Hoppa yfir valmynd

Haus fyrir smærri skjái

Merki Stjórnarráðs Íslands Stjórnarráð Íslands
29. nóvember 2024 Utanríkisráðuneytið

Föstudagspóstur 29. nóvember 2024

Heil og sæl.

Hér kemur föstudagspóstur vikunnar.

Bjarni Benediktsson, forsætisráðherra Íslands, átti samtal við Donald Trump, verðandi forseta Bandaríkjanna, í vikunni. Þar fóru þeir yfir öflugt samband Íslands og Bandaríkjanna, viðskipti ríkjanna, samstarf á vettvangi Atlantshafsbandalagsins og áframhaldandi stuðning við Úkraínu.

Utanríkisráðuneytið kynnti í vikunni stutta samantekt sem unnin var nýlega um helstu áfanga í vinnu að öryggis- og varnarmálum síðustu ár. Tilefnið er meðal annars þær miklu breytingar sem orðið hafa á öryggisumhverfi Íslands á síðustu árum í kjölfar allsherjarinnrásar Rússlands í Úkraínu og í ljósi vaxandi spennu í alþjóðasamskiptum. „Staðan í okkar heimshluta er óvissari en hún hefur verið frá stofnun lýðveldis. Íslendingar og íslensk stjórnvöld standa frammi fyrir því að þurfa að taka öryggis- og utanríkismál alvarlegar en nokkru sinni fyrr. Eins og fram kemur í þessari samantekt höfum við tekið mikilvæg skref í samstarfi við bandalagsríki okkar á undanförnum árum en það mun þurfa meira til því fátt bendir til þess að þeim ólgutímum sem við lifum nú sé ljúki í bráð,“ sagði Þórdís Kolbrún Reykfjörð Gylfadóttir utanríkisráðherra í tengslum við birtingu samantektarinnar.

  

Þá skrifuðu menningar- og viðskiptaráðherra, fjármála- og efnahagsráðherra, utanríkisráðherra og framkvæmdastjóri Íslandsstofu undir endurnýjaðan þjónustusamning um starfsemi Íslandsstofu, sem gildir frá 1. janúar 2025 til ársloka 2029. Starfsemi Íslandsstofu byggir á útflutningsstefnu Íslands og er lögð áhersla á þjónustu við fimm geira atvinnulífsins; orku og grænar lausnir, hugvit og tækni, listir og skapandi greinar, ferðaþjónustu og sjávarútveg og matvæli.

  

Í vikunni fór einnig fram fundur EES-ráðsins. Var hann haldinn í EFTA-húsinu í Brussel en þar komu saman ráðherrar EES/EFTA-ríkjanna og fulltrúar framkvæmdastjórnar Evrópusambandsins. Kristján Andri Stefánsson, sendiherra í Brussel, sótti fundinn fyrir Íslands hönd í fjarveru utanríkisráðherra. Meginumræðuefni fundarins voru samkeppnishæfni Evrópu og framkvæmd EES-samningsins.

  

Verðlaunahátíð bókmenntaverðlauna Evrópusambandsins árið 2024 fór sömuleiðis fram í Brussel í síðustu viku en verðlaunin eru veitt upprennandi rithöfundum frá löndum innan Evrópska efnahagssvæðisins. Eitt af markmiðum verðlaunanna er að hefja upp nýjar raddir í evrópskum nútímabókmenntum og styðja við þýðingu þeirra og dreifingu. Að þessu sinni var smásagnasafnið Sápufuglinn eftir Maríu Elísabetu Bragadóttur tilnefnt til verðlaunanna. Daginn fyrir verðlaunahátíðina stóð sendiráðið í Brussel fyrir bókmenntaviðburði tileinkuðum Maríu Elísabetu og Sápufuglinum í samstarfi við samtök evrópskra bókaútgefenda. Viðburðurinn fór fram í bókaversluninni Librebook í Brussel og var vel sóttur.

  

Sendiherrahjónin í Helsinki, Harald Aspelund og Ásthildur Jónsdóttir, opnuðu sýninguna THREAD CAREFULLY sem þau Sigga Björg Sigurðardóttir og Mikael Lind standa fyrir, í sendiráðsbústaðnum.

  

Þá tók Harald á móti myndlistarmanninum Sigurði Sævari Magnúsarsyni sem staddur var í Helsinki á dögunum.

  

Hljómsveitin Sigur Rós kom einnig við í Finnlandi en hún er þessa dagana á tónleikaferðalagi á Norðurlöndunum. Harald hitti liðsmenn sveitarinnar.

  

Þá tóku Harald og starfsfólk sendiráðsins í Helsinki á móti íslenskri sendinefnd sem komin var á hönnunarvikuna Slush sem fram fer í borginni árlega. Þar voru meðal annars fulltrúar Íslandsstofu.

  

Jóhanna Jónsdóttir, staðgengill sendiherra í London, tók á móti íslenskri sendinefnd sem skipuð var fulltrúum stjórnvalda og sótti í vikunni árlega ráðstefnu Atlantshafsbandalagsins um netöryggi.

  

Sendiráðið í London tók líka á móti hópi norrænna nemenda við London School of Economics í vikunni. Nemendurnir fengu kynningu á utanríkisstefnu Íslands og starfsemi sendiráðsins og að henni lokinni fór fram mjög frjó umræða milli nemenda og starfsfólks sendiráðsins.

  

Högni Kristjánsson, sendiherra í Osló, fékk í vikunni afhent eintak af bók um norska flugherinn og veru hans á Íslandi í seinni heimsstyrjöldinni.

  

Högni og starfsfólk sendiráðsins buðu til morgunverðar og samtals um komandi alþingiskosningar fyrir sendiskrifstofur í Osló sem fara með fyrirsvar gagnvart Íslandi. Ólafur Þ. Harðarson, prófessor emeritus, tók þátt í gegnum netið og jós úr viskubrunni sínum.

  

Sendiherrar Norðurlandanna í Osló og sendiherra Kanada funduðu með utanríkisráðherra Noregs, Espen Barth Eide, í vikunni. Þar ræddu þeir mikilvægi samráðs og samstarfs ríkjanna í því skyni að takast á við sameiginlegar áskoranir á norðurslóðum. Var sammæli um mikilvægi þess að Norðurlöndin og Kanada eigi með sér samráð um sameiginlega hagsmuni í tengslum við þróunina á norðurslóðum.

  

Kvikmyndin Snerting var frumsýnd í Hiroshima á alþjóðlegri kvikmyndahátíð á dögunum. Þema hátíðarinnar var friður en myndin er byggð á samnefndri skáldsögu Ólafs Jóhanns Ólafssonar, sem er ástarsaga með reynslu Hibakusha – þeirra sem lifðu af kjarnorkuárásina á Hiroshima – sem bakgrunn. Stefán Haukur, sendiherra í Japan, og Halldóra eiginkona hans sóttu kvikmyndahátíðina og buðu til hádegisverðar þeim Baltasar Kormáki leikstjóra myndarinnar, borgarstjóra Hiroshima, forstöðumanni Friðarsafnsins og, síðast en ekki síst, Keiko Ogura, sem er Hibakusha og í grasrótarsamtökunum Nihon Hidankyo, sem hlutu friðarverðlaun Nóbels í ár.

Bók listamannsins Brian Pilkington um jólasveinana 13, Jólin okkar, er nú komin út á japönsku í þýðingu Shohei Akakura. Bókin verður kynnt á sérstökum viðburði í Múmíngarðinum í Saitama um helgina þar sem íslenskar jólahefðir verða í forgrunni. Þar munu fulltrúar sendiráðsins segja frá jólum á Íslandi.

Friðrik Jónsson, sendiherra í Varsjá, tók á móti Aleksandr Kropiwnicki, verðandi sendiherra Póllands á Íslandi, á dögunum. Þar voru til umræðu tvíhliða samband Íslands og Póllands og samstarf ríkjanna á vettvangi Atlantshafsbandalagsins.

  

Friðrik var einnig viðstaddur minningarathöfn í Kænugarði um fórnarlömb Holodomor, hungursneyðarinnar sem geisaði í Úkraínu á fyrri hluta síðustu aldar.

Greint var frá auknum stuðningi Íslands við verkefni sem snýr að því að fjölga heimaræktuðum skólamáltíðum í Síerra Leóne.

 

Birgir Hrafn Búason, deildarstjóri á laga- og stjórnsýsluskrifstofu ráðuneytisins, var staddur í New York á dögunum þar sem hann tók þátt á samráðsfundum um hafréttarmál. Sérstakur framkvæmdastjórnarfundur UNESCO var haldinn í vikunni vegna nýlegrar ákvörðunar ísraelska þingsins um að banna starfsemi Palestínuflóttamannaaðstoðar Sameinuðu þjóðanna (UNRWA). Kristín Halla Kristinsdóttir, varafastafulltrúi Íslands, flutti ávarp fyrir hönd Norðurlandanna þar sem þau undirstrikuðu stuðning sinn við UNRWA og hvöttu UNESCO, sem ábyrgðaraðila fyrir heimsmarkmið fjögur um menntun, að tryggja aðgang palestínskra barna á flótta að menntun. Fastanefnd Íslands gagnvart UNESCO tók svo þátt í vinnustofu stofnunarinnar um kynjaða hlutdrægni í gervigreind í tilefni af Alþjóðlegum baráttudegi Sameinuðu þjóðanna gegn kynbundnu ofbeldi. Dr. Rumman Chowdhury, sérstakur erindreki Bandaríkjanna fyrir vísindamál, leiddi þátttakendur í gegnum æfingar á ChatGPT og umræður hvernig gervigreind getur verið misnotuð til að ýta undir stafrænt kynbundið ofbeldi.

Í vikunni kíkti hópur nemenda ásamt kennurum frá Fjölbrautaskóla Vesturlands Akranesi í heimsókn í sendiráðið í Berlín. Fengu nemendurnir leiðsögn um húsnæðið og kynningu á starfi sendiráðsins. Auðunn Atlason sendiherra tók á móti hópnum, fræddi þau um allt mögulegt og svaraði spurningum nemenda.

  

Bjarki Þórðarson starfsmaður sendiráðsins í Berlín tók þátt í panelumræðum á fjölsóttum viðburði í Felleshus í vikunni sem starfsnemar í norrænu sendiráðanna í Berlín stóðu fyrir. Auðunn Atlason sendiherra sagði nokkur orð við opnun viðburðarins.

Þá tóku fjölmargar sendiskrifstofur þátt í tilefni alþjóðlegs dags gegn kyndbundnu ofbeldi í vikunni en samhliða því var hleypt úr vör 16 daga átaki þar sem til stendur að vekja athygli á og berjast gegn kynbundnu ofbeldi, einkum gagnvart konum og stúlkum.

Hér má sjá nokkrar færslur frá sendiskrifstofum í tengslum við átakið:

Fleira var það ekki þessa vikuna — góða helgi!

Upplýsingadeild.

Efnisorð

Föstudagspóstur

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Ef um er að ræða erindi til borgaraþjónustu utanríkisráðuneytisins þá skal senda póst á [email protected]

Upplýsingar um netföng, símanúmer og staðsetningu ráðuneyta