Stýrihópur til að fylgja eftir tillögum vinnuhóps um endurskoðun á mats- og greiðslukerfi hjúkrunarheimila

Heilbrigðisráðherra skipaði í ágúst 2022 vinnuhóp sem falið var að endurskoða mats- og greiðslukerfi hjúkrunarheimila. Skipun hópsins var í samræmi við viljayfirlýsingu ráðherra í tengslum við samninga Sjúkratrygginga, Samtaka fyrirtækja í velferðarþjónustu (SFV) og Sambands íslenskra sveitarfélaga um rekstur og þjónustu hjúkrunarheimila, sem undirritaður var í mars 2022. Vinnuhópurinn skilaði heilbrigðisráðherra skýrslu í desember 2023 sem síðan var fylgt eftir með kynningu í maí 2024.

Stýrihópnum er falið að vinna frekar að eftirtöldum tillögum vinnuhópsins:

1. Setja í gang og hafa yfirumsjón með þróunarverkefni sem fæli í sér að samið yrði við þrjú til fjögur hjúkrunarheimili um að íbúar yrðu metnir samhliða í tveimur matskerfum þ.e. 34 flokka InterRAI og 44 flokka InterRAI sem notað er á öllum hjúkrunarheimilum utan Sóltúns, sem notar 34 flokka kerfið. Þannig fengist samanburður á hvort kerfið nær betur utan um þá umfangsmiklu og oft sérhæfðu hjúkrun sem veitt er nú á hjúkrunarheimilum.
2. Útfæra tillögu vinnuhópsins um að færa InterRAI matstímabil sem tengjast greiðslum daggjalda nær í tíma. Nú miða greiðslur daggjalda við mat á þjónustuþörf íbúa allt að 18 mánuði aftur í tímann. Í ljósi þess að meðal dvalartími íbúa hjúkrunarheimila er nú um 1,9 ár má ljóst vera að allt að 18 mánaða gamalt mat endurspeglar varla hjúkrunarþarfir íbúa á hverjum tíma.
3. Koma í framkvæmd skilvirkri þjálfunar- og kennsluáætlun á InterRAI mælitækin en fram kom í störfum vinnuhópsins að þjálfun og kennslu á mælitækið væri ábótavant.
4. Koma á starfsvettvangi notenda InterRAI mælitækjanna sem stuðlar að aukinni þekkingu þeirra sem meta hjúkrunarþarfir íbúa og að niðurstöður úr matskerfunum séu samanburðarhæfar.
   

Stýrihópinn skipa

• Unnur Gunnarsdóttir, án tilnefningar, formaður
• Ragnheiður Arnardóttir, tilnefnd af embætti landlæknis
• Sigurjón Norberg Kjærnested, tilnefndur af Samtökum fyrirtækja í velferðarþjónustu
• Ásgerður Kristín Gylfadóttir, tilnefnd af Sambandi íslenskra sveitarfélaga
• Anna Kristrún Einarsdóttir, tilnefnd af Sjúkratryggingum
• Runólfur Birgir Leifsson, án tilnefningar
  
  Starfsmaður hópsins er Hrafnhildur Ýr Erlendsdóttir, sérfræðingur í heilbrigðisráðuneytinu.

 Stýrihópurinn er skipaður af heilbrigðisráðherra frá 7. október 2024 til eins árs.