Ríkisstjórn

Þegar ný ríkisstjórn tekur við völdum er birt stefnuyfirlýsing þar sem talin eru upp þau mál sem ríkisstjórnin hyggst vinna að á kjörtímabilinu.

Ríkisstjórnarfundir eru fundir allra ráðherra sem sæti eiga í ríkisstjórn Íslands. Forsætisráðherra stýrir ríkisstjórnarfundum sem alla jafna eru haldnir tvisvar í viku á starfstíma Alþingis. Á fundunum eru m.a. rædd mikilvæg stjórnarmálefni og stjórnarfrumvörp og stjórnartillögur sem ráðherrar hyggjast leggja fram á Alþingi. Dagskrár ríkisstjórnarfunda eru birtar á vef Stjórnarráðsins.

Forsætisráðherra getur ákveðið, með samþykki ríkisstjórnar, að skipa ráðherranefndir til að fjalla um einstök mál eða málaflokka. Hlutverk ráðherranefnda er að efla samráð og samstarf á milli ráðherra og ráðuneyta þeirra og tryggja samhæfingu ef málefnasvið skarast og til að undirbúa mál til framlagningar í ríkisstjórn.

Ríkisstjórn starfar í samræmi við reglur um starfshætti ríkisstjórnar og siðareglur sem ríkisstjórnin setur sér.

Við upphaf þings er birt þingmálaskrá ríkisstjórnar. Þingmálaskrá er listi yfir þau stjórnarfrumvörp, stjórnartillögur og skýrslur sem ráðherrar hyggjast leggja fyrir Alþingi á komandi þingi.

Ríkisráð er skipað ráðherrum og forseta Íslands sem jafnframt stýrir fundum þess. Í ríkisráði eru lög og aðrar mikilvægar stjórnarráðstafnir bornar upp við forseta til staðfestingar.