Fundi forsætisráðherra Norðurlandanna og Kanada lokið

Formlegum fundi forsætisráðherra Norðurlandanna og Kanada sem fram fór í Vestmannaeyjum er lokið. Í yfirlýsingu fundarins ítreka ráðherrarnir mikilvægi samstarfs ríkjanna og heita því að efla það enn frekar, ekki síst á sviði öryggis- og varnarmála.

Í yfirlýsingunni segir einnig að aukið alþjóðasamstarf sé svarið við stórum hnattrænum áskorunum á borð við loftslagsbreytingar, ójafnrétti í heiminum og ógnir sem steðja að lýðræðinu. Þá hyggjast löndin auka samstarf sitt á sviði jafnréttismála og varðandi réttindi hinsegin fólks auk þess að leggja aukna áherslu á norrænt um viðnámsþol gegn upplýsingaóreiðu og falsfréttum.

Norðurlöndin og Kanada ítreka áframhaldandi stuðning við Úkraínu eins lengi og þörf krefur. Friðaráætlun Úkraínu sé mikilvægur grunnur að réttlátum friði sem byggir á alþjóðalögum. Þá lýsa ráðherrarnir yfir stuðningi við tjónaskrána sem komið var á fót á leiðtogafundi Evrópuráðsins í Reykjavík í maí sl. og að Rússar verði dregnir til ábyrgðar fyrir glæpi sína í Úkraínu.

Í yfirlýsingunni er einnig fjallað um aukið samstarf á sviði umhverfis- og loftslagsmála. Er þar sérstaklega horft til málefna hafsins.

Á fundi ráðherranna var líka rætt um viðnámsþrótt samfélaga og ítreka í yfirlýsingunni að slíkt viðnámsþol byggist ekki síst á sterku velferðarkerfi og samfélagslegu trausti, sem einkennir norræn samfélög.

Fyrr í dag færðu fulltrúar Vestmannaeyjabæjar norrænu forsætisráðherrunum þakkarvott fyrir ómetanlega aðstoð þeirra við uppbygginguna í kjölfar eldgossins í Heimaey fyrir 50 árum.

Forsætisráðherrar Íslands, Danmerkur, Finnlands, Kanada, Noregs og Svíþjóðar hittust einnig á vinnufundi í dag þar sem rætt var um öryggis- og varnarmál, samstarf ríkjanna á því sviði og leiðtogafund Atlantshafsbandalagsins sem haldinn verður í Vilníus síðar í sumar.

Dagskrá forsætisráðherra í kringum fundinn heldur áfram með heimsókn hennar og forsætisráðherra Kanada, Justin Trudeau, í kolefnisförgunarfyrirtækið Carbfix. Þá munu forsætisráðherra og forsætisráðherra Noregs, Jonas Gahr Støre eiga tvíhliðafund síðar í dag, auk þess að funda með hópi norrænna forstjóra sem hafa látið sig sjálfbærnimál varða. Dagskrá Katrínar Jakobsdóttur lýkur með óformlegum kvöldverði forsætisráðherra Íslands, Noregs og Kanada.