Hoppa yfir valmynd

Haus fyrir smærri skjái

Merki Stjórnarráðs Íslands Stjórnarráð Íslands
28. febrúar 2025 Utanríkisráðuneytið

Föstudagspóstur 28. febrúar 2025

Heil og sæl.

Vika Þorgerðar Katrínar Gunnarsdóttur utanríkisráðherra hófst á þátttöku í ráðherraviku mannréttindaráðs Sameinuðu þjóðanna í Genf. Var það í fyrsta sinn sem hún tekur þar þátt en Ísland tók sæti í ráðinu sem aðildarríki um áramótin og á þar sæti næstu þrjú árin. Ráðherra flutti ávörp, sótti hina ýmsu viðburði og átti fjölmarga fundi með kollegum og félagasamtökum á meðan dvöl hennar stóð í Genf. Hér er brot af því helsta.

  

Þá gerði hún allsherjarinnrás Rússa í Úkraínu að umfjöllunarefni sínu. Var það í tilefni þeirra hörmulegu tímamóta sem urðu á mánudag þegar stríðið varð þriggja ára. Fáni Úkraínu blakti við hlið þess íslenska við húsakynni utanríkisráðuneytisins í Austurhöfn þann dag og þá tóku sendiskrifstofur þátt í að sýna varnarbaráttu úkraínsku þjóðarinnar stuðning.

  

  

  

  

 

Utanríkisráðherrar Norðurlandanna og Eystrasaltsríkjanna skrifuðu og birtu sameiginlega grein í Financial Times þar sem stuðningur við varnarbaráttu Úkraínu var áréttaður.

Mikilvægi þess að Ísland efli enn frekar samstarf sitt við bandalagsríki og styrki eigin getu til að tryggja stöðuvitund, öryggi, varnir og áfallaþol voru leiðarstef opnunarávarps Þorgerðar Katrínar Gunnarsdóttur utanríkisráðherra á málþingi um öryggismál á viðsjárverðum tímum sem haldið var í Norræna húsinu í vikunni. Að málþinginu stóð Varðberg - samtök um vestræna samvinnu og alþjóðamál í samstarfi við utanríkisráðuneytið.

  

Kjarnorkuknúinn bandarískur kafbátur, USS Delaware, var í stuttri þjónustuheimsókn í íslensku landhelginni í vikunni. Varðskipið Freyja fylgdi kafbátnum um landhelgina og í utanverðan Eyjafjörð, þar sem fram fóru áhafnaskipti og önnur þjónusta við kafbátinn. Landhelgisgæsla Íslands leiddi framkvæmd heimsóknarinnar í nánu samstarfi við embætti ríkislögreglustjóra, Geislavarnir ríkisins og utanríkisráðuneytið í samræmi við settar verklagsreglur.

Utanríkisráðuneytið og Fjarskiptastofa undirrituðu samkomulag um flutning á starfsemi netöryggissveitarinnar CERT-IS í starfstöð ráðuneytisins. Með flutningnum er netöryggissveitinni tryggð fyrsta flokks starfsaðstaða sem og öflugra samstarf við varnarmálaskrifstofu utanríkisráðuneytisins.

  

Vinir okkar í Eistlandi fögnuðu þjóðhátíðardegi sínum 24. febrúar síðastliðinn og var þeim árnað heilla á reikningi utanríkisráðuneytisins. Harald Aspelund, sendiherra í Helsinki, og Ásthildur Jónsdóttir, eiginkona hans, tóku þátt í hátíðahöldum í Tallinn.

Loftferðasamningur milli Íslands og Georgíu var undirritaður í Reykjavík í vikunni. Þetta er fyrsti loftferðasamningur þjóðanna en undirbúningur að gerð samningsins hófst árið 2018. Martin Eyjólfsson, ráðuneytisstjóri utanríkisráðuneytisins, og Givi Davitashvili, flugmálastjóri Georgíu, undirrituðu samninginn.

  

Auðunn Atlason, sendiherra í Berlín, tók á móti um hundrað gestum á dögunum þegar heimildarmynd Hrafnhildar Gunnarsdóttur um Kvennafrídaginn 24. október 2023 var sýnd.

  

Sendiráðið í Helsinki fékk til sín leikskólabörn en þar ræddu þau við listakonuna Josefinu Nelimarkka um listina og verk hennar sem eru nú til sýnis í sendiráðsbústaðnum.

  

Sýningin „De fire elementer“ opnaði í Galleri Krebsen í Studiestræde á dögunum. Pétur Ásgeirsson, sendiherra í Kaupmannahöfn, flutti opnunarávarp og Hjálmfríður Þöll Friðriksdóttir söng fyrir viðstadda. Sýningin samanstendur af verkum listafólksins Piu Sverrisdóttur, Þórunnar Báru Björnsdóttur, Mariettu Bonnet (sem einnig er eigandi Galleri Krebsen) og Nönnu Bisp Büchert og stendur yfir fram í miðjan mars.

  

Samtvinnun myndlistar og vísinda var viðfangsefni sýningaraðar í Hoeng Gallery sem er hluti af Downing College í Cambridge. Að þessu sinni urðu jarðvísindi fyrir valinu og þemað íslensk eldfjöll (Magma Rising: A Journey to the Centre of Icelandic Volcanoes). Sýnd eru verk eftir 18 listamenn, þar á meðal íslenska. Sturla Sigurjónsson, sendiherra í London, var viðstaddur opnun sýningarinnar og hitti þar meðal annars Graham Virgo, rektor Downing College, Sarah Kennedy prófessor og sýningarstjóra og Nick Rawlinson prófessor og formann ráðgjafarnefndar. Þá hafði Sturla mikla ánægju af að hitta myndlistarmennina Önnu Guðjónsdóttur og Brand Karlson auk annarra íslenskra gesta.

  

Árleg verðlaunaafhending fyrir besta fiskinn og frönsku kartöflurnar (National Fish and Chips Awards) fór fram í London í vikunni. Seafood from Iceland var meðal styrktaraðila viðburðarins enda góðar líkur á að fiskurinn komi frá Íslandi þegar þessi vinsæli réttur er a boðstólnum hér í Bretlandi. Jóhanna Jónsdóttir, varamaður sendiherra, sótti verðlaunaafhendinguna fyrir hönd sendiráðsins.

  

Benedikt Höskuldsson, sendiherra í Nýju Delí, var meðal þátttakenda frá 60 löndum sem heimsóttu Kaziranga-þjóðgarðinn á dögunum.

  

Hlynur Guðjónsson, sendiherra í Ottawa, ferðaðist til austurhluta Kanada sem liggur að Atlantshafi ásamt norrænum kollegum og tók þar þátt í umfangsmikilli dagskrá.

  

  

Sendiráðið í Osló fékk heimsókn frá ræðismanni Íslands í Þrándheimi, Nina Svendsen, sem tók við embættinu í október síðastliðnum. Starfsfólk sendiráðsins átti gott og líflegt spjall við hana um komandi verkefni, nýafstaðnar kosningar og margt fleira.

  

Þá fékk okkar fólk í Osló Kristrúnu Frostadóttur forsætisráðherra í stutta heimsókn á leið hennar frá Úkraínu. Hún nýtti tækifærið til að kynna stefnu nýrrar ríkisstjórnar fyrir fulltrúum sendiráða í Noregi með fyrirsvar gagnvart Íslandi. Í kraftmikilli kynningu fór hún yfir helstu áherslur stjórnvalda, þar á meðal í velferðarmálum, húsnæðismálum, ferðamálum og fleira. Fundurinn var afar áhugaverður og líflegur þar sem sendiherrar lögðu fram fjölmargar spurningar til forsætisráðherra.

  

Stefán Haukur Jóhannesson, sendiherra í Tókýó, var viðstaddur verðlaunaafhendingu hjá fiskvinnslufyrirtækjum í Japan og smakkaði þar meðal annars grálúðu.

  

Friðrik Jónsson, sendiherra í Varsjá, tók þátt í fundi með fulltrúa þróunar- og tæknimálaráðuneyti Póllands ásamt norskum kollega sínum. Þar voru málefni innri markaðarins og breytt geópólitísk staða alþjóðakerfisins til umræðu.

  

Friðrik var Kristrúnu Frostadóttur og hennar fólki til halds og trausts í Úkraínu en hún var þar stöddum ásamt Evrópuleiðtogum og fleirum til að sýna stuðning við varnarbaráttu Úkraínu gegn árásargirni Rússa.

Fastanefndin í Genf hefur staðið í ströngu í yfirstandandi vetrarlotu mannréttindaráðs Sameinuðu þjóðanna sem sagt var frá að framan og utanríkisráðherra sótti á dögunum. Einar Gunnarsson fastafulltrúi og hans fólk hafa þannig tekið þátt í að flytja yfirlýsingar, til að mynda fyrir hönd Norðurlandanna og Eystrasaltsríkjanna, um stöðu mála fyrir botni Miðjarðarhafs, í Afganistan og Súdan. Okkar fólk í fastanefndinni gagnvart Sameinuðu þjóðunum í New York tók á móti hópi stjórnmálafræðinema frá Háskóla Íslands. För þeirra var því næst heitið til Washington D.C. Anna Jóhannsdóttir, fastafulltrúi í New York, flutti ræðu fyrir hönd Norðurlandanna þar sem lögð var áhersla á stækkað, gagnsærra, skilvirkara og lýðræðislegra öryggisráð Sameinuðu þjóðanna sem fæli einnig í sér inngildingu. Svanhildur Hólm Valsdóttir, sendiherra í Washington D.C., fundaði með Greg Murphy, fulltrúadeildarþingmanni frá Norður-Karólínu í vikunni. Samband Íslands og Bandaríkjanna var efst á baugi í tali þeirra en Murphy er einn af forsvarsmönnum vinahóps Íslands í bandaríska fulltrúadeildarþinginu. Svanhildur fundaði einnig með Rob Wittman, fulltrúadeildarþingmanni frá Virginíu, en hann er einnig í áðurnefndum hópi. Þá hittu Svanhildur og Ásdís Hreinsdóttir, starfsmaður sendiráðsins, Rachel Kallander, kjörræðismann Íslands í Alaska. Starfsfólk sendiráðsins í Síerra Leóne fékk fræðslu og þjálfun í brunavörnum frá slökkviliðinu í Freetown í vikunni. Norrænu sendiherrarnir í Peking áttu fund með Lu Kang, vararáðherra alþjóðadeildar Kommúnistaflokks Kína. Auk þess að ræða ýmsa þætti samskipta Norðurlandanna við Kína, ræddu þeir innrásarstríð Rússlands í Úkraínu og afstöðu Kína til þess. Sendiráðið í Peking starfar þétt með hópi íslenskra fyrirtækja í Kína (Icelandic Business Forum). Fyrri fundurinn af tveimur árlegum fundum fór fram í formi fjarfundar í vikunni. Þessir fundir eru nýttir til að bera saman bækur, leita ráða og ræða samstarfsfleti.

Starfsfólk sendiráðsins í Peking sótti minningarathöfn í sendiráði Póllands vegna árásarstríðs Rússa í Úkraínu, og var færsla birt á Weibo-reikningi sendiráðsins til stuðnings Úkraínu (sem er á kínversku). Starfsfólk sendiráðsins sótti jafnframt samstöðuviðburð gegn nauðungarflutningum íbúa Gaza og í þágu sjálfstæðrar Palestínu sem haldinn var í sendiráði Palestínu.

Fleira var það ekki þessa vikuna — góða helgi!

Kveðja, Upplýsingadeild.

Efnisorð

Föstudagspóstur

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Ef um er að ræða erindi til borgaraþjónustu utanríkisráðuneytisins þá skal senda póst á [email protected]

Upplýsingar um netföng, símanúmer og staðsetningu ráðuneyta