Norrænt samstarf til bjargar slösuðum í kjölfar stórbruna
Norðurlandaþjóðirnar hafa skipulagt formlegt samstarf sín á milli með viðbragðsáætlun sem unnt er að virkja ef margir slasast af völdum bruna. Samstarfið getur skipt sköpum við björgun mannslífa ef margir þarfnast sérhæfðrar meðferðar vegna alvarlegra brunasára. Fjallað var um samstarfið í tengslum við fund norrænna félags- og heilbrigðisráðherra í Reykjavík í gær.
Stian K. Almeland, sérfræðingur í lýtalækningum við Haukeland Háskólasjúkrahúsið í Bergen hefur leitt samstarfið og skipulagningu þeirrar viðbragðsáætlunar sem samstarfið tekur til (á ensku: Nordic mass burn casualty incident (MBCI)).
Á norræna fundinum sem haldinn var í Reykjavík í gær fjallaði Stian um samstarfið og hvað í því felst. Hann segir viðbragðsáætlunina gott dæmi um það hvernig þjóðirnar geta bætt upp takmarkaða getu sína til að bregðast við stórum og alvarlegum atburðum með því að sameina krafta sína: „Þjóðirnar hafa hver um sig takmarkaða getu til að veita þá sérhæfðu meðferð sem nauðsynleg er þegar fólk slasast alvarlega af völdum bruna en geta áorkað miklu sameiginlega. Í áætluninni er fjallað um gæðakröfur á brunadeildum sjúkrahúsa, meðferðargetu þeirra, faglegar kröfur til færanlegra brunateyma sem geta farið milli landanna ef þörf krefur, um verkferla þegar forgangsraða þarf sjúklingum og fyrirkomulag þegar flytja þarf brunasjúklinga milli landa.
Tíminn sem skiptir sköpum
Stian segir að meðferð fólks sem hlýtur alvarlegan brunaskaða þurfi að hefjast innan tveggja daga. Það sé sá tími sem viðbragðsaðilar hafi til að skipuleggja aðgerðir og tryggja öruggan flutning sjúklinga þangað sem unnt er að veita þeim þá sérhæfðu meðferð sem nauðsyn krefur. „MBCI-viðbragðsáætluninni er ætlað að tryggja rétt viðbrögð og aðgerðir innan þessa tímaramma“ segir Stian K. Almeland.
Fjallað er um viðbragðsáætlunina í skýrslunni Nordic Mass Burn Casualty Incident Response Plan sem kom út í janúar síðastliðnum.
