Hoppa yfir valmynd

Haus fyrir smærri skjái

Merki Stjórnarráðs Íslands Stjórnarráð Íslands
19. nóvember 2021 Utanríkisráðuneytið

Föstudagspósturinn 19. nóvember 2021

Heil og sæl.

Vikan sem nú er að líða hefur verið afar viðburðarík.

Á miðvikudag var Ísland kjörið í framkvæmdastjórn Mennta-, vísinda og menningarmálastofnunar Sameinuðu þjóðanna (UNESCO) með yfirgnæfandi stuðningi á aðalráðstefnu stofnunarinnar í París. Ísland hlaut flest atkvæði í kosningunni, eða 168 en 178 ríki greiddu atkvæði.

Óhætt er að segja að það séu frábærar fréttir, líkt og Guðlaugur Þór Þórðarson, utanríkis- og þróunarsamvinnuráðherra, sagði á Facebook-síðu sinni:

Í dag fagnar svo Ísland 75 ára aðildarafmæli að Sameinuðu þjóðunum og hefur utanríkisráðuneytið heldur betur flaggað því á sínum miðlum.

Í tilefni dagsins ritaði ráðherra grein í Fréttablaðið:

„Í ræðu sem Thor Thors sendiherra flutti við tilefnið sagði hann hugsjónina að baki Sameinuðu þjóðunum endurspegla vel gildismat Íslendinga. Þátttakan í starfi Sameinuðu þjóðanna hefur allar götur síðan verið hornsteinn í utanríkisstefnu okkar. Ísland hefur á þessum 75 árum verið öflugur málsvari sjálfsákvörðunarréttar, virðingar fyrir alþjóðalögum, mannréttinda, jafnréttis, bættra lífsgæða og sjálfbærrar auðlindanýtingar,“ ritaði ráðherra í grein sinni.

Ræðu Thors voru enn fremur gerð skil á vef ráðuneytisins. Svo birtum við einnig þetta skemmtilega myndskeið í tilefni dagsins.

Við bendum að auki á Instagram Story hjá utanríkisráðuneytinu í dag þar sem okkar fólk í fastanefnd Íslands gagnvart Sameinuðu þjóðunum fer yfir hlutina og ræðir m.a. við Thor Thors yngri.

En það var fleira á dagskrá í vikunni.

Í gær hélt Guðlaugur Þór opnunarávarp á ársfundi tengslanets norrænna kvenna í friðarumleitunum og sáttamiðlun (Nordic Women Mediators Network) en fundurinn fór fram hér á landi dagana 17.-19. nóvember.

Fyrr í vikunni skrifuðu svo Martin Eyjólfsson, ráðuneytisstjóri í utanríkisráðuneytinu, og Ib Petersen, aðstoðarframkvæmdastjóri Mannfjöldasjóðs Sameinuðu þjóðanna (UNFPA),  undir rammasamning um stuðning Íslands við UNFPA.

Á mánudag hittust þróunarsamvinnuráðherrar Norðurlanda á fjarfundi til að ræða stöðuna í Eþíópíu. Ráðherrarnir lögðu áherslu á mikilvægi þess að mannúðaraðstoð næði til bágstaddra og að pólitískra lausna væri leitað. María Mjöll Jónsdóttir, skrifstofustjóri alþjóða- og þróunarsamvinnuskrifstofu utanríkisráðuneytisins, tók þátt í fundinum fyrir hönd Íslands.

Þá birtum við í dag færslu um útskrift úr Jarðhitaskóla GRÓ þar sem 25 nemendur af 14 þjóðernum útskrifuðust.

En þá að sendiskrifstofunum.

Í Malaví vakti það athygli er sendiráð Íslands þar í landi afhenti 570 reiðhjól til allra heilbrigðisfulltrúa í Mangochi-héraði. Sagt var frá þessu í Heimsljósi og þá birtist einnig frétt um málið í Fréttablaðinu í dag.

Inga Dóra Pétursdóttir, forstöðumaður sendiráðsins í Malaví, sést hér prófa einn fákanna í mikili stemningu:

Nemendur í íslensku við háskólann í Helsinki heimsóttu Auðunn Atlason sendiherra í bústað hans þar í borg. Þar fóru einnig fram umræður um íslenskar bókmenntir í vikunni þar sem þýðingar Tapio Koivukari á verkum Jóns Kalmans Stefánssonar rithöfundar og Sigurðar Pálssonar skálds voru til umræðu.

Á Indlandi voru endurnýjanlegir orkugjafar og nýting þeirra megin umræðuefnið í heimsókn Guðna Bragasonar sendiherra til Uttarakhand-fylkis, sem liggur við rætur Himalayafjalla, 11. – 13. nóvember 2021. Sendiherra átti fund með Pushkar Sing Dhami forsætisráðherra Uttarakhand-fylkis 12. nóvember í höfuðborginni Dehradun. Viðstaddir voru einnig menntamála- og ferðamálaráðherra fylkisins, en af hálfu sendiráðsins Sigþór Hilmisson staðgengill sendiherra og Rahul Chongtham viðskiptafulltrúi.

Í París hefur okkar fólku vitanlega haft í nógu að snúast vegna framboðs Íslands til framkvæmdastjórnar Unesco og hamingjuóskunum hefur rignt inn.

Í Osló sótti Ingibjörg Davíðsdóttir sendiherra upplýsingafund norskra ráðamanna fyrir erlenda sendiherra þar í borg nýverið. Utanríkisráðherrann Anniken Huitfeldt og þróunarmálaráðherrann Anne Beathe Tvinnereim, sem jafnframt er samstarfsráðherra Norðurlanda, fóru yfir helstu áherslur nýrrar ríkisstjórnar Noregs í utanríkis- og þróunarmálum.

Þá fékk hún einnig það skemmtilega verkefni í hendurnar að sækja heim Norðmanninn Jacob Bull-Berg og veita viðtöku dýrmætri gjöf sem hann óskaði að gefa íslensku þjóðinni tilbaka. Hann hafði í fórum sínum forkunnarfagra rúmfjöl sem langamma hans fékk að gjöf í lok 19. aldar. Afar skemmtilegt! Nánar um það hér:

Í Stokkhólmi tóku sendiherrar Norðurlanda þar í borg þátt í fundi þingmannanefndar sænska þjóðþingsins um Norðurlandaráð og norræna samvinnu í vikunni. Þar gerðu sendiherrarnir grein fyrir helstu áherslum í norrænni samvinnu og framtíðaráskorunum. 

Í Færeyjum var degi íslenskrar tungu gerð rækileg skil á Facebook-síðu aðalræðisskrifstofu okkar. Fjölmargar sendiskrifstofur héldu sömuleiðis upp á daginn á sínum miðlum. Í Japan var til að mynda haldin rafræn málstofa í tilefni dagsins.

Þá komu nemendur í íslensku í heimsókn í sendiráð Íslands í Peking og héldu kynningu.

 

Fastanefnd okkar í New York hafði einnig í nógu að snúast fyrr í vikunni en þar var t.d. á dagskrá sérstakur fyrirspyrnartími Norðurlandanna á Twitter um loftslagsbreytingar. 

Í Kanada vekur svo Hlynur Guðjónsson sendiherra á kynningu fyrir íslensk fyrirtæki á Kanadamarkaði.

Nú, ef einhver á svo eftir að sjá kynningarátak Íslandsstofu á „Icelandverse“ þá deilum við því hér:

Bestu kveðjur frá upplýsingadeild.

Efnisorð

Föstudagspóstur

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Ef um er að ræða erindi til borgaraþjónustu utanríkisráðuneytisins þá skal senda póst á [email protected]

Upplýsingar um netföng, símanúmer og staðsetningu ráðuneyta