Hoppa yfir valmynd

Haus fyrir smærri skjái

Merki Stjórnarráðs Íslands Stjórnarráð Íslands
10. janúar 2025 Utanríkisráðuneytið

Föstudagspóstur 10. janúar 2025

Heil og sæl.

Við hefjum yfirferð vikunnar á vinnuheimsókn Þorgerðar Katrínar Gunnarsdóttur utanríkisráðherra til Úkraínu. Þar fundaði hún með ráðamönnum, áréttaði stuðning Íslands við varnarbaráttu Úkraínu og kynnti sér stöðu mála. Meðal þeirra sem hún hitti voru Andrii Sybiha utanríkisráðherra og Denys Shmyhal forsætisráðherra.

 

Því næst hélt ráðherra til Ramstein í Þýskalandi þar sem fulltrúar ríkjahóps til stuðnings varnarbaráttu Úkraínu (Ukraine Defense Contact Group) komu saman og áréttuðu stuðning sinn. Þá átti ráðherra símtöl við norræna kollega. Hún ræddi annars vegar við Espen Barth Eide, utanríkisráðherra Noregs, um mikilvægi norrænnar samvinnu og aukið vægi samstarfs Norðurlanda og Eystrasaltsríkjanna á sviði utanríkis- og varnarmála og hins vegar við Lars Løkke Rasmussen, utanríkisráðherra Danmerkur, um sterk bönd Íslands og Danmerkur, málefni norðurslóða og öryggis- og varnarmál. Þorgerður Katrín átti sömuleiðis símafund með Philippe Lazzarini, framkvæmdastjóra Palestínuflóttamannaaðstoðar Sameinuðu þjóðanna (UNRWA), þar sem hún staðfesti að Ísland muni greiða framlög til stofnunarinnar fyrr en áætlað var, í ljósi gríðarlegrar mannúðarþarfar. Þá ræddi ráðherra einnig við Sigrid Kaag, yfirmann mannúðar- og uppbyggingarmála Sameinuðu þjóðanna fyrir Gaza, um mikilvægi þess að koma á vopnahléi á Gaza, bæta aðgengi að mannúðaraðstoð og finna leið að lausn fyrir fólkið á svæðinu. Norðurlöndin fimm og Eystrasaltsríkin þrjú sendu frá sér sameiginlega yfirlýsingu þar sem þau áréttuðu stuðning sinn við Moldóvu vegna þeirrar stöðu sem uppi er í orkumálum þar í landi. Þá vottaði ráðherra fórnarlömbum jarðskjálfta í Tíbet og fjölskyldum þeirra samúð sína.

Ísland tók formlega sæti í mannréttindaráði Sameinuðu þjóðanna um áramótin og mun sitja í ráðinu í samtals þrjú ár, eða til loka árs 2027.

  

Flugsveit finnska flughersins er væntanleg til landsins í lok janúar, en þá hefst loftrýmisgæsla Atlantshafsbandalagsins. Flugsveitin samanstendur af fjórum F/A-18 Hornet orrustuþotum og allt að 50 liðsmönnum. Um er að ræða fyrstu loftrýmisgæslu Finna á Íslandi eftir að þeir gengu í Atlantshafsbandalagið.

  

Pétur Ásgeirsson, sendiherra Íslands í Danmörku, og eiginkona hans, Jóhanna Gunnarsdóttir sóttu árlega nýársmóttöku dönsku konungshjónanna fyrir sendiherra erlendra ríkja í Kristjánsborgarhöll á dögunum.

  

Pétur sótti fyrirlestur Naaju H. Nathanielsen, ráðherra viðskipta-, námavinnslu-, dómsmála- og jafnréttismála í grænlensku landsstjórninni. Nathanielsen gerði grein fyrir uppbyggingu Grænlands á sviði ferðamennsku og tækifærum í námavinnslu í Grænlandi. Jacob Nitter Sørensen, forstjóri Air Greenland, tók einnig til máls á fundinum og fjallaði m.a. um samstarf félagsins við Icelandair og fyrirhugaða uppbyggingu í tengslum við nýja flugvelli í Grænlandi.

  

Þá sat Pétur hádegisverðarfund í boði Høgna Hoydal, utanríkisráðherra Færeyja, á færeysku sendiskrifstofunni í Kaupmannahöfn. Á fundinum gerði Høgni grein fyrir því sem er efst á baugi í færeyskum utanríkismálum og málefnum Færeyja gagnvart konungsríkinu. Á fundinum voru einnig aðrir sendiherrar Norðurlandanna í Kaupmannahöfn ásamt fulltrúa Grænlands.

  

Starfsfólk sendiráðsins í Lilongwe var viðstatt undirritun samkomulags vegna verkefnis í Nkhotakota sem snýr að valdeflingu kvenna, jafnrétti og kynheilbrigði.

 

Heba Líf Jónsdóttir, viðskiptafulltrúi sendiráðsins í Osló, sótti ráðstefnuna TravelMatch Norway á dögunum. TravelMatch hefur síðustu ár vaxið sem mikilvægur viðburður fyrir þau sem starfa við að auglýsa spennandi ferðamannastaði fyrir norska ferðamenn.

  

Rut Einarsdóttir er nýjasti meðlimur sendiráðsins í Tókýó. Við bjóðum hana velkomna til starfa!

  

Friðrik Jónsson, sendiherra í Varsjá, fylgdi utanríkisráðherra til Úkraínu í vinnuheimsókninni sem að framan var minnst á.

  

Jörundur Valtýsson, fastafulltrúi Íslands hjá Atlantshafsbandalaginu, heimsótti á dögunum varnarsvæðið í Keflavík og kynnti sér starfið þar og innviðauppbyggingu á svæðinu.

Svanhildur Hólm Valsdóttir, sendiherra í Washington, var viðstödd útför Jimmy Carter, 39. forseta Bandaríkjanna, sem lést á dögunum hundrað ára að aldri.

Þórir Ibsen, sendiherra í Peking, gerði ásamt öðrum sendiherrum Norðurlandanna fjögur stuttmyndbönd sem birt voru á ýmsum kínverskum samfélagsmiðlum, þ. á m. Weibo-síðu sendiráðsins. Í myndböndunum sögðu sendiherrarnir frá ýmsum jólasiðum á Norðurlöndunum. Myndböndin hlutu góð viðbrögð og áhorf hjá yfir 30 þúsund manns.

Inga Dóra Pétursdóttir, staðgengill sendiherra í Peking, flutti ræðu á opnun myndlistasýningar í Tsinghua háskólanum með þrykkverkum eftir kínverska listamenn sem túlkuðu m.a. ljóð Gerðar Kristnýjar og annarra skálda, frá Noregi, Svíþjóð og Kína. 

Fleira var það ekki þessa vikuna — góða helgi!

Kveðja,

Upplýsingadeild.

Efnisorð

Föstudagspóstur

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Ef um er að ræða erindi til borgaraþjónustu utanríkisráðuneytisins þá skal senda póst á [email protected]

Upplýsingar um netföng, símanúmer og staðsetningu ráðuneyta