2007 - Ávarp fjallkonunnar

Að eiga sér stað

í staðlausum heimi

eiga þar heima

eiga heima í heimi

eins og ekkert sé.

Eiga þar

varnarþing

viðspyrnu

vé.

Að eiga sér mál

í málóðum heimi

sækja í þann sjóð

sagnir

fræði

ljóð

enn og aftur

geta ekki hætt að gruna

né gleymt að muna.

Að eiga sér fjall

í flötum heimi

eiga þar skjól

skína við sól

láta sér lynda

leik regns og vinda.

Eiga þar

mark

mið

kennileiti.

Fjall

að horfa á

inn til lands

að horfa af

út yfir haf.

Fjall

kona

karl

er allt

sem

þarf

í arf.

Það er sú þrenning

sem rímar á móti menning.

Skáld: Þórarinn Eldjárn

Fjallkona: Sólveig Arnarsdóttir