tryggingastofnun hafi skoðað gögn málsins en telji ekki ástæðu til þess að breyta kærðri ákvörðun.

IV.  Niðurstaða

Mál þetta varðar endurreikning og uppgjör á tekjutengdum bótum kæranda vegna ársins 2020.

Kærandi fékk greiddan ellilífeyri frá Tryggingastofnun ríkisins frá 1. apríl 2020 og út árið. Samkvæmt 39. gr. laga nr. 100/2007 um almannatryggingar, með síðari breytingum, er umsækjanda eða greiðsluþega skylt að veita stofnuninni allar nauðsynlegar upplýsingar til að hægt sé að taka ákvörðun um bótarétt, fjárhæð og greiðslu bóta og annarra greiðslna samkvæmt lögunum og endurskoðun þeirra. Enn fremur er skylt að tilkynna stofnuninni um breytingar á tekjum eða öðrum aðstæðum sem geta haft áhrif á bætur eða greiðslur. Af framangreindu verður ráðið að sú skylda hvíli á greiðsluþegum að upplýsa Tryggingastofnun um tekjur á bótagreiðsluári sem kunna að hafa áhrif á bótarétt.

Í 16. gr. laga um almannatryggingar er kveðið á um tekjutengingu lífeyristrygginga og hvernig Tryggingastofnun ríkisins skuli standa að útreikningi bóta. Í 2. mgr. ákvæðisins segir að til tekna samkvæmt III. kafla skuli telja tekjur samkvæmt II. kafla laga nr. 90/2003 um tekjuskatt, með tilteknum undantekningum. Á grundvelli 7. mgr. 16. gr. þeirra laga ber Tryggingastofnun ríkisins að endurreikna bótafjárhæðir eftir að endanlegar upplýsingar um tekjur bótagreiðsluárs liggja fyrir við álagningu skattyfirvalda á opinberum gjöldum. Í 23. gr. laga um almannatryggingar er kveðið á um útreikning ellilífeyris en þar segir að ellilífeyrir skuli lækka um 45% af tekjum lífeyrisþegans, sbr. 16. gr. laganna, uns lífeyririnn falli niður. Leiði endurreikningur í ljós að bætur hafi verið ofgreiddar ber Tryggingastofnun að innheimta þær samkvæmt 55. gr. laga um almannatryggingar. Sú meginregla er ítrekuð í 9. gr. reglugerðar nr. 598/2009 um útreikning, endurreikning og uppgjör tekjutengdra bóta og vistunarframlags.

Í 6. mgr. 16. gr. laga um almannatryggingar kemur fram að Tryggingastofnun skuli hafa eftirlit með því að áætlaðar tekjur séu í samræmi við upplýsingar sem stofnunin afli úr staðgreiðsluskrá skattyfirvalda eða frá öðrum þeim aðilum sem getið sé um í 40. gr. laganna Í 1. málsl. 1. mgr. 45. gr. laga um almannatryggingar kemur fram að Tryggingastofnun skuli reglubundið sannreyna réttmæti bóta, greiðslna og upplýsinga sem ákvörðun um réttindi byggist á. Samkvæmt 2. mgr. sömu greinar er Tryggingastofnun heimilt að endurskoða grundvöll bótaréttar hvenær sem er og samræma bætur þeim breytingum sem hafi orðið á aðstæðum greiðsluþega.

Í 5. mgr. 16. gr. laga um almannatryggingar kemur fram að til grundvallar bótaútreikningi hvers mánaðar skuli leggja 1/12 af áætluðum tekjum bótagreiðsluársins og að bótagreiðsluár sé almanaksár, en sé um nýja umsókn að ræða skuli bótaréttur reiknaður út frá þeim tekjum umsækjanda sem aflað er frá þeim tíma sem bótaréttur stofnaðist. Samkvæmt a. lið 1. mgr. 7. gr. reglugerðar nr. 598/2009 skal Tryggingastofnun við endurreikning bóta til þeirra sem fengu greiðslur hluta úr bótagreiðsluári, byggja á upplýsingum úr staðgreiðsluskrá skattyfirvalda þegar um er að ræða tekjur sem eru staðgreiðsluskyldar samkvæmt lögum nr. 45/1987 um staðgreiðslu opinberra gjalda. Eingöngu ber að líta til tekna þeirra mánaða sem bótaréttur var fyrir hendi í. 

Við úrlausn þessa máls hefur úrskurðarnefnd velferðarmála hliðsjón af þeim lagaákvæðum sem tilgreind hafa verið hér að framan.

Samkvæmt gögnum málsins sendi kærandi Tryggingastofnun tekjuáætlun, dags. 7. febrúar 2020, vegna fyrirhugaðrar töku ellilífeyris frá 1. apríl 2020 þar sem hann gerði ráð fyrir 1.820.000 kr. í lífeyrissjóðstekjur. Með bréfi, dags. 13. mars 2021, samþykkti Tryggingastofnun umsókn kæranda um ellilífeyri og sendi honum nýja tekjuáætlun þar sem gert var ráð fyrir 2.670.135 kr. í lífeyrissjóðstekjur. Kærandi gerði ekki athugasemdir við þá áætlun og voru bótaréttindi því reiknuð og bætur greiddar út í samræmi við þær tekjuforsendur frá 1. apríl 2020. Í kjölfar samtímaeftirlits Tryggingastofnunar við staðgreiðsluskrá í september 2020 kom í ljós að kærandi var með hærri lífeyrissjóðstekjur á árinu, auk launatekna. Var í kjölfarið útbúin ný tekjuáætlun, dags. 11. september 2020, þar sem gert var ráð fyrir 5.033.782 kr. í lífeyrissjóðstekjur og 3.166.135 kr. í launatekjur. Í framangreindu bréfi var kærandi upplýstur um áætlaða kröfu að fjárhæð 736.036 kr., að teknu tilliti til staðgreiðslu fyrir framangreint tímabil. Kærandi lagði fram breytta tekjuáætlun 15. september 2020 þar sem lífeyrissjóðstekjur voru lækkaðar í 3.460.787 kr. og launatekjur í 188.000 kr. á árinu. Með bréfi Tryggingastofnunar, dags. 23. september 2020, var beiðni kæranda um breytingu á tekjuáætlun samþykkt og hann upplýstur um lækkun kröfu í 264.209 kr. Kærandi gerði ekki athugasemdir við þá áætlun. Bótaréttindi voru því reiknuð og bætur greiddar út miðað við þær forsendur út árið 2020.

Samkvæmt upplýsingum skattyfirvalda vegna tekjuársins 2020 reyndust tekjur kæranda frá 1. apríl 2020 til 31. desember 2020 hafa verið 1.691.062 kr. í launatekjur, 3.603.732 kr. í lífeyrissjóðstekjur, 1.960.000 kr. greiðslur úr séreignarsjóði og 17.571 kr. í fjármagnstekjur, sameiginlegar með maka. Þá voru dregnar frá 33.006 kr. í iðgjald í lífeyrissjóð og 63.661 kr. í iðgjald í séreignarsjóð. Launatekjur og lífeyrissjóðstekjur eru tekjustofnar sem hafa áhrif við útreikning Tryggingastofnunar á bótafjárhæð, sbr. 2. mgr. 16. gr. laga um almannatryggingar og 1. tölul. A-liðar 7. gr. laga um tekjuskatt. Samkvæmt 4. mgr. 16. gr. laga um almannatryggingar hafa greiðslur úr séreignarsjóði ekki áhrif á greiðslu ellilífeyris. Endurreikningur Tryggingastofnunar á tekjutengdum bótagreiðslum vegna níu mánaða ársins leiddi í ljós að kærandi hafði fengið ofgreitt í bótaflokkunum ellilífeyrir og orlofs- og desemberuppbót, samtals að fjárhæð 582.107 kr., að teknu tillit til endurgreiddrar staðgreiðslu.

Ástæða þess að endurkrafa myndaðist á hendur kæranda er sú að launatekjur og lífeyrissjóðstekjur voru vanáætlaðar í tekjuáætlun. Tryggingastofnun greiðir tekjutengdar bætur á grundvelli upplýsinga úr tekjuáætlun viðkomandi greiðsluþega. Þá ber stofnuninni lögum samkvæmt að endurreikna bætur með hliðsjón af upplýsingum skattyfirvalda og innheimta ofgreiddar bætur.

Ágreiningur málsins varðar þann tekjulið í skattframtali kæranda þar sem fram koma upplýsingar um launatekjur, þar með taldar orlofsgreiðslur. Kærandi gerir athugasemdir við að stofnunin hafi ekki tekið tillit til þess að umræddar tekjur hafi verið vegna tímabils fyrir töku ellilífeyris þó svo að þær greiðslur hafi verið greiddar eftir töku ellilífeyris. Fyrir liggur að kærandi fékk greidd laun á árinu 2020, eftir töku ellilífeyris, sem voru vegna afturvirkra launabreytinga og orlofsgreiðslna. Kærandi gerir þær kröfur að tekið verði tillit til þess við endurreikning ársins 2020.

Úrskurðarnefnd velferðarmála telur ljóst að kærandi hafi fengið greiðslur frá vinnuveitanda eftir töku ellilífeyris vegna fyrra tímabils. Úrskurðarnefndin horfir til þess að umræddar tekjur kæranda á árinu 2020 voru færðar á skattframtali kæranda vegna þess sama árs og að fram kemur í staðgreiðsluskrá að þær greiðslur voru greiddar eftir töku ellilífeyris. Samkvæmt a. lið 1. mgr. 7. gr. reglugerðar nr. 598/2009, skal Tryggingastofnun við endurreikning bóta til þeirra, sem fengu greiðslur hluta úr bótagreiðsluári, byggja á upplýsingum úr staðgreiðsluskrá skattyfirvalda þegar um er að ræða tekjur sem eru staðgreiðsluskyldar samkvæmt lögum nr. 45/1987 um staðgreiðslu opinberra gjalda. Eingöngu ber að líta til tekna þeirra mánaða sem bótaréttur var fyrir hendi í. Þá er Tryggingastofnun ekki heimilt að horfa fram hjá tekjum sem birtast á framtali bótaþega, enda kveður 7. mgr. 16. gr. laga um almannatryggingar skýrt á um að eftir að endanlegar upplýsingar um tekjur bótagreiðsluársins liggja fyrir við álagningu skattyfirvalda á opinberum gjöldum skuli stofnunin endurreikna bótafjárhæðir á grundvelli tekna samkvæmt þessari grein. Að þessu virtu fellst úrskurðarnefnd ekki á kröfu kæranda um að launatekjur hans vegna fyrra tímabils, sem greiddar voru eftir töku ellilífeyris 2020, skerði ekki tekjutengd bótaréttindi frá Tryggingastofnun ríkisins á árinu 2020.

Úrskurðarnefnd vill benda kæranda á að kanna þann möguleika að óska eftir breytingu á skattframtali og staðgreiðsluskrá hjá Skattinum.

Að öllu framangreindu virtu er það niðurstaða úrskurðarnefndar velferðarmála að staðfesta ákvörðun um endurreikning og uppgjör Tryggingastofnunar ríkisins á tekjutengdum bótum ársins 2020.

Ú R S K U R Ð A R O R Ð

Ákvörðun Tryggingastofnunar ríkisins um endurreikning og uppgjör á tekjutengdum bótum A, á árinu 2020, er staðfest.

F.h. úrskurðarnefndar velferðarmála

Rakel Þorsteinsdóttir