Starfshópur um nýjar lýðheilsuáskoranir barna og ungmenna
Verkefni starfshópsins verður að fjalla um nýjar lýðheilsuáskoranir á meðal barna og ungmenna, þ.e. málefni er varða heilsu og líðan á heildrænan hátt þar sem horft er til líkamlegra, andlegra og félagslegra áhrifaþátta til að bæta heilbrigði, vellíðan og lífsgæði til lengri tíma. Dæmi um núverandi lýðheilsuáskoranir eru; andleg líðan (kvíði, vanlíðan og einmanaleiki), skjánotkun (samfélagsmiðlar og neikvæð áhrif þeirra, þ.m.t. falsfréttir), tóbaks- og nikotínnotkun, áfengisneysla, virkni- og hreyfingarleysi, koffíndrykkir, holdafar og næring, ofbeldi og annað sem hópnum kann að finnast mikilvægt.
Hlutverk starfshópsins er að;
- Leggja fram drög að stefnumarkandi áherslum í heilsueflingu og forvörnum barna og ungmenna, sem byggja á bestu vísindalegu þekkingu og í samræmi við stefnumótun heilbrigðisyfirvalda, einkum lýðheilsustefnu og geðheilbrigðisstefnu.
- Leggja til aðgerðir sem miða að því að efla lýðheilsu barna og ungmenna með áherslu á heilbrigð viðhorf og lífshætti.
- Greina hvernig heilsueflingu, forvörnum og viðeigandi aðgerðum verði best fyrir komið í samfélaginu.
- Skilgreina ábyrgðaraðila í framkvæmd aðgerða og leggja fram mat á nauðsynlegum aðföngum, s.s. kostnaði, mannauði og aðbúnaði.
Starfshópinn skipa
- Dóra Guðrún Guðmundsdóttir, tilnefnd af embætti landlæknis, formaður
- Ingimar Guðmundsson, tilnefndur af Sambandi íslenskra sveitarfélaga
- Liv Anna Gunnell, tilnefnd af Þróunarmiðstöð íslenskrar heilbrigðisþjónustu
- Stefanía B. Arnardóttir, tilnefnd af Geðheilsumiðstöð barna
- Elín Birna Skarphéðinsdóttir, tilnefnd af Skólaheilsugæslunni
- Hafdís Una Guðnýjardóttir, tilnefnd af umboðsmanni barna
- Hrafnkell Tumi Kolbeinsson, tilnefndur af mennta- og barnamálaráðuneytinu
- Anna María Káradóttir, sérfræðingur í heilbrigðisráðuneytinu.
Starfshópnum er heimilt að kalla til fleiri aðila, sem að málefnum koma, til fundar með starfshópnum eftir því sem við á og eftir áherslum í umræðu hópsins hverju sinni.
Starfshópurinn er skipaður 20. mars 2025 og er ætlað að skila tillögum sínum til heilbrigðisráðherra í lok maí 2025.