Kæru gestir

Það er mér sönn ánægja að vera með ykkur hér í dag. Fyrir ári síðan vorum við stödd í Borgarnesi þar sem skrifað var undir fyrsta samkomulagið um ábyrga ferðahegðun undir nafninu Icelandic pledge. Loforðin átta um  ferðahegðun eiga jafn vel við í dag og fyrir ári síðan. Það er því vel við hæfi nú að „endurnýja heitin“.

Það er viðvarandi viðfangsefni og sameiginleg ábyrgð okkar allra sem komum að ferðaþjónustu að uppfræða gesti okkar um ábyrga ferðahegðun. Landið okkar er stórt, fjölbreytt og krefjandi. Loforðin eru liður í að bjóða ferðamenn velkomna og hvatning til að hafa í huga viðkvæma náttúru landsins, að gæta fyllsta öryggis, sýna virðingu hvívetna og njóta þannig Íslandsferðarinnar á sem eftirminnilegastan hátt. Þannig erum við ábyrgir gestgjafar.

Í öllum viðhorfskönnunum erlendra ferðamanna er náttúran helsta aðdráttaraflið. Náttúran er tvennt í senn; viðkvæm og hrikaleg. Góð umgengni og ábyrgð eru forsenda jákvæðrar upplifunar sem aftur leiðir til jákvæðs orðspors og ímyndar landsins til lengri tíma. Við þurfum einnig að gæta að orðspori og ímynd gagnvart okkur sjálfum og íbúum landsins því annars er hætta á að félagsleg þolmörk vegna ferðaþjónustu bresti.

Í öllum okkar orðum og gjörðum verður því að bera virðingu fyrir íbúum landsins, reglum og siðum. Þessu þurfum við að koma skýrt á framfæri við þá gesti sem sækja landið heim. Það er auðvitað áskorun þegar stöðugt fjölbreyttari hópur ferðamanna með ólíka siði sækja okkur heim. Með mismunandi hætti þarf að koma því skýrt til skila að á Íslandi gilda ákveðnar reglur og réttindi. Við ætlumst til þess af gestum okkar að náttúrunni og fólkinu okkar sé sýnd virðing. Á því gefum við engan afslátt.

Með vaxandi fjölda  ferðamanna er mikilvægt að nýta vel þau tæki og tól sem við höfum til að tryggja að komandi kynslóðir geti notið alls þess sem landið okkar hefur upp á að bjóða í sátt við náttúruna og samfélagið allt. Eitt slíkt tæki erum við að endurnýja hér í dag - og ég hef þá trú að það sé til gagns.

Áfram Ísland!