Mál nr. 52/2021 Úrskurður 26. maí 2021

Mál nr. 52/2021                     Eiginnafn:      Elizabeth (kvk.)

Hinn 26. maí 2021 kveður mannanafnanefnd upp svohljóðandi úrskurð í máli 52/2021, en erindið barst nefndinni 4. maí.

Til þess að heimilt sé að samþykkja nýtt eiginnafn þurfa öll skilyrði 5. gr. laga, nr. 45/1996, um mannanöfn að vera uppfyllt. Skilyrðin eru:

• Eiginnafn skal geta tekið íslenska eignarfallsendingu eða hafa unnið sér hefð í íslensku máli.
• Nafnið má ekki brjóta í bág við íslenskt málkerfi.
• Það skal ritað í samræmi við almennar ritreglur íslensks máls nema hefð sé fyrir öðrum rithætti þess.
• Eiginnafn má ekki vera þannig að það geti orðið nafnbera til ama.

Ritháttur nafnsins Elizabeth er ekki í samræmi við almennar ritreglur íslensks máls þar sem bókstafurinn z er ekki í íslenska stafrófinu auk þess sem samstafan th kemur ekki fyrir í ósamsettum orðum í íslensku. Er því aðeins unnt að samþykkja ritháttinn Elizabeth að hefð sé fyrir honum.

Við túlkun mannanafnanefndar á hugtakinu hefð í 5. og 6. gr. laga um mannanöfn er stuðst við eftirfarandi vinnulagsreglur sem nefndin setti sér á fundi 19. janúar 2015 og eru byggðar á greinargerð með frumvarpi að mannanafnalögum og eldri vinnulagsreglum:

1.   Ungt tökunafn telst hafa unnið sér hefð í íslensku máli ef það fullnægir einhverju eftirfarandi skilyrða:

1. Það er nú borið af a.m.k. 15 Íslendingum;
2. Það er nú borið af 10–14 Íslendingum og hinn elsti þeirra hefur náð a.m.k. 30 ára aldri;
3. Það er nú borið af 5–9 Íslendingum og hinn elsti þeirra hefur náð a.m.k. 60 ára aldri;
4. Það er nú borið af 1–4 Íslendingum og kemur þegar fyrir í manntalinu 1910 eða 1920;
5. Það er ekki borið af neinum Íslendingi nú en kemur a.m.k. fyrir í tveimur manntölum frá 1703–1920.

2.  Með Íslendingum er átt við þá sem öðlast hafa íslenskan ríkisborgararétt án umsóknar og eiga eða hafa átt lögheimili á Íslandi.

3.  Tökunafn getur verið hefðað, þó að það komi ekki fyrir í manntölum, ef það hefur unnið sér menningarhelgi. Nafn telst hafa unnið sér menningarhelgi komi það fyrir í alkunnum ritum, frumsömdum og þýddum, í nafnmynd sem ekki brýtur í bág við íslenskt málkerfi.

Tekið skal fram að vinnulagsreglurnar eru mannafnanefnd til stuðnings við mat sitt, en ekki ráðandi um niðurstöðuna bendi önnur atriði engu að síður til þess að ritháttur nafns hafi hefðast.

Samkvæmt upplýsingum frá Þjóðskrá Íslands bera sextán konur sem uppfylla skilyrði vinnulagsreglnanna eiginnafnið Elizabeth í þjóðskrá og sú elsta er fædd 1963. Nafnið kemur auk þess fyrir í að minnsta kosti tveimur manntölum frá 1703–1920. Telur mannanafnanefnd því að hefð sé fyrir rithættinum Elizabeth. 

Úrskurðarorð:

Beiðni um eiginnafnið Elizabeth (kvk.) er samþykkt og skal fært á mannanafnaskrá sem ritháttur eiginnafnsins Elísabet (kvk.).