Hæstvirtur forseti. Góðir Íslendingar.

Starfið er margt, en eitt er bræðrabandið
boðorð, hvar sem þér í fylking standið,
hvernig sem stríðið þá og þá er blandið,
það er: að elska, byggja og treysta á landið.

Þannig kvað fyrsti ráðherra Íslands, Hannes Hafstein.

Hann var eldhugi, sem brýndi aldamótakynslóðina til starfa. Íslendingar voru ein fátækasta þjóð veraldar fyrir eitt hundrað árum, nú þjóð í fremstu röð, sem býður þegnum sínum góð lífskjör, velmegun, menntun og gott öryggisnet fyrir þá sem minna mega sín.

Lífbeltin eru tvö, hafið og landið sjálft. Orka fallvatna og hitinn í iðrum jarðar eru okkar olíuauðlindir. “Hve mætti bæta lands og lýðs vors kjör að leggja á bogastreng þinn kraftsins ör,” kvað Einar Benediktsson. Það er dugnaðar- og framkvæmdahugurinn sem hefur sett Ísland og Íslendinga í fremstu röð.

Stjórnmálamennirnir hafa gefið vilja einstaklingsins frelsi, við höfum ekki fest í ofstjórn margra þjóða sem deyða dugnað, drepa framtak og þurfa í dag hjálp vestrænna ríkja.

Á Alþingi er nú að taka völd ný kynslóð þingmanna, kynslóð nýrra aldar. Allt það fólk vill vel og mun eflaust setja mark sitt á Alþingi næstu áratugi. Megi þessum nýju þingmönnum vegna vel. Minnist þess að þið eruð hingað kvödd til þjónustu við fólkið í landinu. Standið vörð um frelsi landsins og þau góðu lífskjör sem hér hafa þróast. Óvægin umræða og persónulegar árásir skaðar stjórnmálamennina sjálfa og vekur upp hatur sem fjarlægir okkur frá fólkinu sem í landinu býr og rýrir traust manna á Alþingi.

Gefum þjóðinni og unga fólkinu bjartsýni og trú og höldum vörð um kristið siðgæði. Heimsendaumræðan er til þess fallin að fólkið okkar fer að trúa því að hér sé allt á hverfandi hveli og það flytur úr landi.

Fyrir þúsund árum trúlofaðist Alþingi Íslendinga kristinni kirkju á Þingvöllum, það var gæfuspor. Löggjafarþingið og þjóðkirkjan hafa síðan haldist í hendur. Þetta samstarf er partur af okkar þjóðskipulagi og menningu. Ég og minn flokkur, Framsóknarflokkurinn, viljum ekki höggva á þann þráð. Samstarf ríkis og kirkju hafa í þúsund ár mótað öfluga þjóð og sterkan þjóðarvilja. Siðfræðigildi kristinnar trúar á meira erindi til okkar en oft áður. Löggjafarþingið og þjóðkirkjan eiga að halda utan um sitt samstarf áfram.

Kosningarnar í vor voru varnarsigur þeirra sem vildu áfram. Ríkisstjórnin hafði þó á átta árum lagt grunn að öflugra Íslandi, lífskjör Íslendinga batnað um 30%, lægstu laun og tryggingabætur til þeirra verst settu hækkað um 50%, atvinna mikil í landinu og þúsundir Íslendinga flust á ný heim frá útlöndum.

Þessi ríkisstjórn er ekki biðstjórn, hún hefur teflt sóknarskák. Mörg stærstu málin sem hagvöxtinn skapa og bætt lífskjör hafa kostað stjórnarflokkana svita og baráttu. Ríkisstjórnin hefur mætt ótrúlegri andstöðu af hálfu Samfylkingar og Vinstri-Grænna. Landið er enn að rísa og lífskjör halda áfram að batna. Hagvöxtur fer hæst í 5-6%. Skattar launafólks verða lækkaðir um 20 milljarða og barnafjölskyldur eiga fyrirheit um 3 milljarða til tiltekinna verkefna til viðbótar.

Þjóðin kaus áframhaldandi hagvöxt og stöðugleika. Traust ríkir á milli ríkisstjórnarflokkanna og ég efast ekki um að það mun haldast út kjörtímabilið.
Samstarf Framsóknarflokks og Sjálfstæðisflokks síðustu átta árin hefur skilað ótrúlegum árangri, sem vakið hefur verðskuldaða athygli í hinum vestræna heimi. Lág verðbólga, lítið atvinnuleysi, stöðugur hagvöxtur og lækkun skulda ríkissjóða.
Áframhaldandi samstarf okkar Framsóknarmanna við Sjálfstæðisflokkinn var ekki sjálfgefið, en með tilliti til stefnu stjórnarandstöðuflokkanna og hvernig kosningabaráttunni var háttað af þeirra hálfu, var það okkar niðurstaða.

Utanríkismál:
Ísland hefur tekið vaxandi þátt í alþjóðlegu samstarfi.

Framboð í Öryggisráð Sameinuðu þjóðanna 2008 – 2009 sýnir vaxandi sjálfstraust okkar í samfélagi þjóðanna þótt smáir séu á mælikvarða íbúafjölda.

Á Balkanskaga hefur Ísland tekið þátt í uppbyggingarstarfi eftir stríðið þar og alþjóðasamfélagið leitaði eftir þátttöku okkar í þeim verkefnum.

Öryggismál og varnir gegn hryðjuverkum hafa verið fyrirferðarmikill málaflokkur í vestrænum samfélögum á síðustu árum. Mikilvægt er að Íslendingar hugi vel að öryggi borgaranna á viðsjárverðum tímum.

Grundvöllur okkar í varnar- og öryggismálum er varnarsamningurinn við Bandaríkin, aðild að NATO og ekki síst aðild að Sameinuðu Þjóðunum.

Ríkisstjórnin hefur sýnt festu og ákveðni í samskiptum við Bandaríkin varðandi breytingar á tvíhliða varnarsamningi þjóðanna. Mikilvægt er að ekki verði dregið úr varnarmætti á Keflavíkurflugvelli.

Sjávarútvegur:
Sjávarútvegur hefur á síðustu árum stóraukið framlegð. Byggð hafa verið upp öflug fyrirtæki, sem hafa verið þess megnug að greiða góð laun. Þetta er árangur festu og stöðugleika í stjórnun fiskveiða, markaðsaðstæður hafa verið hagstæðar og afkastageta fiskistofna hefur á heildina litið verið góð.

Margt bendir til að markaðsaðstæður sjávarafurða verði óhagstæðari á næstu árum. Því er mikilvægt að ríki stöðugleiki í atvinnugreininni og í fiskveiðistjórnun svo greininni auðnist að keppa við vaxandi fiskiðnað frá ríkjum í Asíu sem búa við lágan kostnað, ekki síst launakostnað sem er í mörgum tilfellum innan við 10% af því sem hann er hér á landi.

Landbúnaður:
Staða landbúnaðar á Íslandi hefur batnað í tíð núverandi ríkisstjórnar. Kjör kúabænda hafa batnað verulega og er nú eru kúabændur ekki flokkaðir sem láglaunastétt. Þetta er góður árangur, sem ber að verja með nýjum samningi.

Verulegur vöxtur hefur verið í kornrækt og skógrækt er að festa sig í sessi sem ný atvinnugrein.

Stórkostlegur vöxtur er í fiskeldi, bæði í lax og bleikju, sem skapar aukna atvinnu og vaxandi útflutningstekjur.

Því er ekki að neita að kjör sauðfjárbænda hafa versnað og eru með öllu óviðunandi. Erfiðleikar í sauðfjárframleiðslu stafa fyrst og fremst af óeðlilegri samkeppnisstöðu á kjötmarkaði. Vonir standa til að jafnvægi komist á kjötmarkaðinn fyrir lok næsta árs. Óhjákvæmilegt er að ríkisvaldið bregðist við þessum tímabundna vanda sauðfjárbænda. Á næstu vikum á ég von á tillögum stjórnskipaðrar nefndar um hvernig við verði brugðist og í framhaldi af því mun ríkisstjórnin taka málið til umfjöllunar.

Árangur í landbúnaði á Íslandi á síðustu tveimur áratugum hefur verið ótrúlegur. Útgjöld vísitölufjölskyldunnar til matarkaupa sem hlutfall heildarútgjalda hefur lækkað á því tímabili úr 25% í 15%, eða um 40%. Á sama tíma hafa útgjöld ríkissjóðs til landbúnaðarins sem hlutfall heildarútgjalda ríkissjóðs lækkað úr 12% í rúm 4%, eða með öðrum orðum; útgjöldin eru sem hlutfall aðeins 1/3 þess sem var fyrir tveimur áratugum.

Landbúnaðarvörur hafa hækkað minnst allra vara á Íslandi á síðustu árum.

Viðskiptalífið:
Mikill kraftur er nú í íslensku viðskiptalífi. Bankar og fjármálafyrirtæki eru í útrás með starfsemi á erlendri grundu. Þetta er jákvætt.
Hinsvegar er innkoma banka í íslensk fyrirtæki sem ráðandi eigendur ekki æskileg. Skoða þarf hvort aðskilja eigi með löggjöf starfsemi viðskiptabanka annarsvegar og fjárfestingarbanka hinsvegar. Traust og trúnaður verður að ríkja í öllum bankaviðskiptum.
Ef til vill eru þetta einungis vaxtarverkir í atvinnustarfsemi, sem er í mikilli sókn og hröðum vexti.


100 ára afmæli heimastjórnarinnar

100 ára afmæli innlendrar stjórnar 1. febrúar á næsta ári eru merk tímamót. Samfelld sigurganga íslenskrar þjóðar í 100 ár á að vera okkur hvatning til enn frekari sóknar á eigin forsendum og á eigin ábyrgð.

(Talað orð gildir)