Úrskurðarnefnd velferðarmála

Mál nr. 353/2019

Miðvikudaginn 4. desember 2019

A

gegn

Tryggingastofnun ríkisins

Ú R S K U R Ð U R

Mál þetta úrskurða Rakel Þorsteinsdóttir lögfræðingur, Eva Dís Pálmadóttir lögfræðingur og Ásmundur Helgason lögfræðingur.

Með rafrænni kæru, móttekinni 28. ágúst 2019, kærði A, til úrskurðarnefndar velferðarmála ákvörðun Tryggingastofnunar ríkisins frá 21. ágúst 2019 um endurreikning og uppgjör tekjutengdra greiðslna ársins 2018.

I.  Málsatvik og málsmeðferð

Niðurstaða endurreiknings og uppgjörs tekjutengdra bóta ársins 2018 var sú að kæranda hefðu verið ofgreiddar bætur það ár að fjárhæð 1.288.119 kr., að teknu tilliti til endurgreiddrar staðgreiðslu. Með bréfi, dags. 21. ágúst 2019, var kæranda tilkynnt um framangreinda ofgreiðslu.

Kæra barst úrskurðarnefnd velferðarmála þann 28. ágúst 2019. Með bréfi, dags. 29. ágúst 2019, óskaði úrskurðarnefnd eftir greinargerð Tryggingastofnunar ríkisins ásamt gögnum málsins. Greinargerð Tryggingastofnunar barst með bréfi, dags. 10. september 2019, og var hún send kæranda til kynningar með bréfi úrskurðarnefndar, dags. 12. september 2019. Athugasemdir kæranda bárust með bréfi, dags. 19. september 2019, og voru þær sendar Tryggingastofnun ríkisins til kynningar með bréfi úrskurðarnefndar, dags. 20. september 2019. Efnislegar athugasemdir bárust ekki.   

II.  Sjónarmið kæranda

Í kæru er greint frá því að Tryggingastofnun sé að krefja kæranda um 1.288.119 kr. vegna ofgreiddra bóta ársins 2018. Kærandi hafi farið yfir greiðslur frá Tryggingastofnun á árinu 2018 og hafi komist að því að hann hafi einungis fengið greiddar samtals 832.605 kr. frá Tryggingastofnun. Farið sé fram á þetta verði leiðrétt og í staðinn verði honum gert að greiða 826.634 kr. Að öðrum kosti telji kærandi að það ætti að fella kröfuna niður þar sem hann hafi sýnt algjöran heiðarleika við gerð tekjuáætlana. Það sé hins vegar sök Tryggingastofnunar að hafa reiknað bætur hans rangt. Sökin sé alls ekki hans og þungt að ætla honum að endurgreiða slíka upphæð sem sé vegna mistaka stofnunarinnar.

Í athugasemdum kæranda, dags. 19. september 2019, er samantekt kæranda á greiðslum frá Tryggingastofnun á árinu 2018:

„2. maí: Kr. 114.820.

1. júní: Kr. 112.946

2. júlí: Kr. 124.753

1. ágúst: Kr. 112.946

3. sept.: Kr. 112.946

1. okt.: Kr. 78.935

1. nóv: Kr. 78.935

3. des.: Kr. 96.324“

Samkvæmt þessu hafi greiðslur Tryggingastofnunar til kæranda verið samtals 832.605 kr. á árinu 2018. Að frádregnum réttindum kæranda, sem hafi numið 5.971 kr., ætti Tryggingastofnun í raun að innheimta einungis 826.634 kr.

Að öðru leyti hafi kærandi sýnt í heiðarleika við gerð tekjuáætlana og samkvæmt bestu vitund á þeim tíma sem þær hafi verið gerðar. Það ætti því ekki að gera kæranda að blóraböggli fyrir hugsanleg mistök Tryggingastofnunar.

III.  Sjónarmið Tryggingastofnunar

Í greinargerð Tryggingastofnunar kemur fram að kærður sé endurreikningur tekjutengdra bóta ársins 2018.

Í 16. gr. laga nr. 100/2007 um almannatryggingar, með síðari breytingum, sé kveðið á um tilhögun útreiknings tekjutengdra bóta. Í 2. mgr. ákvæðisins sé vísað til laga nr. 90/2003 um tekjuskatt varðandi hvað skuli teljast til tekna. Til tekna samkvæmt III. kafla laga um almannatryggingar teljist tekjur samkvæmt II. kafla laga um tekjuskatt, að teknu tilliti til ákvæða 28. gr. sömu laga um hvað teljist ekki til tekna og frádráttarliða samkvæmt 1., 3., 4. og 5. tölul. A-liðar 1. mgr. 30. gr. og 31. gr. sömu laga eða undantekninga og takmarkana samkvæmt öðrum sérlögum.

Tryggingastofnun greiði lífeyri á grundvelli áætlunar um tekjur viðkomandi árs, sbr. 5. mgr. 16. gr. laga um almannatryggingar. Bótaþegi beri ábyrgð á því að slík tekjuáætlun endurspegli árstekjur og beri að breyta áætluninni ef svo sé ekki, sbr. 1. mgr. 39. gr. sömu laga og 3. gr. reglugerðar nr. 598/2009 um útreikning, endurreikning og uppgjör tekjutengdra bóta og vistunarframlags, en þar komi fram að bótaþega sé skylt að veita Tryggingastofnun allar nauðsynlegar upplýsingar til að hægt sé að taka ákvörðun um bótarétt, fjárhæð og greiðslu bóta og endurskoðun þeirra. Að sama skapi sé bótaþega skylt að tilkynna Tryggingastofnun um breytingar á tekjum eða öðrum aðstæðum sem geti haft áhrif á greiðslur.

Í 7. mgr. 16. gr. laga um almannatryggingar komi fram að þegar endanlegar upplýsingar um tekjur bótagreiðsluársins liggi fyrir við álagningu skattyfirvalda á opinberum gjöldum, skuli Tryggingastofnun endurreikna bótafjárhæðir á grundvelli tekna. Einnig sé fjallað um endurreikning í reglugerð nr. 598/2009 um útreikning, endurreikning og uppgjör tekjutengdra bóta og vistunarframlags. Tryggingastofnun hafi ekki heimild til að líta fram hjá tekjuupplýsingum sem fram komi í skattframtölum.

Til grundvallar útreikningi á tekjutengdum bótum hvers mánaðar skuli leggja 1/12 af áætluðum tekjum bótagreiðsluársins samkvæmt tekjuáætlun, sbr. 4. mgr. reglugerðar nr. 598/2009. Einnig komi fram að bótagreiðsluár sé almanaksár samkvæmt 2. gr. reglugerðarinnar og 5. mgr. 16. gr. laga um almannatryggingar.

Komi í ljós við endurreikning bóta að bætur hafi verið ofgreiddar fari um það samkvæmt 55. gr. laganna. Þar komi fram sú skylda Tryggingastofnunar til að innheimta ofgreiddar bætur. Sú meginregla sé ítrekuð í 9. gr. reglugerðar nr. 598/2009.

Á árinu 2018 hafi kærandi verið með réttindi til örorkulífeyris og tengdra greiðslna allt árið. Uppgjör tekjutengdra greiðslna ársins hafi leitt til 1.288.119 kr. ofgreiðslu, að teknu tilliti til greiddrar staðgreiðslu. Ástæða þess að endurkrafa hafi myndast sé sú að við samkeyrslu við tekjuupplýsingar af skattframtali 2019 vegna tekjuársins 2018, hafi komið í ljós að tekjur kæranda hafi reynst hærri en tekjuáætlun hafði gert ráð fyrir. Endurreikningur byggist á upplýsingum úr skattframtölum bótaþega.

Í lok árs 2017 hafi kærandi skilað inn tekjuáætlun vegna tekjuársins 2018. Tekjuáætlunin hafi gert ráð fyrir að kærandi hefði eingöngu 5.400.000 kr. í launatekjur. Einnig hafi verið gert ráð fyrir iðgjaldi í lífeyrissjóð til frádráttar að fjárhæð 231.684 kr. Á grundvelli þeirrar tekjuáætlunar hafi kærandi ekki fengið greiðslur 1. janúar til 30. apríl 2018.

Þann 19. apríl og 24. apríl hafi kærandi skilað inn nýjum tekjuáætlunum vegna tekjuársins 2018. Í áætluninni frá 19. apríl hafi eingöngu verið gert ráð fyrir 1.800.000 kr. í launatekjur. Einnig hafi verið gert ráð fyrir iðgjaldi í lífeyrissjóð til frádráttar að fjárhæð 72.000 kr. Áætlunin frá 24. apríl hafi gert ráð fyrir sömu tekjum en einnig lífeyrissjóðstekjum að fjárhæð 436.000 kr. Þann 25. apríl 2018 hafi Tryggingastofnun útbúið nýja tekjuáætlun á grundvelli tekjuáætlunar kæranda, dags. 19. apríl 2018, og hafi því ekki verið horft til lífeyrissjóðstekna kæranda. Kæranda hafi verið kynnt þessi nýja tekjuáætlun með bréfi, dags. 25. apríl 2018, og hafi hann ekki gert athugasemdir við hana. Kæranda hafi verið greitt eftir þessari áætlun í maí 2018 og kæranda hafi einnig verið greidd út inneign að fjárhæð 459.279 vegna tímabilsins 1. janúar til 30. apríl 2018.

Við reglubundið eftirlit Tryggingastofnunar í maí 2018 hafi komið í ljós að misræmi hafi verið á milli tekjuáætlunar kæranda og upplýsinga úr staðgreiðsluskrá RSK. Tryggingastofnun hafi útbúið nýja tillögu að tekjuáætlun á grundvelli upplýsinganna úr staðgreiðsluskrá og hafi kæranda verið sent bréf þann 11. maí 2018 þar sem tilkynnt hafi verið um hina nýju tillögu að tekjuáætlun. Samkvæmt henni hafi verið gert ráð fyrir að launatekjur yrðu óbreyttar en bætt hafi verið við lífeyrissjóðstekjum að fjárhæð 421.767 kr. Með sama bréfi hafi kæranda einnig verið tilkynnt um að búið væri áætla á hann kröfu vegna ofgreiddra bóta á tímabilinu 1. janúar til 31. maí 2018. Kæranda hafi verið greitt í samræmi við þessa áætlun til 30. september 2018.

Þann 20. september 2018 hafi kærandi skilað inn nýrri tekjuáætlun sem Tryggingastofnun hafi samþykkt að mestu. Sú áætlun hafi gert ráð fyrir að launatekjur yrðu 3.480.000 kr. á árinu 2018, en aðrar tekjur yrðu óbreyttar. Einnig hafi verið gert ráð fyrir 139.200 kr. iðgjaldi í lífeyrissjóð til frádráttar. Kæranda hafi verið greitt á grundvelli þeirrar tekjuáætlunar út árið 2018.

Í desember 2018 hafi aftur komið í ljós við reglubundið eftirlit Tryggingastofnunar að misræmi hafi verið á milli tekjuáætlunar kæranda og upplýsinga úr staðgreiðsluskrá RSK. Tryggingastofnun hafi búið til nýja tillögu að tekjuáætlun á grundvelli upplýsinga úr staðgreiðsluskrá og hafi kæranda verið sent bréf þann 11. desember 2018 þar sem tilkynnt hafi verið um hina nýju tillögu að tekjuáætlun. Í þeirri áætlun hafi verið gert ráð fyrir að launatekjur ársins yrðu hærri en gert hafi verið ráð fyrir eða 4.217.046 kr., lífeyrissjóðstekjur væru 421.767 kr. og aðrar tekjur 720.000 kr. Einnig hafi verið gert ráð fyrir iðgjaldi í lífeyrissjóð til frádráttar að fjárhæð 168.681 kr. Með sama bréfi hafi kæranda einnig verið tilkynnt um að búið væri að áætla á hann kröfu vegna ofgreiddra bóta á tímabilinu 1. janúar til 31. desember 2018. Þar sem búið hafi verið að greiða kæranda fyrir allt árið 2018 á þessum tímapunkti hafi ekki verið hægt að breyta greiðslum til hans á grundvelli nýrrar tekjuáætlunar.

Við bótauppgjör ársins 2018 hafi komið í ljós að endanlegar tekjur kæranda hafi verið 4.153.098 kr. í launatekjur, 826.690 kr. í atvinnuleysisbætur, 426.924 kr. í lífeyrissjóðstekjur, 720.000 kr. aðrar tekjur og 88.181 kr. í vexti og verðbætur. Einnig hafi verið tekið tillit til þess að greiddar höfðu verið 198.959 kr. í iðgjald til lífeyrissjóðs og 163.565 kr. í iðgjald í séreignarsjóð sem hafi komið til frádráttar.

Tryggingastofnun sé skylt lögum samkvæmt að framkvæma endurreikning ár hvert þegar endanlegar upplýsingar um tekjur bótagreiðsluársins liggi fyrir við álagningu skattyfirvalda á opinberum gjöldum. Tryggingastofnun sé ekki heimilt að horfa fram hjá tekjum sem birtist á framtali bótaþega, eins og ítrekað hafi verið staðfest af úrskurðarnefnd og hafi einnig verið staðfest fyrir dómstólum.

Niðurstaða endurreiknings tekjutengdra bóta ársins 2018 hafi verið sú að kærandi hafi fengið ofgreitt að fullu í öllum bótaflokkum, nema orlofs- og desemberuppbætur. Kærandi hafði fengið 2.048.657 kr. greiddar á árinu en hefði með réttu átt að fá 5.971 kr. Þessi mismunur hafi leitt til ofgreiðslu að fjárhæð 1.288.119 kr. að teknu tilliti til endurgreiddrar staðgreiðslu.

Í kæru sé því haldið fram að kærandi hafi eingöngu fengið greiddar samtals 832.605 kr. frá Tryggingastofnun árið 2018. Ekki komi fram úr hvaða gögnum kærandi hafi þessa fjárhæð en fullyrðing hans sé ekki rétt. Kærandi hafi fengið greiddar 2.048.657 kr. á árinu. Vísað er í greiðsluseðla vegna ársins 2018 og yfirlit yfir greiðslur til kæranda vegna ársins 2018.

Einnig komi fram að kærandi telji að það eigi að fella niður kröfuna gagnvart sér þar sem hann hafi sýnt algjöran heiðarleika við gerð tekjuáætlana sinna. Tryggingastofnun vilji í því samhengi taka fram að krafan sé réttmæt og sé aðallega tilkomin vegna rangra tekjuáætlana kæranda. Krafan sé aðallega tilkomin vegna vanáætlaðra launatekna kæranda en einnig hafi kærandi aldrei gefið stofnuninni upp ýmsar tekjur sem hann hafði, þ.e., atvinnuleysisbætur, fjármagnstekjur eða þær tekjur sem falli undir flokkinn aðrar tekjur. Eins og fram hafi komið hafi kærandi skilað inn tveimur tekjuáætlunum í apríl 2018, annars vegar rafrænt þann 19. apríl og hins vegar skriflega þann 24. apríl. Í annarri áætluninni hafi komið fram áætlaðar lífeyrissjóðtekjur sem því miður hafi farist fyrir að setja í tillögu Tryggingastofnunar að tekjuáætlun þann 25. apríl 2018. Kæranda hafi hins vegar verið tilkynnt um þá áætlun og hafði ekki gert athugasemdir við hana.

Einnig vilji Tryggingastofnun taka það fram að kærandi hafi ekki sótt um niðurfellingu á grundvelli félagslegra og fjárhagslegra aðstæðna í samræmi við 11. gr. reglugerðar nr. 598/2009. Vilji kærandi að Tryggingastofnun taki afstöðu til þess þurfi erindi þess efnis að berast stofnuninni til þess að hægt sé að taka ákvörðun í málinu.

Með vísun til framanritaðs telji Tryggingastofnun ekki forsendur til að breyta fyrri ákvörðun sinni.

IV.  Niðurstaða

Mál þetta varðar ákvörðun Tryggingastofnunar ríkisins um endurreikning og uppgjör á tekjutengdum bótum kæranda vegna ársins 2018.

Kærandi fékk greiddar tekjutengdar bætur frá Tryggingastofnun ríkisins á árinu 2018. Samkvæmt 39. gr. laga nr. 100/2007 um almannatryggingar, með síðari breytingum, er umsækjanda eða greiðsluþega skylt að veita stofnuninni allar nauðsynlegar upplýsingar til að hægt sé að taka ákvörðun um bótarétt, fjárhæð og greiðslu bóta og annarra greiðslna samkvæmt lögunum og endurskoðun þeirra. Enn fremur er skylt að tilkynna stofnuninni um breytingar á tekjum eða öðrum aðstæðum sem geta haft áhrif á bætur eða greiðslur. Af framangreindu verður ráðið að sú skylda hvíli á greiðsluþegum að upplýsa Tryggingastofnun um tekjur á bótagreiðsluári sem kunna að hafa áhrif á bótarétt.

Í 16. gr. laga um almannatryggingar er kveðið á um tekjutengingu lífeyristrygginga og hvernig Tryggingastofnun ríkisins skuli standa að útreikningi bóta. Í 2. mgr. 16. gr. laga um almannatryggingar segir að til tekna samkvæmt III. kafla skuli telja tekjur samkvæmt II. kafla laga nr. 90/2003 um tekjuskatt með tilteknum undantekningum. Á grundvelli 7. mgr. 16. gr. þeirra laga ber Tryggingastofnun ríkisins að endurreikna bótafjárhæðir eftir að endanlegar upplýsingar um tekjur bótagreiðsluárs liggja fyrir við álagningu skattyfirvalda á opinberum gjöldum. Ef í ljós kemur við endurreikning að bætur hafi verið ofgreiddar ber Tryggingastofnun að innheimta þær samkvæmt 55. gr. laga um almannatryggingar. Sú meginregla er ítrekuð í 9. gr. reglugerðar nr. 598/2009 um útreikning, endurreikning og uppgjör tekjutengdra bóta og vistunarframlags.

Við úrlausn þessa máls hefur úrskurðarnefnd velferðarmála hliðsjón af þeim lagaákvæðum sem tilgreind hafa verið hér að framan.

Í lok árs 2017 skilaði kærandi inn til Tryggingastofnunar tekjuáætlun vegna ársins 2018 þar sem hann gerði ráð fyrir að vera með 5.400.000 kr. í laun á árinu og að iðgjald í lífeyrissjóð yrði 231.684 kr. Með bréfi Tryggingastofnunar, dags. 9. janúar 2018, var tekjuáætlunin staðfest og voru bótaréttindi reiknuð út frá þeim forsendum. Kærandi skilaði inn nýrri tekjuáætlun þann 19. apríl 2018 þar sem hann gerði ráð fyrir 1.800.000 kr. í laun á árinu og að iðgjald í lífeyrissjóð yrði 216.000 kr. Kærandi skilaði enn nýrri tekjuáætlun 24. apríl 2018 þar sem hann gerði ráð fyrir sömu launatekjum og áður en lækkaði áætlað iðgjald í lífeyrissjóð í 72.000 kr., auk þess sem hann gerði ráð fyrir 436.000 kr. frá lífeyrissjóði. Í kjölfarið útbjó Tryggingastofnun nýja tekjuáætlun, dags. 25. apríl 2019, þar sem gert var ráð fyrir að kærandi væri með 1.800.000 kr. í launatekjur og 72.000 kr. í iðgjald í lífeyrissjóð en stofnunin tilgreindi ekki lífeyrissjóðstekjur kæranda. Jafnframt var kærandi upplýstur um að 459.279 kr. inneign hafi verið greidd vegna breyttra tekjuforsendna. Kærandi gerði ekki athugasemd við þá áætlun.

Í kjölfar samtímaeftirlits Tryggingastofnunar við staðgreiðsluskrá Ríkisskattstjóra kom í ljós að kærandi var með lífeyrissjóðstekjur. Var því útbúin ný tekjuáætlun, dags. 11. maí 2018, þar sem gert var ráð fyrir greiðslum frá lífeyrissjóði að fjárhæð 421.767 kr. og sömu launatekjum og iðgjaldi í lífeyrissjóð og áður. Þá var kærandi einnig upplýstur um áætlaða kröfu að fjárhæð 9.368 kr., að teknu tilliti til staðgreiðslu skatta. Kærandi gerði ekki athugasemdir við þá áætlun. Kærandi skilaði inn nýrri tekjuáætlun í september 2018 þar sem hann gerði ráð fyrir að launatekjur hans yrðu 3.480.000 kr. en að aðrar tekjur væru óbreyttar. Í kjölfarið útbjó Tryggingastofnun nýja tekjuáætlun, dags. 21. september 2018, með hinum nýju tekjuupplýsingum, þó með þeirri breytingu að iðgjald í lífeyrissjóð var hækkað í 139.200 kr. Kærandi var upplýstur í bréfinu um áætlaða kröfu að fjárhæð 308.348 kr. Kærandi gerði ekki athugasemd við þá áætlun. Við samtímaeftirlit Tryggingastofnunar við staðgreiðsluskrá Ríkisskattstjóra í desember kom í ljós að tekjur kæranda reyndust hærri en gert hafi verið ráð fyrir í tekjuáætlun. Var í kjölfarið útbúin ný tekjuáætlun, dags. 11. desember 2018, þar sem gert var ráð fyrir 4.217.046 kr. í launatekjur, 720.000 kr. í aðrar tekjur, 168.681 kr. í iðgjald í lífeyrissjóð en lífeyrissjóðstekjur kæranda reyndust óbreyttar. Þá var kærandi jafnframt upplýstur um áætlaða kröfu að fjárhæð 970.403 kr.

Samkvæmt upplýsingum úr skattframtali kæranda, vegna tekjuársins 2018, reyndust tekjur kæranda hafa verið 4.153.098 kr. í launatekjur, 826.690 kr. í atvinnuleysisbætur, 426.924 kr. í lífeyrissjóðstekjur, 720.000 kr. í aðrar tekjur, iðgjald til frádráttar reyndust annars vegar vera 198.959 kr. í lífeyrissjóð og hins vegar í 163.565 kr. séreignasjóð, auk 88.181 kr. í fjármagnstekjur. Endurreikningur Tryggingastofnunar á tekjutengdum bótagreiðslum vegna ársins 2018 leiddi í ljós að kærandi hafi ekki átt rétt á neinum greiðslum á árinu, að undanskildum orlofs- og desemberuppbótum. Samtals reyndist ofgreiðsla ársins vera 1.288.119 kr., að teknu tilliti til endurgreiddrar staðgreiðslu. Kærandi hefur verið krafinn um endurgreiðslu þeirrar fjárhæðar.

Úrskurðarnefndin telur ljóst að ástæða þess að endurkrafa myndaðist á hendur kæranda sé sú að tekjur hans voru vanáætlaðar í framangreindum tekjuáætlunum. Samkvæmt b-lið 1. mgr. 1. gr. reglugerðar nr. 1190/2017 um fjárhæðir frítekjumarka (tekjumarka) almannatrygginga og félagslegrar aðstoðar fyrir árið 2018, var efra frítekjumark 4.728.788 kr. vegna örorkulífeyris samkvæmt 5. mgr. 18. gr. laga um almannatryggingar. Samkvæmt fyrirliggjandi gögnum voru tekjur kæranda á árinu 2018 hærri en framangreint tekjumark segir til um og því átti hann ekki rétt á greiðslu bóta á því ári.

Kærandi vísar til þess að hann hafi ekki fengið þá fjárhæð greidda frá Tryggingastofnun sem hann sé krafinn um þar sem hann hafi einungis fengið greiddar 832.605 kr. Við skoðun gagna málsins telur úrskurðarnefnd velferðarmála ljóst að kæranda hafi yfirsést greiðsla frá Tryggingastofnun, dags. 25. apríl 2018, að fjárhæð 459.279 kr. og því fellst úrskurðarnefndin ekki á þá málsástæðu kæranda.

Með hliðsjón af öllu framangreindu er ákvörðun um endurreikning og uppgjör Tryggingastofnunar ríkisins á tekjutengdum bótum kæranda vegna ársins 2018 staðfest.

Kærandi byggir á því að hann hafi sýnt algjöran heiðarleika við gerð tekjuáætlana sinna. Úrskurðarnefndin telur því rétt að taka undir þá ábendingu sem kemur fram í greinargerð Tryggingastofnunar að kærandi geti lagt inn beiðni um niðurfellingu endurgreiðslukröfunnar til stofnunarinnar á grundvelli undanþáguákvæðis 11. gr. reglugerðar nr. 598/2009 um útreikning, endurreikning og uppgjör tekjutengdra bóta og vistunarframlags, telji hann skilyrði ákvæðisins uppfyllt. Þar kemur fram að heimilt sé að falla frá endurkröfu að fullu eða að hluta ef alveg sérstakar aðstæður séu fyrir hendi. Þá skuli einkum litið til fjárhagslegra og félagslegra aðstæðna greiðsluþega og þess hvort hann hafi verið í góðri trú um greiðslurétt sinn.

Ú R S K U R Ð A R O R Ð

Ákvörðun Tryggingastofnunar ríkisins um endurreikning og uppgjör á tekjutengdum bótum A, á árinu 2018, er staðfest.

F.h. úrskurðarnefndar velferðarmála

                                                                                                                                                                                               Rakel Þorsteinsdóttir