Lýðræði í verki í yfir heila öld
Frá stofnun flokksins árið 1916 hefur rauði þráðurinn í ályktunum hans verið skýr: Aukin verðmætasköpun er undirstaða velferðar! Þannig komust flokksmenn til að mynda að orði á 7. flokksþingi Framsóknar á lýðveldisárinu 1944: „Flokksþingið telur, að landið ráði yfir nægum auðlindum til þess að veita öllum þeim, er það byggja, fullnægjandi lífsnauðsynjar og lífsþægindi.“ Þetta eru orð að sönnu og ekki þarf að finna upp hjólið í þessum efnum. Grunngildi Framsóknar og stefna hefur staðist tímans tönn í meira en heila öld og verið landinu til heilla. Á þeim grundvelli hefur flokkurinn staðið með borg, bæjum og að sjálfsögðu sveitum landsins, sótt fram í þágu aukinnar verðmætasköpunar og lífskjarasóknar á Íslandi. Saga Íslands frá fullveldisárinu 1918 og lýðveldisárinu 1944 er saga framfara. Þannig hafa lífskjör Íslendinga stórbatnað á tímabilinu og eru með því besta sem fyrirfinnst á byggðu bóli. Þetta staðfestir nýbirtur lífskjaralisti Sameinuðu þjóðanna þar sem Ísland skipar sér ásamt Sviss og Noregi í þrjú efstu sætin. Slíkt er auðvitað vitnisburður um þann árangur sem hefur náðst.
Þrátt fyrir góðan árangur á heimsvísu má hins vegar alltaf gera betur eins og við þekkjum. Í tímans rás verða ávallt til nýjar og verðugar áskoranir sem þarf að takast á við. Í því felst meðal annars starf stjórnmálaflokka, að móta stefnu til þess að takast á við áskoranir samtímans til þess að bæta samfélagið. Verðbólgan, orkumál og alþjóðlega verndarkerfið voru meðal þeirra málefna sem flokksmenn settu á oddinn. Við, kjörnir fulltrúar flokksins, munum halda áfram að vinna að þeim og ekki skorast undan í þeim efnum – enda á þeirri rúmu öld sem Framsókn hefur fylgt þjóðinni hefur flokkurinn aldrei skorast undan þeirri ábyrgð að stýra landinu af festu og ábyrgð, verið á skóflunni og ráðist í róttækar umbætur í þágu íslenskra hagsmuna.